ޕެރިސް (ޖޫން 19) - ޕީއެސްޖީގެ ކޯޗުކަމުން ކްރިސްޓޯފް ގަލްޓިއޭ ވަކިކޮށް، އެ މަގާމު ސްޕެއިންގެ ލުއިސް އެންރީކޭއާ ހަވާލުކުރަން އެ ކްލަބުން ނިންމާފައިވާ ކަމަށް މީޑިއާ ރިޕޯޓްތައް ބުނެފި އެވެ.

ޕީއެސްޖީގެ ކޯޗުކަމާ މިދިޔަ ސީޒަންގައި ހަވާލުވި ގަލްޓިއޭ، 56، އެ މަގާމުން ވަކިކުރަން ނިންމާފައިވާކަން ޕީއެސްޖީ އަދި އިއުލާނު ނުކުރިޔަސް، ގަލްޓިއޭގެ މަގާމު ގެއްލޭނެކަން ކަށަވަރުވެފައިވާ ކަމަށް ރިޕޯޓްތައް ބުނެ އެވެ.

އާޖެންޓީނާގެ ކޯޗު، މައުރީސިއޯ ޕޮޗެޓީނޯގެ ބަދަލުގައި ޕީއެސްޖީގެ ކޯޗުކަން ހަވާލުކުރި ގަލްޓިއޭއާ މެދު އެ ކްލަބުން ބޮޑެތި އުންމީދުތަކެއް ކުރި ނަމަވެސް، މިދިޔަ ސީޒަންގައި އެ ޓީމުން އުންމީދުކުރި ވަރުގެ ކާމިޔާބެއް ނުލިބުނެވެ. ޗެމްޕިއަންސް ލީގުގެ ގަދަ 16 އިން ޕީއެސްޖީ ކެޓިއިރު، ފްރާންސް ލީގު ވެސް ކާމިޔާބުކުރެވުނީ އެންމެ ޕޮއިންޓެއްގެ ތަފާތުންނެވެ.

މިދިޔަ އަހަރު އޮތް ވޯލްޑް ކަޕަށް ފަހު ސްޕެއިންގެ ކޯޗުކަމުން ވަކިވި އެންރީކޭ، 53، ވަނީ މީގެ ކުރިން ބާސެލޯނާގެ ކޯޗެއްގެ ގޮތުގައި ގިނަ ކާމިޔާބީތަކެއް ހޯދައިފަ އެވެ. ރޯމާ އަށް ވެސް ކޯޗުކޮށްދިން އެންރީކާ ހޯދަން ޗެލްސީން ވެސް މަސައްކަތް ކުރި ނަމަވެސް މިދިިޔަ ސީޒަންގެ މެދުތެރެއިން އެ ޓީމަށް ދޭން އެންރީކޭ ބޭނުމެއްނުވި އެވެ.

އެންރިކޭ ކޯޗަކަށް ގެންނަން ޕީއެސްޖީން ނިންމީ ބަޔާން މިއުނިކުން މިދިޔަ ސީޒަނުގެ ފަހުކޮޅުގައި ވަކިކުރި ކޯޗު ހޫލިއަން ނާގަލްސްމަންއާ އެކު ކުރިއަށް ގެންދިޔަ މަޝްވަރާތައް ކޮޅެއްގައި ނުޖެހުމުންނެވެ.

އަގުބޮޑުކޮށް، ގިނަ ތަރިންތަކެއް ގެނެސްގެން ފާއިތުވި ސީޒަންތަކުގައި އެކަށީގެންވާ ކާމިޔާބެއް ނުލިބުމުން ޕީއެސްޖީން ދަނީ އެ ކްލަބުގެ ޕޮލިސީ ބަދަލުކުރުމަށް ވިސްނަމުންނެވެ. އެގޮތުން، ތަރިންތަކެއް ގެނެސްގެން ޓީމެއް ހެދުމުގެ ބަދަލުގައި، ދިގު މުއްދަތަކަށް އޮންނާނެ ވަރުގަދަ ޓީމެއް ބިނާކުރުމަށް އެ ކްލަބުން ޕޮލިސީ ބަދަލުކުރުމުގެ ވިސްނުންތަކެއް އޮތް ކަމަށް ރިޕޯޓްތައް ބުނެ އެވެ.