މޯލްޑިވްސް ޕޫލް ބިލިއާޑް އެސޯސިއޭޝަން (އެމްޕީބީއޭ)، 10 ބޯލް ޗެމްޕިއަންޝިޕްގެ ޗެމްޕިއަންކަން ހުސެއިން ފަޔާޒް އާއި ދީނާ އަހުމަދު ހޯދައިފި އެވެ.

މި ފަހަރުގެ މުބާރާތުގެ ފިރިހެން ޑިވިޝަނުގެ ފައިނަލުގައި ފަޔާޒް ބައްދަލުކުރީ އިސްމާއިލް ސުވައިދުއާ އެވެ. ފައިނަލް މެޗުން ސުވައިދުގެ މައްޗަށް ފަޔާޒް ކުރިހޯދީ 11-10 ފްރޭމުންނެވެ. ފޯރިގަދަ ކުޅުމެއް ފެނިގެންދިޔަ މި މެޗުގައި، ފަޔާޒް ކުރިހޯދާފައި މި ވަނީ ހަނި ފަރަގަކުންނެވެ. މުބާރާތުގެ އެންމެ ގިނަ ރަން އައުޓް (9) ހެދީ ވެސް ޗެމްޕިއަންކަން ހޯދި ފަޔާޒް އެވެ.

ފިރިހެން ޑިވިޝަނުގެ ރޭންކިން އަށް ބަލާއިރު، ގަދަ ދޭއްގައި ހިމެނެނީ، ފަޔާޒް އާއި ސުވައިދު އެވެ. ދެން، ތިބި ކުޅުންތެރިންގެ ރޭންކިން ތަރުތީބުކޮށްފައިވާ ގޮތުން، ގަދަ އަށެއްގައި ދެން ހިމެނެނީ، މުހައްމަދު ސާހިލް ހަމީދު، އަހުސަން ހާޝިމް، ހަސަން ޝާޒް މުހައްމަދު، ފަތުހުﷲ ޖަމީލް، އަލީ ފަޔާޒް އަދި މޫސާ ޝާމިއު އެވެ.

އަންހެން ޑިވިޝަނުގެ ޗެމްޕިއަންކަން، ދީނާ ހޯދީ ފައިނަލުގައި، އައިޝަތު އަލީ އަތުން 7-2 ފްރޭމުން މޮޅުވެގެންނެވެ. ދީނާ ވަނީ ފައިނަލް މެޗުގައި އެކްސްޕީރިއަންސްގެ ބޭނުންކޮށް، ރަނގަޅު މޮޅެއް ހޯދައިފަ އެވެ.

އަންހެން ޑިވިޝަނުގެ ރޭންކިން އަަށް ބަލާއިރު، ތިން ވަނަ އަށް ދިޔައީ، ފަގީހާ އިބްރާހިމް އެވެ. އަދި މިދިޔަ އަހަރުގެ ޗެމްޕިއަން، އައިމިނަތު އަޒްރާ ދިޔައީ ހަތަރަކަށެވެ.

މިދިޔަ އަހަރުގެ 10 ބޯލް ޗެމްޕިއަންޝިޕްގެ ފިރިހެން ޑިވިޝަނުގެ ތަށި ހޯދީ، ޝާޒް އެވެ. ޝާޒް ވަނީ ފައިނަލުގައި، މި އަހަރުގެ ޗެމްޕިއަން، ފަޔާޒް އަތުން މިދިޔަ އަހަރު ފައިނަލުގައި މޮޅުވެފަ އެވެ. އަންހެން ފައިނަލުގައި އަޒްރާ މޮޅުވީ، ފާތީ އަތުންނެވެ. މި ފަހަރުގެ ޗެމްޕިއަން، ދީނާ މިދިޔަ އަހަރު ދިޔައީ، ތިން ވަނަ އެވެ.