މިއަދު މާލޭގައި ފެށި މޯލްޑިވްސް އޯޕަން 10 ބޯލް ބިލިއާޑް މުބާރާތުގައި ރާއްޖޭގެ ހުސައިން ފަޔާޒް ކުޅުނު ފުރަތަމަ މެޗު ކާމިޔާބުކޮށް ތާރީޚީ މޮޅެއް ހޯދައިފި އެވެ.

ދިވެހި ރާއްޖޭގައި ފުރަތަމަ ފަހަރަށް ބާއްވާ ބައިނަލްއަގްވާމީ ބިލިއާޑް މުބާރާތުގައި ދުނިޔޭގެ މަޝްހޫރު ގިނަ ކުޅުންތެރިން އަންނަނީ ވާދަކުރަމުންނެވެ. އޭގެ ތެރޭގައި މިވަގުތު ދުނިޔޭގެ ގަދަ 10 ގައި ހިމެނޭ ކުޅުންތެރިންވެސް ހިމެނެ އެވެ. ދިވެހިރާއްޖެއިން 16 ކުޅުންތެރިއަކު މި މުބާރާތުގައި ވާދަކުރެ އެވެ.

ގްރޫޕް ސްޓޭޖުގެ މެޗުތަކާއިއެކު މިއަދު ހެނދުނު ކުޅުން ފެށިއިރު ރާއްޖޭގެ ހުސައިން ފަަޔާޒު ވަނީ ކުޅުނު ފުރަތަމަ މެޗު ކާމިޔާބުކޮށްފަ އެވެ. މިއީ އަމިއްލަ ގައުމުގައި ބާއްވާ ބައިނަލްއަގްވާމީ މުބާރާތުގައި ދިވެހި ކުޅުންތެރިއަކު ހޯދި ފުރަޔަމަ މޮޅެވެ.

ފަޔާޒް މޮޅުވީ ގްރީސްގެ ޗެމްޕިއަން ނިކޮލަސް މަލާއީ އާ ވާދަކޮށް 7-6 ފްރާމުންނެވެ. ރޭސް ޓު 7 އަށް ކުޅޭ ގްރޫޕް ސްޓޭޖު މެޗު ފަށައިގެން ފަޔާޒު 5-1 އިން ބޮޑު ލީޑެއް ނެގި އެވެ. ނަމަވެސް ނިކޮލަސް ވަނީ މަޑު މަޑުން ގޭމުގެ ތެރެއަށް ވަދެ ފަހަތުން އަރާ 5-6 އިން ލީޑު ނަގާފަ އެވެ. ޖެހިގެން އައި ފްރޭމުގައި ނިކޮލަސް އަށް ހެދުނު ގޯހެއްގެ ފައިދާ ނަގައި ސްކޯ އެއްވަރުކޮށްފަ އެވެ. ދެ ކުޅުންތެރިންވެސް ޕްރެޝަރުގައި ކުޅުނު ފަހު ފްރޭމް ފަޔާޒު ކާމިޔާބުކުރީ ނިކޮލަސް އަށް ނިންމާލަން ލިބުނު ފުރުސަތު އޭނާ ނަގާލުމުންނެވެ.

ގްރޫޕް ސްޓޭޖުގެ ދެވަނަ މެޗުގައި ފަޔާ ނިކުތީ އިންޑޮނީޝިއާގެ ބިލީ ރޮބިއަންސިޔާ އާ ދެކޮޅަށެވެ. މި މެޗުން ފަޔާ ބަލިވީ 3-7 ފްރޭމުންނެވެ. މި މެޗުން ބަލިވި ނަމަވެސް ގަދަ 32 ކުޅުންތެރިންގެ ތެރޭގައި ހިމެނުމުގެ ފުރުސަތު ފަޔާ އަކަށް ނުގެއްލޭނެ އެވެ. މިރޭ ކުޅޭ ގްރޫޕް ސްޓޭޖުގެ ފަހު މެޗުން މޮޅުވެ ނޮކްއައުޓް ބުރަށް ދިޔުމުގެ ފުރުސަތު ފަޔާ އަށް އެބައޮތެވެ.

ޑަބަލް އެލިމިނޭޝަން އުސޫލުން ކުޅޭ ގްރޫޕް ސްޓޭޖުގެ މެޗުތަކުގައި މިއަދު ހެނދުނު ރާއްޖޭގެ އިތުރު ތިން ކުޅުންތެރިން ވާދަކުރި އެވެ. ހަސަން ޝަފްރާޒް، އައްބާސް ސައީދު އަދި ހަސަން އުސްވަތުﷲވެސް ވާދަކުރި އެވެ. ތިން ކުޅުންތެރިންވެސް ކުޅުނު ދެ މެޗުން ބަލިވެ ވަނީ މުބާރާތުން ކަޓާފަ އެވެ.

މޯލްޑިވްސް އޯޕަންގައި މިއަދު ހަސަން އުސްވަތުﷲ ކުޅުނު މެޗެއްގެ ތެރެއިން / ފޮޓޯ: އެމްޕީބީއޭ

ޝަފްރާޒް ކުޅުނު ފުރަތަމަ މެޗުގައި ވިއެޓްނާމްގެ ގުޔެން އާން ޓުއަން އަތުން 2-7 އިން ބަލިވިއިރު، ދެވަނަ މެޗުގައި ބަލިވީ ޕޮލަންޑްގެ ވިކްޓާ ޒީލެންސްކީ އަތުން 1-7 ފްރާމުންނެވެ.

އައްބާސް ކުޅުނު ފުރަތަމަ މެޗުގައި ވިއެޓްނާމްގެ ޑޫ ކުޔެން އަތުން 5-7 ފްރޭމުން ބަލިވިއިރު، ދެވަނަ މެޗުގައި ބަލިވީ ފިލިޕީންސްގެ ޖޯން ވިންސެންޓް އަތުން 1-7 އިންނެވެ.

ގްރޫޕް ޑީގައި ހިމެނުނު ރާއްޖޭގެ އުސްވަތުﷲ ކުޅުނު ފުރަތަމަ މެޗުގައި ނިކުތީ ޗައިނީސް ތައިޕޭގެ ކޯ ޕިން ހާން އާ ދެކޮޅަށެވެ. މި މެޗުން އުސްވަތުﷲ ބަލިވީ 3-7 ފްރޭމުންނެވެ. ދެވަނަ މެޗުގައި އޭނާ ބަލިވީ މެލޭޝިއާގެ ޓޭން ޑޭން ޖީ އަތުން 4-7 ފްރޭމުންނެވެ.

މުބާރާތުގައި މިއަދު މެންދުރާއި ހަވީރު ކުޅޭނީ ގްރޫޕް އީ، އެފް، ޖީ، އެޗްގެ މެޗުތަކެވެ. ފުރަތަމަ އަށް ގްރޫޕުގެ ގްރޫޕް ސްޓޭޖު ފަހު މެޗު ކުޅޭނީ މިރޭ އަށެއް ޖާހާއިރު އެވެ.