އިސްލާމްއާބާދް، ޕާކިސްތާން (މޭ 11) - މީގެ ދެ ދުވަސް ކުރިން ކޯޓަށް ހާޒިރުވުމުން ހައްޔަރު ކުރި ޕާކިސްތާނުގެ ކުރީގެ ބޮޑުވަޒީރު އިމްރާން ހާން ހައްޔަރުކުރީ ގާނޫނަށް ހިލާފަށް ކަމަށް ނިންމައި އެމަނިކުފާނު ވަގުތުން މިނިވަން ކުރުމަށް އެ ގައުމުގެ ސުޕްރީމް ކޯޓުން އަމުރުކޮށްފި އެވެ.

މިދިޔަ އަހަރު ބޮޑު ވަޒީރުކަމުން ބޭރުކޮށްލި ފަހުން އިމްރާން ހާންއާ ދެކޮޅަށް ގިނަ މައްސަލަތަކެއް ކޯޓުގައި ދަނީ ކުރިއަށެވެ. އެއީ ސިޔާސީ މަގުސަދެއްގައި ހިންގާ މައްސަލަތަކެއް ކަމަށް އިމްރާން ހާން ތުހުމަތު ކުރައްވަ އެވެ.

އެމަނިކުފާނު ހައްޔަރުކުރުމާ ގުޅިގެން އެގައުމުގައި ދަނީ ބޮޑެތި ހަމަނުޖެހުންތަކެއް ހިނގަމުންނެވެ. މި ހަމަނުޖެހުންތަކުގައި 10 މީހުން މަރުވެ 2,000 އަށްވުރެ ގިނަ މީހުން ވަނީ ހައްޔަރުކޮށްފަ އެވެ.

ޕާކިސްތާނުގެ ސިފައިންގެ އިސްވެރިޔަކު އިމްރާން ހާން އަވަހާރަކޮށްލަން ރޭވި ކަމަށް އެމަނިކުފާނު ތުހުމަތު ކުރެއްވުމުން، މިދިޔަ ހޯމަ ދުވަަހު ސިފައިން ވަނީ "އަސާސެއް ނެތް" ތުހުމަތު ކުރުމާ ދެކޮޅަށް އިންޒާރު ދީފަ އެވެ.

މީގެ ކުރިން ސިފައިންގެ ތާއީދު ލިބި 2018 ގައި ވެރިކަމާ ހަމައަށް އިމްރާން ހާން ވަޑައިގެންނެވީ ސިފައިންގެ އިސްވެރިންގެ އެއްބާރުލުމާ އެކު އެވެ. އެހެން ނަމަވެސް، މިދިޔަ އަހަރު ޕާލަމެންޓުން ނެގި އިތުބާރު ނެތްކަމުގެ ވޯޓާ ދިމާކޮށް ސިފައިން އިމްރާން ހާނަށް ތާއީދުކުރުން ހުއްޓާލި އެވެ.

ޕާކިސްތާނަށް ކުރިމަތިވެފައިވާ އިގުތިސާދީ އަދި ސިޔާސީ ކާރިސާގެ ތެރެއިން އިމްރާން ހާން ސަރުކާރަށް ޕްރެޝަރު ކުރައްވަނީ އަވަހަށް އިންތިހާބު ބޭއްވުމަށެވެ.