ސަރުކާރުގެ ވުޒާރާތަކުގައި މަސައްކަތްކުރާ ސިވިލް ސާވަންޓުންގެ ތެރެއިން 35 ޕަސެންޓު އެލަވެންސް ނުލިބޭ މުވައްޒަފުންނަށް އެ އެލަވަންސް ދޭން ފެށުމަކީ ރާއްޖޭގެ ތާރީހުގައި ވެސް ނިސްބަތުން ސިވިލް ސާވިސް މުވައްޒަފުންގެ މުސާރައަށް އަންނާނެ އެންމެ ބޮޑު ބަދަލު ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.

މިއަދަކީ ބައިނަލްއަގްވާމީ ގޮތުން ފާހަގަކުރާ މަސައްކަތްތެރިންގެ ދުވަހެވެ. އެ ދުވަހުގެ ތަހުނިޔާ ފޮނުއްވަމުން ދެއްވި ހިތާބުގައި ރައީސް ވަނީ މަސައްކަތްތެރިންގެ ހައްގުގައި ސަރުކާރުން މިއަދު ތަންފީޒު ކުރަމުން އަންނަ އެންމެ މުހިންމު ސިޔާސަތަކީ، ދައުލަތުގެ ތަފާތު ދާއިރާތަކުގައި ވަޒީފާ އަދާކުރާ މުވައްޒަފުންގެ މުސާރައަށް އެކަށީގެންވާ ހެޔޮ ބަދަލެއް ގެނައުން ކަމަށް ވިދާޅުވެފަ އެވެ.

ރައީސް ވަނީ އިއްޔެ ސިއްހީ ދާއިރާ ހިމެނޭހެން 9,838 މުވައްޒަފުންގެ މުސާރަ ބޮޑުކޮށް އެކަން އިއުލާނު ކުރައްވާފަ އެވެ. ސިވިލް ސާވަންޓުންގެ ތެރެއިން 35 ޕަސެންޓު އެލަވަންސް މިހާތަނަށް ޔޫތު މިނިސްޓްރީ, އިސްލާމިކް މިނިސްޓްރީ, އާޓްސް މިނިސްޓްރީ އަދި ހަޔާ އެޑިއުކޭޝަން މިނިސްޓްރީގެ މުވައްޒަފުންނަށް ލިބިފައި ނުވެ އެވެ.

"ސަރުކާރުގެ މުސާރަތަކަށް މި ގެންނަ ހެޔޮ ބަދަލުތަކަކީ، އެންމެ އެކަށީގެންވާ ބަދަލުތައް ކަމަށް ނުވިޔަސް، މިއީ ރާއްޖޭގެ ތާރީހުގައި ވެސް ސިވިލް ސަރވިސްގެ މުސާރަތަކަށް، ނިސްބަތުން މިހާ ބޮޑު ބަދަލެއް އަންނަ ފުރަތަމަ ފަހަރު," މިއަދު ދެއްވި ހިތާބުގައި ރައީސް ވިދާޅުވި އެވެ.

ރައީސް އިއްޔެ އިއުލާނު ކުރެއްވި މި ބަދަލާ އެކު އެ މިނިސްޓްރީތަކުގައި މަސައްކަތްކުރާ 1,367 މުވައްޒަފުންނަށް މި އެލަވަންސް ދިނުމަށް މަހަކު 2.658 މިލިއަން ރުފިޔާ ހޭދަކުރާނެ އެވެ. އަދި, އަހަރެއްގެ މައްޗަށް އެކަމަށް 31.9 މިލިއަން ރުފިޔާ ހޭދަވާނެ އެވެ.

ސަރުކާރުން ފަށާފައިވާ ޕޭ ހާމަނައިޒޭޝަންގެ މަސައްކަތަކީ، މުވައްޒަފުން ކުރާ މަސައްކަތާ އެކަށޭނަ މިންވަރަށް އުޖޫރަ ކަނޑައެޅުމަށާއި، މުވައްޒަފުންގެ މެދުގައި ހުރި އުޖޫރައިގެ ތަފާތުތައް ނައްތައިލުމަށް ކުރަމުން އަންނަ ވަރަށް މުހިންމު މަސައްކަތެއް ކަމަށް ވެސް އެމަނިކުފާނުގެ ހިތާބުގައި ވިދާޅުވި އެވެ.

އަދި, އެމަނިކުފާނުގެ ދައުރުގައި މަސައްކަތްތެރިންގެ ހައްގުގައި ފިޔަވަޅުތަކެއް އަޅާފައިވާކަން ފާހަގަކުރެއްވި އެވެ. އެގޮތުން, ވިހެއުމާ ގުޅިގެން ދޭ ހަ މަސް ދުވަހުގެ މެޓާނިޓީ ލީވް އާއި އެއް މަސް ދުވަހަކު ޕެޓާނިޓީ ލިީވް ފާހަގަކުރެއްވި އެވެ.

"މުވައްޒަފުންނަށް އެންމެ ކުޑަމިނުން ދެވޭނެ އުޖޫރަ ނުވަތަ މިނިމަމް ވޭޖް އަޅުގަނޑުމެން ކަނޑައެޅީ 2021 ވަނަ އަހަރުގެ ނޮވެންބަރު މަހުގެ ތެރޭގަ އެވެ. އަދި ސާވިސް ޗާޖްގެ ފައިދާ، މުވައްޒަފުންނަށް ހަމަހަމައަށް ލިބިދެވޭނެ ގޮތަށް ޤާނޫނަށް ވާނީ އެ ބަދަލު ގެނެސްފައި," ރައީސް ވިދާޅުވި އެވެ.

މަސައްކަތްތެރިންގެ ހައްގުތައް ފުރިހަމައަށް ލިބިދިނުމަށް ސަރުކާރުން މަސައްކަތް ކުރަމުން މި އަންނަނީ، ނަސްލީ ތަފާތެއް އަދި މިންތީ ތަފާތެއް ނެތި، ވަރަށް އިންސާފުވެރި ސިޔާސަތެއްގެ ދަށުން ކަމަށް ރައީސް ވިދާޅުވި އެވެ. އަދި, ހުރިހާ މަސައްކަތްތެރިންގެ އިންސާނީ ކަރާމާތާއި ހައްގުތައް ރައްކާތެރި ކުރުމަށް ޕްރައިވެޓު ސެކްޓަރަށް ވެސް އިލްތިމާސް ކުރެއްވި އެވެ.

"ވަޒީފާ އަދާކުރާ އެންމެހައި މަސައްކަތްތެރިންގެ މެދުގައި ހަމަހަމަކަން ގާއިމުކޮށް، އެ މީހުންގެ އިންސާނީ ހައްގުތަކަށް ފުރިހަމައަށް ހުރުމަތްތެރިކޮށް ހިތައި، އެ ހައްގުތައް ފުރިހަމައަށް ލިބިދިނުމަށް ހާއްސަ ސަމާލުކަމެއް ދިނުމަށް ވެސް މި ފުރުސަތުގައި އަޅުގަނޑު ގޮވައިލަން," ރައީސް ވިދާޅުވެފައިވެ އެވެ.