ލަންޑަން (ޖޫން 19) - މީގެ ތިން އަހަރެއްހާ ދުވަސް ކުރިން ޔޫއެސް އޯޕަން މުބާރާތުގެ އަންހެން ސިންގަލްސް ޗެމްޕިއަންކަން ލިބުނު ފަހުން ކެރިއަރުގައި ގިނަ ޕްރެޝަރާ ކުރިމަތިލާން ޖެހުނު އިނގިރޭސި ޒުވާން ޓެނިސް ތަރި، އެމާ ރަޑުކާނޫ އަށް އަދިވެސް އެއް ލެވަލެއްގައި ކުޅެވޭ ގޮތެއް ނުވެ އެވެ.

ގިނަ ބަޔެއްގެ ލޮލުގައި އެމާ، 20، އަޅައިގަތީ 2021 ވަނަ އަހަރުގެ ޔޫއެސް އޯޕަންގެ އަންހެން ސިންގަލްސް ޗެމްޕިއަންކަން ސެޓެއް ވެސް ނުގެއްލި ހޯދުމާ ގުޅިގެންނެވެ. އެ މުބާރާތުގެ ކޮލިފައިން ބުރުން ހޮވިގެން ގޮސް ޗެމްޕިއަންކަން ހޯދުމާ އެކު އެ ކާމިޔާބީ އިތުރަށް ހާއްސަވީ ރެކޯޑަކާ އެކު އެވެ.

ޔޫއެސް އޯޕަންގެ އެ ކާމިޔާބީ ދަމަހައްޓަން ކުރި މަސައްކަތުގައި އެމާ އަށް އަދި ކާމިޔާބެއް ނުލިބޭއިރު، އަނިޔާއާ ހެދި އަތުގެ ދެ އޮޕަރޭޝަނެއް ވެސް ކުރަން ޖެހުނެވެ. އެ ހުރިހާ ކަމެއް ކުރިމަތިވިއިރު، ކާމިިޔާބީ ނުދެމެހެއްޓޭތީ ދިޔަ ނަފްސާނީ ކަންކަމާ ހެދި ވެސް ވަރަށް އުނދަގޫ ހާލަތްތަކެއް ދިޔަ ކަމަށް އެމާ ވަނީ ބުނެފަ އެވެ.

ދެ އަހަރު ތެރޭ އެމާ ވަނީ ފަސް ކޯޗުންނާ އެކު މަސައްކަތް ކޮށްފަ އެވެ. އެކަމަކު، އަދިވެސް އެންމެ ބޭނުންވާ ކުރީގެ ފޯމާ ހަމައަށް ވާސިލެއްނުވެވޭތީ އޭނާ ހުރީ ކަންބޮޑުވެފަ އެވެ.

"ޔޫއެސް އޯޕަން ޗެމްޕިއަންކަން އެ ފަހަރު ލިބިގެން ކޯޓު މަތީގައި ހުރިއިރު، އަހަރެން ހިތަށް އެރި އެ ވަގުތު ކޮޅަށްޓަކައި ދުނިޔޭގެ ކޮންމެ ކަމެއް ވެސް ކުރަން އަހަރެން ތައްޔާރޭ، އެހާ ވެސް އުފާވެރި އެ ވަގުތުތައް. އެކަމަކު، އެ ކާމިޔާބީތަކަށް ފަހު ދެން ހަޔާތުގައި މި އައި ބައެއް ކަންތައްތަކާ މި ޕްރެޝަރަށް ވިސްނާއިރު، ބައެއް ފަހަރު ހިތަށްއަރާ ޔޫއެސްއޯޕަން ކާމިޔާބު ނުކުރެވުނު ނަމައޭ،" އެމާ ބުންޏެވެ.

އެމާ ބުނީ ކޮންމެ ކަމެއް ވިޔަސް ޓެނިސް ކެރިއަރުގައި ޕްރޮފެޝަނަލް ވިސްނުމުގައި ކުރިއަށްދާން ތައްޔާރަށް ހުރި ކަމަށާއި ތަޖުރިބާ ހޯދަމުން އަންނަ ވަރަކަށް ކަންކަން ބަދަލުވަމުން އަންނާނެ ކަމަށެވެ.