އެމްޑީޕީގެ ކެންޑިޑޭޓުންނާ ދެކޮޅަށް މަސައްކަތްކޮށްގެން ޕާޓީން ވަކިކުރަން ޖެހޭ ނަމަ އެންމެ ފުރަތަމަ ވަކިކުރަން ޖެހޭ ބޭފުޅަކީ ރައީސް އިބްރާހީމް މުހައްމަދު ސޯލިހު ކަމަށް އެ ޕާޓީގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.

"އަނެއްދިވެހިރާއްޖެ" އެކައުންޓުން ކުރެއްވި ޓްވީޓެއްގައި ނަޝީދު ވަނީ އެންމެ ފަހުން ބޭއްވި މަޖިލިސް އިންތިހާބުގައި ރައީސް އަންގަވައިގެން ޕާޓީގެ ބައެއް ކެންޑިޑޭޓުންނާ ދެކޮޅަށް ބައެއް މީހުން މަސައްކަތް ކުރެއްވި ކަމަށް ތުހުމަތު ކުރައްވައިފަ އެވެ.

"2019 ގައި ރައީސުލްޖުމްހޫރިއްޔާ އަންގަވައިގެން ދާއިރާ ރައީސުން ނުކުމެ އެމްޑީޕީ ކެންޑިޑޭޓުން ކަޓުވާލައި އެހެން ކެންޑިޑޭޓުން މަޖިލީހަށް ހޮވި މައްސަލަ ނުބަލައި ފިޔަވަޅު އަޅާ ކޮމިޓީން މިހާރު އެ ބަލާ މައްސަލަތައް ބެލުމަކީ އިންސާފުވެރި ކަމެއް ނޫން،" ނަޝީދު ލިޔުއްވާފައިވެ އެވެ. "ޕާޓީން ވަކިކުރަން ޖެހެނީ ރައީސް ސޯލިހު."

ބެލެވޭ ގޮތުގައި ނަޝީދު އިޝާރާތް ކުރެއްވީ އެމްޑީޕީގެ ކެންޑިޑޭޓާ ދެކޮޅަށް ވިލިނގިލި ދާއިރާގެ އިންތިހާބުގައި އޭރު އަމިއްލަ ގޮތުން ވާދަކުރެއްވި އަދި މިހާރު އެމްޑީޕީގައި ހުންނެވި ސައުދު ހުސައިނަށް އެ ޕާޓީގެ ބައެއް މީހުން ސަޕޯޓްކުރި ކަމަށް ދެކެވޭ ވާހަކައަށެވެ. އަދި ތިމަރަފުށި ދާއިރާގެ އިންތިހާބުގައި އެ ޕާޓީގެ ކެންޑިޑޭޓް މުހައްމަދު މުސްތަފާގެ ބަދަލުގައި ޖުމްހޫރީ ޕާޓީން ވާދަކުރެއްވި އަދި މިހާރު އެމްއެންޕީގައި ހުންނެވި އަބްދުﷲ ރިޔާޒަށް ތާއީދުކޮށް ކެމްޕޭންކުރި ކަމަށް ދެކެވޭ ވާހަކައަށެވެ.

މި އަހަރުގެ ޖެނުއަރީ މަހު ބޭއްވި އެމްޑީޕީގެ ރިޔާސީ ޕްރައިމަރީން ނަޝީދު ބަލިވި ފަހުން މަސައްކަތް ކުރައްވަނީ "ފިކުރެއްގެ ދިރުން" ނަމުގައި ވަކި ފެކްޝަނެއް ޕާޓީ ތެރެއިން އުފައްދަވައިގެންނެވެ. އަދި ޕްރައިމަރީ ކާމިޔާބުކުރައްވައިގެން ރިޔާސީ ޓިކެޓު އަރުވާފައިވާ ރައީސް ސޯލިހަށް ތާއީދު ކުރުމުގެ ބަދަލުގައި އެމަނިކުފާނާ ދެކޮޅަށް އެ ފެކްޝަނުން ދަނީ މަސައްކަތް ކުރަމުންނެވެ.

ފޯޅަވައްސާއި އައްޑޫއާ ދެމެދު ފުށުއަރާ ކަނޑުގެ ސަރަހައްދުގެ އިން ވަކިކުރި މައްސަލާގައި، ކަނޑުގެ ޓްރަބިއުނަލް ކަމަށްވާ އިޓްލޮސްގައި ދިވެހި ސަރުކާރުން ގެންގުޅުނު ސްޓޭންޑާ ދެކޮޅަށް މަސައްކަތް ކުރުމަށް އުފައްދާފައިވާ އިދިކޮޅު ސިޔާސީ ޕާޓީތަކުގެ ކޯލިޝަނުގައި އެމްޑީޕީގެ އެ ފެކްޝަން ބައިވެރިވެ އެވެ.

އެ ކޯލިޝަނުން މަޖިލީހަށް ހުށަހަޅާފައިވާ އެޓާނީ ޖެނެރަލް އިބްރާހިމް ރިފްއަތުގެ އިތުބާރު ނެތް ކަމުގެ މައްސަލާގައި "ފިކުރެއްގެ ދިރުން" ފެކްޝަންގެ ފަރާތުން މެދު ހެންވޭރު ދާއިރާގެ މެންބަރު އަލީ އާޒިމް ސޮއިކުރައްވާފައިވާތީ އޭނާ ޕާޓީން ވަކިވެފައިވާ ކަމަށް އެމްޑީޕީގެ ފިޔަވަޅު އަޅާ ކޮމިޓީން ވަނީ ނިންމައިފަ އެވެ.

އޭގެ އިތުރުން ވެސް ނަޝީދުގެ ފެކްޝަނަށް ތާއީދުކުރައްވާ ރައްޔިތުންގެ މަޖިލީހުގެ ބައެއް މެމްބަރުންނަށް ފިޔަވަޅު އެޅުމަށް ރައީސް ސޯލިހަށް ތާއީދުކުރާ ޕާޓީގެ މެމްބަރުން ވެސް ދަނީ ގޮވާލަމުންނެވެ. އެމްޑީޕީގެ 68 މެމްބަރުން މަޖިލީހުގައި ތިއްބަވާއިރު ވާދަވެރި ފެކްޝަނުގައި ނަޝީދު ހިމެނޭހެން ގާތްގަނޑަކަށް 15 މެމްބަރުން ތިއްބަވަ އެވެ.