ޗާގޯސް މައްސަލާގައި ދިވެހި ސަރުކާރުން ނިންމާފައިވާ ނިންމުން އަނބުރާ ގެންދިއުމަށް ގޮވާލައި ރައްޔިތުންގެ މަޖިލީހަށް ޕެޓިޝަނެއް ހުށަހެޅުމުގެ މަސައްކަތް ފަށައިފި އެވެ.

މާފަންނު މެދު ދާއިރާގެ މެންބަރު މުހައްމަދު ރަޝީދު (ބޮންޑޭ) އިސްވެ ހުންނަވައި ހުށަހަޅުއްވާ އެ ޕެޓިޝަނުގައި ވަނީ ދިވެހި ސަރުކާރުން މޮރިޝަސްއާއެކު "ސިއްރު ޑީލެއް" ހަދަމުންދާ ކަމުގެ ތުހުމަތު ކުރައްވާފަ އެވެ.

"...ރައީސް އިބްރާހިމް މުހައްމަދު ސޯލިހު ސިއްރުން ދޫކޮށްފައިވާ ފޯޅަވަހި ސިޓީ އަނބުރާ ގެނައުމަށާއި، އަދި މިކަމުގައި ހިމެނޭ ކަމަށް ބުނާ 500 މިލިއަން ޑޮލަރުގެ ސިއްރު ޑީލުގެ ހަގީގަތް ރައްޔިތުންނަށް އިތުބާރު ހިފޭ ނުފޫޒުން އެއްކިބައިވެފައިވާ މިނިވަން ފަރާތަކުން ތަހުގީގުކޮށް އަދި ފޯޅަވަހި ސިޓީ ބާތިލު ކުރުމަށް އެދި ގޮވާލަ[ން]" އެ ޕެޓިޝަނުގައި ވެއެވެ.

އެ ޕެޓިޝަނުގައި ބުނީ، ސަރުކާރުން ނިންމާފައި ވަނީ ކުރީގެ ރައީސް މުހައްމަދު ނަޝީދުގެ ވެރިކަމުގައި ފޯޅަވަހި އަތޮޅުގެ ރަށްތަކުން ދިވެހި ގައުމަށް ހައްގުވާ ސަރަހައްދު ހިމެނޭގޮތަށް އދ. ގައި ރަޖިސްޓްރީ ކުރުމަށް ހުށަހަޅާފައިވާ ލިޔުންތައް ބާތިލުވާގޮތަށް ކަމަށެވެ.

އަދި ދިވެހި މަސްކަނޑުން މިހާރުވެސް ލިބިފައިވާ 150 މޭލު ހިމެނޭ މަސްކަނޑުގެ ސަރަހައްދާއި ކަނޑާއި ޖައްވާއި، ކަނޑު އަޑީގައިވާ އަގުބޮޑެތި މައުދަންތަކާއި އެހެނިހެން ވަސީލަތްތަކުން ދިވެހިން މަހުރޫމުވުމުގެ ބިރު އެބައޮތް ކަމަށް ވެސް އެ ޕެޓިޝަނުގައި ބުނެ އެވެ.

ހަމައެއާއެކު، މި މައްސަލާގައި ރައީސް ސޯލިހު މޮރިޝަސްއަށް ސިޓީ ފޮނުވާފައި ވަނީ މަޖިލީހާއި ރައްޔިތުންނަށް ސިއްރުން ގާނޫނުއަސާސީގެ ބާރުކަނޑުވާލައި، ގާނޫނާ ހިލާފަށް ކަމަށް ވެސް ޕެޓިޝަނުގައި ބުނެ އެވެ. އަދި އެ ސިއްރު ސިޓީ އަނބުރާ ގެނެސް، ތުހުމަތު ކުރެވޭ ސިއްރު ޑީލުގެ މައްސަލަ ތަހުގީގު ކުރުމަށް ވެސް ގޮވާލާފައި ވެއެވެ.

ޗާގޯސް މައްސަލާގައި މަޖިލީހަށް ޕެޓިޝަނެއް ހުށަހެޅުމުގެ މަސައްކަތް ކުރިއަށްދާއިރު އެ މައްސަލާގައި މީގެ ކުރިން ވެސް ވަނީ މަޖިލީހަށް ގަރާރެއް ހުށަހަޅާފަ އެވެ.

އޭރު ދަނގެތި ދާއިރާގެ އެމްއެންޕީ މެމްބަރު މުހައްމަދު ނާޒިމު ހުށަހެޅުއްވީ ޗާގޯސް ޖަޒީރާތަކުގެ ސިޔާދަތީ ބާރު ހޯދަން މޮރިޝަސް އިން ކުރާ ދައުވާގައި ދިވެހި ސަރުކާރުގެ ސިޔާސަތު ބަދަލުވެފައިވާކަން ނުވަތަ ނޫންކަން ހާމަކުރަން ގޮވާލަ އެވެ.

މީގެ އިތުރުން މަޑުއްވަރި ދާއިރާގެ ޕީއެންސީ މެމްބަރު އާދަމް ޝަރީފު ވެސް ވަނީ މި މައްސަލާގައި ކުރިން ކުއްލި މައްސަލައެއް މަޖިލީހަށް ހުށަހަޅާފަ އެވެ. މަޖިލީހުގެ އެމްޑީޕީގެ މެމްބަރުންގެ ތެރެއިން މަޖިލީހުގެ ނަޝީދަށް ތާއީދުކުރައްވާ މެމްބަރުން އެފަހަރު ވެސް ކުއްލި މައްސަަލައާ އެއްކޮޅަށް ވާހަކަ ދެއްކެވި އެވެ.

މައްސަލައިގެ ފަސްފަހަތް؛

މޮރިޝަސް އިން ޗާގޮސް ގެ މައްޗަށް ސިޔާދަތީ ބާރު ހޯދުމަށް އިންޓަނޭޝަނަލް ކޯޓް އޮފް ޖަސްޓިސްގައި ކުރި ދައުވާ އެގައުމާއި އެއްކޮޅަށް ނިމި 2019 ވަނަ އަހަރު އެ ކޯޓުން ވަނީ ޗާގޮސް ވީ އެންމެ އަވަހަކަށް މޮރިޝަސްއާ ހަވާލުކުރުމަށް އިނގިރޭސިވިލާތަށް އަންގާފަ އެވެ. ނަމަވެސް މިހާތަނަށް އެ ނިންމުމަށް އިނގިރޭސިވިލާތުން އިޖާބަދީފައެއް ނުވެ އެވެ.

މީގެ ކުރިން މެއި 22، 2019، ގައި އދ. އިން އެ ނިންމުމަށް ތާއީދުކޮށް ހަ މަސް ދުވަހުގެ ތެރޭގައި ޗާގޮސް މޮރިޝަސް އާއި ހަވާލުކުރުމަށް 116 ގައުމުގެ ވޯޓާއި އެކު ފާސްކުރި ގަރާރުގައި ރާއްޖެއިން ވޯޓުލީ ދެކޮޅަށެވެ.

އެ މައްސަލައިގައި ރާއްޖޭގެ ސްޓޭންޑް ބަދަލުވިކަން އެނގުނީ މިހާރު ކަނޑުގެ ސަރަހައްދުގެ މައްސަލައިގައި ރާއްޖެއިން މޮރިޝަސްއާ ދެކޮޅަށް ވަކާލާތުކުރަމުން އެ ގަރާރާ އެއްކޮޅަށް ވޯޓުދޭން ނިންމާފައިވާ ކަމަށް ބަންޑާރަ ނައިބު ވިދާޅުވުމުންނެވެ.

ނަމަވެސް އެ މައްސަލައިގެ ސްޓޭންޑަށް އައި ބަދަލުގެ ސަބަބުން ކަނޑުގެ ސަރަހައްދުގެ މައްސަލައިގައި ޖަވާބުދާރީވަމުން އައިސްފައިވާ އެއްވެސް ކަމަކަށް ނުވަތަ ސްޓޭންޑަށް އެއްވެސް ބަދަލެއް ނުގެންނާނެ ކަމަށް ސަރުކާރުން ވަނީ ތަކުރާރުކޮށް ވިދާޅުވެފަ އެވެ.

އޭގެ އިތުރުން، ޗާގޯސްގެ ސިޔާދަތީ ބާރު މޮރިޝަސް އަށް ލިބުމަށް ރާއްޖެއިން ތާއިދުކޮށް އެ ގައުމާއި އެއްކޮޅަށް ވޯޓުލާން ނިންމީ، ރާއްޖެއަކީ އިސްތިއުމާރުކުރުމާ ދެކޮޅު ގައުމަކަށްވެފައި ގައުމުތަކުގެ ސިޔާދަތީ ބާރު އޮތުމަށް ތާއިދުކުރާ ގައުމަކަށް ވާތީ ކަމަށްވެސް ސަރުކާރުން ވަނީ ބުނެފަ އެވެ.