ސަރުކާރުން ވެފައިވާ ވައުދު ފުއްދުމުގައި ކާމިޔާބު ހޯދުނީ ސިޔާސީ ހަލަބޮލިކަމުގައި ގެނބިގެން ނުގޮސް ރައްޔިތުންގެ އަޑު އަހައި މަސައްކަތްތައް ކުރިއަށް ގެންދެވުމުން ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
އަންނަ ހޮނިހިރު ދުވަހު ބާއްވާ ގުރައިދޫ ދާއިރާގެ ބައި އިލެކްޝަންގައި އެމްޑީޕީން ވާދަ ކުރައްވާ ކެންޑިޑޭޓު އިބްރާހިމް ޝާޒަށް ތާއިދު ހޯއްދެވުމަށް މާފުއްޓަށް ވަޑައިގެން ރޭ ވާހަކަ ދައްކަވަމުން ރައީސް ސޯލިހު ވިދާޅުވީ ރައީސް ކަމުގެ ހުވާ ކުރެއްވި ހިސާބުން ފެށިގެން އެ މަނިކުފާނުގެ މަސްއޫލިއްޔަތަކަށް، ޒިންމާއަކަށް ހެއްދެވީ ސިޔާސީ ހަލަބޮލިކަމުން ދުރަށް ޖެހިވަޑައިގެން، ވީ ވައުދު ފުއްދައި ދިނުމުގައި ކުރިއަށް ވަޑައިގަތުން ކަމަށެވެ.
ކެބިނެޓުގައި ތިއްބެވި ބޭފުޅުން ވެސް މަސައްކަތް ކުރައްވަމުން ގެންދެވީ އެ އަމާޒުގައި ކަމަށާއި ކޮންމެ ރަށަކަށް ވެސް ކޮށްދީފައިވާ ތަރައްގީގެ މަޝްރޫއުތަކުގެ ލިސްޓު ވިދާޅުވެ ދެއްވޭނީ، ސިޔާސީ ހަލަބޮލިކަމުގައި ގެނބިގެން ނުދިޔުމުގެ ސިޔާސަތުގެ ސަބަބުން ކަމަށް އެ މަނިކުފާނު ވިދާޅުވި އެވެ.
"... ގުނާ އަދަދު ނުކުރެވޭ މިންވަރަށް، ކުރިއާ އަޅާބަލާއިރު މަސައްކަތް ކުރެވިފައި ހުރީ. (މި މަސައްކަތްތައް ކުރެވުނީ) އެ ސިޔާސީ ހަލަބޮލިކަމާ ދުރުގައި ހުރެ، އަޅުގަނޑުމެންގެ ވިސްނުން، ވީ ވައުދުތައް ފުއްދުމަށްޓަކައި ފޯކަސްކޮށްގެން ކުރެވުނު ކަންތައްތަކުން،" އެ މަނިކުފާނު ވިދާޅުވި އެވެ.
ރައީސް ސޯލިހު ވިދާޅުވީ ކުރިއަށް އޮތް ތަނުގައި ވެސް އަމާޒަކީ އެއީ ކަމަށާއި، މަސައްކަތް ކުރައްވާނީ ރައްޔިތުންގެ އަޑު އަހައި ރައްޔިތުންގެ އެދޭ ކަންކަން ސިޔާސަތުތަކުގައި ހިމަނައިގެން ކުރިއަށް ވަޑައިގަތުމަށް ކަމަށެވެ.
ސިޔާސީ ހަލަބޮލިކަމުގެ ވާހަކަ ފާހަގަ ކުރެއްވި ނަމަވެސް ވަކި ކަމަކަށް އަދި ވަކި ބޭފުޅަކަށް އެ ވާހަކަތައް ނިސްބަތް ނުކުރައްވަ އެވެ.
ގުރައިދޫ ދާއިރާގެ ތިން ރަށަށް ވެސް ރައީސް ސޯލިހު އިއްޔެ ވަޑައިގެން ރައްޔިތުންނާ ބައްދަލު ކުރެއްވި އެވެ.
ގުރައިދޫ ދާއިރާގެ ބައި އިލެކްޝަން ބާއްވަނީ އެ ދާއިރާގެ މެންބަރެއްގެ ގޮތުގައި ހުންނެވި އިބްރާހިމް ރިޒާ ފެބްރުއަރީ މަހު އަވަހާރަވުމާ ގުޅިގެންނެވެ. މިފަހަރުގެ ބައި އިލެކްޝަންގައި އެމްޑީޕީގެ އިތުރުން، ޕީޕީއެމް އާއި އެމްއެންޕީން ވާދަ ކުރެ އެވެ.
މިހާތަނަށް ބޭއްވި ރައްޔިތުންގެ މަޖިލީހުގެ އެއްވެސް އިންތިހާބެއްގައި ގުރައިދޫ ދާއިރާގެ ދާއިރާގެ ގޮނޑި އެމްޑީޕީއަށް ކާމިޔާބު ކުރެވިފައެއް ނެތެވެ.
