އައިއެޗްއެފް ޓްރޮފީގައި އިއްޔެ ކުޅުނު މެޗުގައި އިންޑިއާ އަތުން ރާއްޖޭގެ ގައުމީ ޔޫތު އަދި ޖޫނިއާ އަންހެން ހޭންޑްބޯޅަ ޓީމު ބަލިވެއްޖެ އެވެ.

ބަންގްލަދޭޝްގެ ވެރިރަށް ޑާކާގައި ކުރިއަށްދާ އައިއެޗްއެފް އޭޝިއާ ބައްރުގެ ދެ ވަނަ ފަންތީގެ ޖޫނިއާ މުބާރާތުގައި ވާދަކުރަނީ ހަތަރު ގައުމަކުންނެވެ. އެއީ ރާއްޖެ، އިންޑިއާ، ނޭޕާލް އަދި ބަންގްލަދޭޝް އެވެ.

މުބާރާތުގައި ދިވެހި ޒުވާން އަންހެން ދެ ޓީމުން ކުޅުނު ދެ ވަނަ މެޗުގައި ނުކުތީ އިންޑިއާއާ ދެކޮޅަށެވެ. ސަތާރަ އަހަރުން ދަށުގެ ޔޫތު ޓީމު އިންޑިއާގެ ޔޫތު ޓީމު އަތުން ބަލިވީ 14-42 އިންނެވެ. ސާކް ސަރަހައްދުގެ ވަރުގަދަ ޓީމެއްގެ ގޮތުގައި ފާހަގަވެފައި އޮތް އިންޑިއާ ގެ ޖޫނިއާ ޓީމު ރާއްޖޭގެ 19 އަހަރުން ދަށުގެ ޖޫނިއާ ޓީމް އަތުން މޮޅުވީ 09-52 އިންނެވެ.

މުބާރާތުގައި ރާއްޖޭގެ ޒުވާން ދެ ޓީމް ކުޅުނު ފުރަތަމަ މެޗުން ވެސް ވަނީ ބަލިވެފަ އެވެ. ފުރަތަމަ މެޗުގައި ބަންގްލަދޭޝްގެ ޔޫތު ޓީމު އަތުން ރާއްޖޭގެ ޔޫތު ޓީމު ބަލިވީ 10-48 އިންނެވެ. އަދި 19 އަހަރުން ދަށުގެ ޓީމް ބަލިވީ 21-38 އިންނެވެ.

ލީގު ބުރުގެ ފަހު މެޗުގައި ރާއްޖޭން މިއަދު ނޭޕާލްއާ ދެކޮޅަށް ނުކުންނާނެ އެވެ. މި މެޗުން ކޮންމެ ނަތީޖާއެއް ނިކުތް ކަމުގައިވިޔަސް މުބާރާތުގެ ތިން ވަނަ ހޮވާ މެޗުގައި ރާއްޖެ ކުޅެން ޖެހޭނެ އެވެ.

އަންނަ ބުދަ ދުވަހާ ހަމައަށް ކުރިއަށްދާ އައިއެޗްއެފް ޓްރޮފީއަކީ ރާއްޖޭގެ ޒުވާން އަންހެން ގައުމީ ޓީމު ބައިނަލްއަގްވާމީ ލެވެލްގައި ވާދަކުރާ ފުރަތަމަ މުބާރާތެވެ.

މީގެ ކުރިން ޕާކިސްތާންގައި އޮތް އައިއެޗްއެފް ޓްރޮފީ މުބާރާތެއްގައި ރާއްޖޭގެ ފިރިހެން ޓީމެއް ވާދަކުރި އެވެ. އެ ފަހަރު އެ ޓީމުން ރަނގަޅު ކާމިޔާބެއް ހޯދި އެވެ. އެ ޓީމުގައި ހިމެނުނު ގިނަ ކުޅުންތެރިންނަކީ މިހާރު ގައުމީ ސީނިއާ ޓީމުގެ ކުޅުންތެރިންނެވެ.

ހޭންޑްބޯލް މޯލްޑިވްސްގެ އަމާޒަކީ ގައުމީ އަންހެން ޔޫތު އަދި ޖޫނިއާ ޓީމްގެ ޕްރެކްޓިސްތައް ވެސް ހުއްޓާނުލައި ކުރިއަށް ގެންގޮސް ދިގު ރާސްތާ ޕްލޭނަކާ އެކު ގައުމީ ސީނިއާ އަންހެން ޓީމަށް ރަނގަޅު ކުޅުންތެރިންތަކެއް ސަޕްލައިކޮށްދިނުމެވެ.