ހުޅުމާލޭ މަގެއްގެ މަތީގައި ހުއްޓައި ގްރޫޕަކުން ފުލުހަކަށް ހަމަލާ ދިން މައްސަލައިގައި ހައްޔަރު ކުރި ހަތަރު މީހުން ބަންދުގެ މުއްދަތު ހުޅުމާލޭ ކޯޓުން ޖަހައިފި އެވެ.

ގަލޮޅު ޕޮލިސް ސްޓޭޝަނުގެ ފުލުހަކު ކުލަ ހެދުމުގައި ހުޅުމާލޭ މަގެއްގެ މަތީގައި ހުއްޓައި އޭނާއަށް ހަމަލާ ދިން މައްސަލައި ގައި ހައްޔަރުކޮށްފައި ވަނީ ހަތަރު މީހުންނެވެ. އެއީ އުމުރުން 21 އަހަރުގެ މީހަކާއި 33 އަހަރުގެ މީހަކާއި 42 އަހަރުގެ މީހަކާއި 44 އަހަރުގެ މީހެކެވެ.

ފުލުހުން މިއަދު ބުނި ގޮތުގައި، އެ މީހުންގެ ބަންދު މުއްދަތު ޖަހަން ހުޅުމާލޭ ކޯޓަށް ގެންދިޔުމުން 21 އަހަރުގެ މީހާގެ ބަންދަށް ވަނީ 15 ދުވަސް ޖަހައިފަ އެވެ. 42 އަހަރުގެ މީހާއާއި 44 އަހަރުގެ މީހާގެ ބަންދަށް ހަތް ދުވަސް ޖަހާފައިވާއިރު 33 އަހަރުގެ މީހާގެ ބަންދަށް ޖެހީ ފަސް ދުވަހެވެ.

އޭނާއަށް ލިބުނު ޒަހަމްތަކަށް ފަރުވާދިނުމަށް ހޮސްޕިޓަލަށް ގެންދިޔުމަށްފަހު ރޭގެ ވަގުތެއްގައި ވަނީ ދޫކޮށްލައިފަ އެވެ. އޭނާއަށް ލިބުނު ޒަހަމްތަކުގެ ތަފްސީލެއް އަދި ނޭނގެ އެވެ.

އެ ފުލުސް މީހާގެ ހިތްވަރަށް ތައުރީފުކޮށް ޕޮލިސް ކޮމިޝަނަރު މުހައްމަދު ހަމީދު ކުރެއްވި ޓްވީޓެއްގައި ވިދާޅުވެފައި ވަނީ އޭނާއަށް ހަމަލާ ދިނީ މާލޭގެ މަޝްހޫރު ގޭންގަކުން ކަމަށެވެ.

އެކަމަކު، އޭނާއަށް ހަމަލާ ދިން ސަބަބެއް މިހާތަނަށް އެނގިފައި ނުވެ އެވެ.