ތުރުކީ އާއި މިސްރުން 10 އަހަރަށް ފަހު ޑިޕްލޮމެޓިކް ގުޅުން ގާއިމްކޮށް، ސަފީރުން ކަނޑައަޅައިފި އެވެ.

ދެ ގައުމުގެ ގުޅުން ކެނޑުނީ 2013 ވަނަ އަހަރު މިސްރުގެ އޭރުގެ ސިފައިންގެ ޗީފް އަބްދެލް ފައްތާހް އަލް ސިސީ އިސްވެ ހުންނަވައި ހިންގި ބަގާވާތާ ގުޅިގެންނެވެ.

ބަގާވާތުގައި ވެރިކަމުން ދުރުކުރި މުސްލިމް ބްރަދާހުޑްގެ ލީޑަރު މުހައްމަދު މުރްސީއަކީ ތުރުކީއާ ގާތް ގުޅުމެއް ބޭއްވި ވެރިޔެކެވެ.

އެހެން ނަމަވެސް، މިދިޔަ މޭ މަހު ދެ ގައުމުގެ ރައީސުން ނިންމެވީ އަލުން ގުޅުން ގާއިމްކުރުމަށެވެ.

ދެ ގައުމުން ގުޅިގެން ނެރުނު ބަޔާނެއްގައި ބުނީ މިސްރުގެ ސަފީރަކަށް އައްޔަނު ކުރީ އަމްރު އެލްހަމަމީ ކަމަށާއި ތުރުކީގެ ސަފީރަކަށް ހަމަޖެއްސީ ސާލިހް މުތްލޫ ސެން ކަމަށެވެ.

ތުރުކީގެ ފޮރިން މިނިސްޓަރު ހާކަން ފިދާން ވިދާޅުވީ މިއީ ދެ ގައުމުގެ ގުޅުން އަލުން ބިނާކުރުމުގެ ފެށުން ކަމަށެވެ.

މިސްރުގެ އިތުރުން މެދުއިރުމަތީގެ އެހެން ގައުމުތަކާ ގުޅުން ރަނގަޅު ކުރަން ތުރުކީއިން މަސައްކަތް ފެށީ 2021 ވަނަަ އަހަރު އެވެ.