މަސްވެރިންގެ ޕާކުގައި އެކަނި މާއެކަނި ޖޯއްޔެއްގައި އޮށޯވެލައިގެން އޭނާ އޮތީ ފުން ހިޔާލެއްގަ އެވެ. މޫނުމަތިން ފެންނާން ހުރީ ހިތްދަތިކަމާއި ކެކުޅުމެވެ. ފަހަރެއްގައި ވެސް އެ ޖޯލިފަތި ގާތަށް އަހަރުމެން ދިޔައީ އޭނާ އެތަނުގައި އޮތްކަން އެނގިގެނެއް ނޫނެވެ.
އޭނާ ނޫނަސް އެ ޖޯލީގައި އިތުރު ދެ މީހަކު ތިއްބެވެ. އަހަރުމެންގެ މަގުސަދަކަށްވީ ރޯދަ މަހަށް "އަދަދު" ނޫހުން ތައްޔާރު ކުރާ ކުރު ޕުރޮގުރާމަކަށް އިންޓަވިއުކޮޅެއް ހޯދައިލުމެވެ.
"ބޭބޭ، އަދުގެ ޒުވާނުންނަށް ދޭނެ ނަސޭހަތެއް އެބައޮތް ތޯ؟ އަޅުގަނޑުމެން ތައްޔާރު ކުރާ 'ސުންދުސް، ބޭބެމެންގެ ނަސޭހަތުގެ' އެޕިސޯޑަކަށް އިންޓަވިއުކޮޅެއް ދެވިދާނެތޯ؟ އަމިއްލަ ދަރިއަކަށް ދޭ ފަދަ ނަސޭހަތެއް؟" ޖޯލި ފަތީގައި ތިބި އަނެއް ދެމީހުން ކުރެން އަހަރެން އަހައިލީމެވެ.
ކެމެރާއަށް ލަދުން އެ ދެ މީހުން އެކަމަށް އިންކާރު ކުރި އެވެ. ނަމަވެސް ޖޯލީގެ އެންމެ ހުޅަނގަށް އޮތް މީހާ ކުޑަކޮށް ބޯ ހިއްލާލައިފައި އަހަންނާ ސުވާލެއް ކުރި އެވެ.
"ތިޔައީ ކޮން ބޭނުމަކު ނަގާ ޕުރޮގުރާމެއް؟" މާޔޫސްކަމުން ފުރިފައިވި މޫނެއްގެ ވެރި އެމީހާ ސުވާލު ކުރި އެވެ.
ޖަވާބުގައި މިއީ މި ރަމަޟާން މަހާ ދިމާކޮށް އަހަރުމެން "އަދަދު" ނޫހުން ގެނެސްދޭ ޕުރޮގުރާމެކޭ، ބޭނުމަކީ ދޮށީ ބޭފުޅުންގެ ތަޖުރިބާއިން ޒުވާނުންނަށް ކޮންމެ ދުވަހަކު ވެސް ނަސޭހަތެއް ގެނެސްދިނުމޭ އަހަރެން ބުނީމެވެ. އިތުރު ސުވާލެއް ނުކޮށް އޭނާ އިންޓަވިއު ދޭން އެއްބަސްވި އެވެ.
މައިކު ހަރުކޮށްލައި، ކެމެރާ ތައްޔާރުކޮށްލުމަށް އަވަސްވެގަތީމެވެ. އެ ވަގުތު ދެން އޭނާ ބުނި އެއްޗަކުން އަހަންނަށް ކުއްލިއަކަށް އޭނާއަށް ބަލައިލެވުނެވެ. އޭނާ އެބުނެދިނީ މޫނުމަތީން ފެންނާން ހުރި މާޔޫސްކަމުގެ ފަހަތުގައި ފޮރުވިފައިވާ ސިއްރެވެ.
"އިހަށްދުވަހު މާފަންނު ފިހާރައެއްގެ ތެރޭގައި ވަޅި ހަރައި އެ މަރާލީ އަހަރެންގެ ދަރިއެއް، އެއީ ކިހައި ދެރަ ކަމެއް؟" އޭނާ އުފެއްދީ ސުވާލެކެވެ.
މައިކު ހިފައިގެން އަހަރެން އޭނާގެ ގާތަށް ޖެހިލީމެވެ. މާ ބޮޑު ރައްޓެއްސެއް ނޫނަސް އެބުނާ ނައުޝާދަކީ އަހަރެން ވެސް ދަންނަ ޒުވާނަކަށް ވީތީ އެވެ.
"އެހެންތަ؟ ވަރަށް ދެރަ، އެކަމާ ގުޅުވައިގެން ނަސޭހަތެއް ދެއްވަންވީނޫންތޯ؟" އޭނާއާ އެއްބަސްވެލުމަށް ފަހު އަހަރެން އެދުނީމެވެ.
ކެމެރާމަން ތައްޔާރުކަމަށް ބުނުމުން އަހަރެން އޭނާގެ ގަމީހުގައި މައިކު ހަރުކޮށްލަދިނީމެވެ. އެއާއެކު އޭނާގެ ވާހަކަކޮޅު ފެށި އެވެ.
"ބޭބެގެ ނަސޭހަތަކީ މަގުމަތީގައި އެހެން ބޭނުންހައި ގޮތަކަށް ނޫޅޭށޭ ތިއިން އެއްވެސް ކުއްޖަކު، ކޮންމެ މީހަކާ ވެސް މަރު އައިސް ބައްދަލު ކުރާނެ ވަގުތެއް، ސާއަތެއް އެނގެނީއެއް ނޫނޭ،" އަސަރާ އެކު އޭނާ ބުންޏެވެ.
ހިތުގައި ޖެހިފައި އޭނާ އެ ކިޔައިދިނީ މިދިޔަ ފެބްރުއަރީ މަހު 25، ގައި މާފަންނު، މުރަނގަ މަގުގައި ހުރި ފިހާރައެއްގެ ތެރެއަށް ބަޔަކު ވަދެ ވަޅިން ހަމަލާދީ އުމުރުން 30، އަހަރުގެ އަހުމަދު މުހައްމަދު ދީދީ (ނައުޝާދު/ނައުއްޓެ) މަރާލި ވާހަކަ އެވެ.
މާރާމާރީގައި މަރުވި ޒުވާނާ
އެ ޒުވާނާ މަރުވީ ލިބުނު އަނިޔާތަކަށް އައިޖީއެމްއެޗުގައި ފަރުވާ ދެމުންދަނިކޮށް އޭގެ ތިން ދުވަސް ފަހުންނެވެ.
"ބޭބެ ވެސް ވަރަށް ޒުވާން ދުވަސްވަރު ލިބުނު ދަރިއެއް އެއީ، އެކަމަކު އެދިޔައީ، އެއީ ވާހަކައަކީ، މަގުމަތީގައި އުޅުމުގެ ސަބަބުންނޭ ބޭބެ ބުނާނީ، ބަސްނާހައި ބޭނުންހައި ގޮތަކަށް އުޅުމުގެ ސަބަބުންނޭ. ގުރޫޕުތަކާ ބައިވެ އެހެން އުޅުމުގެ ސަބަބުންނޭ ބޭބެ ބުނާނީ،" އޭނާ ބުންޏެވެ.
ލިބުނު ހިތްދަތިކަމާއި ދެރައާ އެކު އެ ބޭބެ ދޭން އޮތީ އެންމެ ނަސޭހަތެކެވެ. އެއީ މަގުމަތީގައި ގޭންގު ހަދައިގެން، މީހުންނާ ދުޝްމަނު ވެގެން ނޫޅުމެވެ. އެންމެ ކައިރީގައި އޮތް އެއްޗަކީ މަރުކަން ދަނެގެން ދުނިޔޭގައި އުޅުމެވެ.
"[ބޭބެގެ ނަސޭހަތަކީ] އެގޮތަށް އެހެން ނޫޅޭށޭ، މަރު އައިސް ބައްދަލު ކުރާނީ ކޮން ސާއަތެއްގައި ކޮން ވަގުތެއްގައި ކަމެއް ހަމަ އެއްވެސް މީހަކަށް ނޭނގޭނެ،"
