މަސައްކަތުގެ ބުރަމިން ކުޑަކޮށްދީ އަބުރުވެރި، އަދި މަސައްކަތްތެރިންގެ އާއިލީ ޒިންމާތައް އުފުލޭ ގޮތަކަށް އެކުވެރި މަސައްކަތު މާހައުލެއް ވަޒީފާ އަދާ ކުރާ ތަންތަނުގައި ގާއިމު ކުރުމަށް ގޮވާލައި އަޑު އުފުލައިފި އެވެ.
މަސައްކަތްތެރިންގެ ދުވަސް، މޭޑޭގެ މުނާސަބަތުގައި މިއަދު ކުރިއަށް ދިޔަ ރެލީއަކީ އެކި ސިނާއަތްތަކުގައި މަސައްކަތްކުރާ މަސައްކަތްތެރިން ތަމްސީލްކުރާ ހަ މަދަނީ ޖަމިއްޔާއެއް ހިމެނޭ ގޮތަށް، މޯލްޑިވްސް ޓްރޭޑް ޔޫނިއަން ކޮންގުރެސް (އެމްޓީޔޫސީ) އިން އިސްވެ ބޭއްވި ރެލީއެކެވެ.
މަސައްކަތްތެރިންގެ ދުވަސް (މޭ ޑޭ) ގެ މުނާސަބަތުގައި ކުރިއަށްދާ ރެލީގައި މަސައްކަތްތެރިން ހައްގުތަކަށް އަޑު އުފުލަނީ - ފޮޓޯ: މިރާން ނާޝިމް / އަދަދު
މާލޭގެ އެންމެ އިރުމަތި، ރަސްފަންނުން ފެށި ރެލީގެ ބައިވެރިން މައިގަނޑު ގޮތެއްގައި އަޑުއުފުލީ މަސައްކަތުގެ ވަގުތުގެ ބުރަކަން ކުޑަކޮށްދިނުމަށެވެ. އަދި މަސައްކަތްތެރިންގެ މަސައްކަތު ހަޔާތާއި ޒާތީ ހަޔާތަށް ދެވޭ ވަގުތުގެ ހަމަހަމަ ދިރިއުޅުމެއް ހޯދައިދިނުމަށެވެ.
މަސައްކަތްތެރިންގެ ދުވަސް (މޭ ޑޭ) ގެ މުނާސަބަތުގައި ކުރިއަށްދާ ރެލީގައި މަސައްކަތްތެރިން ހައްގުތަކަށް އަޑު އުފުލަނީ - ފޮޓޯ: މިރާން ނާޝިމް / އަދަދު
މަސައްކަތުގެ މާހައުލަކީ، މަސައްކަތްތެރިންނަށް އެކުވެރި މާހައުލެއް ގޮތުގައި ބޭއްވުމަށާއި މަސައްކަތްތެރިންގެ ރައްކާތެރިކަމާއި ސިއްހީ ދުޅަހެޔޮ ކަން ރަނގަޅު ފެންވަރެއްގައި ބެހެއްޓުމަށް ލާޒިމުކޮށްދޭ ގާނޫނުތަކާއި އުސޫލުތައް ގެނެސްދިނުމަށް ވެސް މި ފަހަރުގެ ރެލީގައި އަޑު އުފުލާފައިވެ އެވެ.
މަސައްކަތް ފޯރުކޮށްދޭ ފަރާތް ނުވަތަ ވިޔަފާރިއަށް ބޭނުންވާ މަސައްކަތްތައް ފުރިހަމަ ކުރުމަށް މަދު މުވައްޒަފުން ބޭނުން ނުކުރުމަށާއި މުވައްޒަފުންގެ އެކަށޭނަ އަދަދަކަށް ވަޒީފާ ދީގެން ވިޔަފާރިތައް ހިންގުމަށް ގޮވާލައި ވެސް މަސައްކަތްތެރިން އަޑު އުފުލާފައިވެ އެވެ.
