ޕްލާސްޓިކް ކޮތަޅުން ފީ ނެގުމުގެ ކަންތައް ގާނޫނުގައި މިހާރު އޮތީ އެ ގާނޫނު ހަދަން ސަރުކާރުން ރައްޔިތުންގެ މަޖިލީހަށް ބިލު ހުށަހެޅި އިރު އޮތް މަގުސަދާ އެއްގޮތަށް ނޫން ކަމަށް އެންވަޔަރްމެންޓް މިނިސްޓަރު އާމިނަތު ޝައުނާ މިއަދު ވިދާޅުވެއްޖެ އެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި ވަޒީރުންނާ ސުވާލުކުރުމުގެ ވަގުތުގައި މެމްބަރަކު ކުރެއްވި ސުވާލަކަށް ޖަވާބުދެއްވަމުން މިނިސްޓަރު ވިދާޅުވީ ޕްލާސްޓިކް ކޮތަޅުން ފީ ނެގުމުގައި ސަރުކާރުން ހުށަހެޅި އިސްތިސްނާ މަޖިލީހުން ބިލު ފާސްްކުރި އިރު، އޭގެ ސަބަބެއް ވެސް ސާފުކޮށް ބުނެފައި ނެތް ކަމަށެވެ.

އޭނާ ވިދާޅުވި ގޮތުގައި ގާނޫނު މިހާރު އޮތް ގޮތުގައި މައްސަލައަަކީ ކޮންމެ މަރުހަލާއެއްގައި ކޮތަޅަކުން ދެ ރުފިޔާ ނެގުމެވެ.

"މައްސަލައަކީ ޕްލާސްޓިކް ކޮތަޅުން ދެ ރުފިޔާ ނެގުމެއް ނޫން. މައްސަަލައަކީ ކޮންމެ މަރުހަލާއެއްގައި ކޮންމެ ޕްލާސްޓިކް ކޮތަޅަކުން ދެ ރުފިޔާ ނެގުން. ރައްޔިތުންނަށް ނޫފުލޭ ވަރުގެ ތަކުލީފަކަށް މިކަން ވުމަކީ އަޅުގަނޑު އެދޭ ކަމެއް ނޫން," ޝައުނާ ވިދާޅުވި އެވެ.

އޭނާ ވިދާޅުވި ގޮތުގައި ޕްލާސްޓިކް ކޮތަޅުން ނަގާ ފީ އިސްތިސްނާ ވާނެ ހާލަތްތަކެއް، ސަރުކާރުން މަޖިލީހަށް ފުރަތަމަ ހުށަހެޅި އިރު ހިމަނާފައިވާނެ އެވެ. އެފަދަ އެއް އިސްތިސްނާއަކީ ހޯލްސޭލްކޮށް، 50 ނުވަތަ 50 އަށް ވުރެ ގިނަ ކޮތަޅު ގަންނަ ހާލަތެވެ. ކާޑުގެ ބާވަތްތައް ގަންނަ ހާލަތަކީ ވެސް އޭނާ ވިދާޅުވި ގޮތުގައި ފީ ނެގުން އިސްތިސްނާ ވާނެ ހާލަތެއްގެ ގޮތުގައި، ސަރުކާރުން ބިލުގައި ހިމެނި އެވެ.

ޝައުނާގެ ވާހަކަ އެހިސާބަށް ގެންދެވުމުން، ރިޔާސަތުގައި އިންނެވި މަޖިލީހުގެ ރައީސް މުހައްމަދު ނަޝީދު ވިދާޅުވީ ސަރުކާރުން ހުށަހެޅި އެ އިސްތިސްނާތައް ކޮމިޓީން ބިލު ފާސްކުރި އިރު އުނިކުރީ ސަރުކާރުން ވެސް އެކަމަށް ވާގި ދީގެން ކަމަށް ކޮމިޓީގެ ޔައުމިއްޔާއިން އެނގޭ ކަމަށެވެ.

"އަަޅުގަނޑު ކިޔައިފިން ކޮމިޓީގެ ޔައުމިއްޔާތައް. އަޅުގަނޑު ކިޔައިފިން ކޮމިޓީގެ ރިޕޯޓުވެސް. އެހެން ނަމަވެސް މި މާއްދާ، ވަކިން ހާއްސަކޮށް އިސްތިސްނާވާ ހާލަތްތައް، ފަންސާސް ކޮތަޅާއި ނުވަތަ އެެއަށް ވުރެ ގިނައިން ހިމެނޭ ކޮތަޅުބޮނޑި އިސްތިސްނާވާ ހާލަތްތައް އުނިކުރި ޖަސްޓިފިކޭޝަނެއް އަޅުގަނޑަކަށް ނުފެނުނު،" ޝައުނާ ވިދާޅުވި އެވެ.

ޝައުނާގެ އެވާހަކައާ ވެސް ނަޝީދު ދެކޮޅު ހެއްދެވި އެވެ. އެމަނިކުފާނު ވިދާޅުވީ އެ އިސްތިސްނާތައް އުނިކުރި ސަބަބު ކޮމިޓީ ރިޕޯޓުގައި ވަރަށް ދިގުކޮށް ލިޔެފައި އެބަ އޮތް ކަމަށެވެ.

ކޮތަޅުން ފީ ނެގުމުގައި ސަރުކާރުން ހުށަހެޅި އިސްތިސްނާތައް އޮތުމަކީ ވަރަށް މުހިއްމު ކަމެއް ކަަމަށް ވިދާޅުވެ، ގާނޫނު އެގޮތަށް އިސްލާހުކޮށްދެއްވަން މިނިސްޓަރު އެދިވަޑައިގެންނެވި އެވެ.

"ހއ. ފިއްލަދޫގައި ހުންނަ މީހާ ކަންމަތީ ފިހާރައިން ހަކުރު ކިލޯއެއް ހަތަރު ރުފިޔާ ބަޔަށް ގަތީމާ އިތުރަށް، ކޮތަޅަށް ހަ ރުފިޔާ ދެއްކީމާ މިއީ ބޮޑު މައްސަލައެއް، މިކަން ހައްލުކުރުމަށް އަޅުގަނޑުމެން މި އެދެނީ މިއަދު،" ޝައުނާ ވިދާޅުވި އެވެ.

އެހެން ނަމަވެސް ފީ ނަގާ މިންވަރު ކުޑަކުރަން އެދިވަޑައިނުގަންނަވާ ކަމަށާއި ގެންނަން ޖެހޭ ބަދަލަކީ ކޮންމެ މަރުހަލާއެއްގައި ފީ ނުނަގާ ގޮތަށް ހެދުން ކަމަށް ވެސް އޭނާ ވިދާޅުވި އެވެ.