ރާއްޖޭގެ ފުޓްބޯޅަ ސީޒަން ފެއްޓުމުގެ ގޮތުން ކުޅޭ އެފްއޭ ޗެރިޓީ ޝީލްޑް މެޗުގައި މިދިޔަ އަހަރުގެ ދިވެހި ޕްރިމިއާ ލީގު ޗެމްޕިއަން، މާޒިޔާ ސްޕޯޓްސް އެންޑް ރެކްރިއޭޝަނާއި ލީގުގެ ރަނަރަޕް ކްލަބް އީގަލްސް އިން އަންނަ ހަފްތާގައި ބައްދަލުކުރާ ގޮތަށް ހަމަޖެހިއްޖެ އެވެ.

އެފްއޭއެމް އިން މިއަދު މީޑިއާ އަށް ދިން މެސެޖެއްގައި ބުނެފައިވަނީ، އަންނަ ހަފްތާގެ ހޯމަ ދުވަހުގެރޭ، އީގަލްސް އާއި މާޒިޔާ ބައްދަލުކުރާ ޝީލްޑް މެޗު އޮންނާނެ ކަމަށެވެ. އަދި މެޗު ފަށަން ނިންމާފައިވާ ވަގުތަކީ 22:00 ގަ އެވެ.

މާޒިޔާ އަކީ މިދިޔަ ސީޒަނުގައި ލީގާއި އެފްއޭ ކަޕްގެ ޗެމްޕިއަނުންނެވެ. އާންމު ގޮތެއްގައި ޝީލްޑް މެޗުގައި ކުޅެނީ ލީގު ޗެމްޕިއަނާއި އެފްއޭ ކަޕްގެ ޗެމްޕިއަނެވެ. ދެ މުބާރާތް ވެސް އެއް ޓީމަކުން ކާމިޔާބުކޮށްފިނަމަ ޝީލްޑް މެޗުގެ ފުރުސަތު ލިބެނީ ލީގުގެ ރަނަރަޕަށެވެ.

ޝީލްޑް މެޗުގެ އެންމެ ކާމިޔާބު ޓީމަކީ މާޒިޔާ އެވެ. މިދިޔަ ސީޒަނުގެ ޝީލްޑް މެޗުގައި މާޒިޔާ އިން ވަނީ 5-0 އިން ކްލަބް ވެލެންސިއާ ބަލިކޮށް، ހަތަރު ވަނަ ފަހަރަށް ޝީލްޑް އުފުލާލައިފަ އެވެ.

މި ފަހަރު އޮތީ ރާއްޖޭގެ ފުޓްބޯޅަ ސީޒަން ހުޅުވުމުގެ ގޮތުން ކުޅޭ 13 ވަނަ ޗެރިޓީ ޝީލްޑް މެޗު: މި ސީޒަނުގެ ޗެރިޓީ ޝީލްޑް މެޗަކީ މާޒިޔާ އިން ކުޅޭ އަށް ވަނަ މެޗު.--- ފޮޓޯ: މުހައްމަދު ޝާބިން/ އަދަދު

ރާއްޖޭގެ ފުޓްބޯޅަ ސީޒަން ފެއްޓުމަށް ކުރިން ކުޅެމުން އައި ކަޕް ވިނާސް ކަޕްގެ ބަދަލުގައި 2009 ވަނަ އަހަރު ފެށި ޝީލްޑް މެޗުގެ މިހާތަނަށް 12 މެޗެއް ކުޅެފައިވާއިރު، މާޒިޔާ އިން ހޯދި ހަތަރު ފަހަރުގެ އިތުރުން ދެން ޝީލްޑް އުފުލާލާފައިވަނީ ވީބީ އައްޑޫ އެފްސީން ވަނީ ތިން ފަހަރާއި ނިއު ރޭޑިއަންޓް ސްޕޯޓްސް ކްލަބުން ދެ ފަހަރާއި ކްލަބް ވެލެންސިއާ، ޓީސީ ސްޕޯޓްސް ކްލަބް އަދި ކްލަބް އީގަލްސް އިން ވަނީ އެއް ފަހަރު ޝީލްޑް އުފުލާލައިފަ އެވެ.

މާޒިޔާ އާއި އީގަލްސް އިން ވަނީ 2020 ވަނަ އަހަރުގެ ޑިސެމްބަރު މަހު ޗެރިޓީ ޝީލްޑް މެޗުގައި ބައްދަލުކޮށްފަ އެެވެ. އެ މެޗުން މާޒިޔާ އަތުން އީގަލްސް ވަނީ ފަހަތުން އަރައި 3-2 އިން މޮޅުވެފަ އެވެ.

ޗެރިޓީ ޝީލްޑް މެޗާ ކުރިމަތިލާއިރު، ރާއްޖޭގެ ފުރަތަމަ ޑިވިޝަނުގެ އަށް ޓީމުގެ ތެރެއިން މި ވަގުތު ޕްރެކްޓިސް ކުރަނީ މާޒިޔާ އާއި އީގަލްސް އެކަންޏެވެ. ރާއްޖޭގައި އެންމެ ފަހުން ރަސްމީކޮށް ފުޓްބޯޅަ މެޗެއް ކުޅުނުތާ ހަތް މަހަށް ވުރެ ގިނަ ދުވަސްވެފައިވާއިރު، މިހާތަނަށް އާ ސީޒަނަށް ތައްޔާރުވުމުގައި އެކަށީގެންވާ މަަސައްކަތެއް ކްލަބްތަކުގެ ފަރާތުން ނުފެނެ އެވެ. މާލީ މައްސަލަތަކުގެ ސަބަބުން ކްލަބްތަކަށް ޕްރީ ސީޒަން ޕްރެކްޓިކްސް އޮތީ ނުފެށި އެވެ.