މާލޭގައި އަނެއްކާވެސް ކެމިލް ރައްކާކޮށްފައި ހުރި ގުދަނެއް ފެނިގެން އެ މައްސަލަ ފުލުހަށް ހުށަހަޅާފައިވާ ކަމަށް އެމްއެންޑީއެފްއިން ބުނެފި އެވެ.

އެމްއެންޑީއެފްއިން މިހެން ބުނެފައިވަނީ ލިލީ މަގުގައި ހުރި ގުދަނެއްގައި ކެމިކަލް ސާމާނު ބަންދުކޮށްފައި ހުރި ކަމަށް ބުނެ އާންމު މީހަކު ކުރި ޓުވީޓަކާއި ގުޅިގެން މީޑިއާތަކަށް މައުލޫމާތު ދެމުންނެވެ.

އެގޮތުން، މިކަމުގެ މައުލޫމާތު ލިބުމުން އެމްއެންޑީއެފްގެ ފަޔަރ އެންޑް ރެސްކިޔުގެ ޓީމުން އެ ގުދަން ބަލާފާސްކޮށްފައިވާ ކަމަށާއި ބެލި ބެލުމުން އެ ގުދަނުގައި ގަވާއިދާ ހިލާފަށް ބައެއް އެއްޗެހި ގުދަންކޮށްފައި ހުރިކަން ފާހަގަވެފައިވާ ކަމަށް އެމްއެންޑީއެފްއިން ވަނީ ބުނެފަ އެވެ.

އޭގެއިތުރުން އެމްއެންޑީއެފްއިން ބުނީ މި މައްސަލަ މިހާރު ފުލުހުންނަށް ހުށަހަޅާފައިވާ ކަމަށާއި ފުލުހުން އެކަމަށް އެޓެންޑުވަމުންދާ ކަމަށެވެ.

މާލޭގައި ހުރި ކެމިކަލް ގުދަންތައް ތިލަފުއްޓަށް ބަދަލުކުރުމުގެ މަސައްކަތް ސަރުކާރުން ފެށީ، މީގެ ހަތަރު އަހަރު ކުރިން ހެންވޭރު އަބަދަށްފެހި މަގުގައި ހުރި ކެމިކަލް ގުދަނުގައި ހިނގި ބޮޑު އަލިފާނުގެ ހާދިސާއަށް ފަހު އަމާޒުވި ފާޑުކިއުންތަކަށް ފަހުގަ އެވެ. އެ ހާދިސާގައި ދިވެހި އަންހެނަކު މަރުވި އިރު އެއަށްފަހު މާލެއިން 40 އެއްހާ ކެމިކަލް ގުދަން ތިލަފުށްޓަށް ބަދަލުކުރި އެވެ.

ނަމަވެސް, އަދިވެސް މާލޭގައި ގަވާއިދާ ހިލާފަށް އެކި ފަރާތްތަކުން ކެމިކަލް ގުދަންކުރަމުންދާއިރު އެ ތަންތަން ބަލާ ފާސްކުރެވޭނެ އެކަށީގެންވާ ނިޒާމެއް އެކުލަވާލެވިފައި ނުވާކަން ގިނަ ބަޔަކު ފާހަގަކުރެ އެވެ.