މެންޗެސްޓާ (މާޗް 15) - ޗެމްޕިއަންސް ލީގުގެ ގަދަ 16 ބުރުގެ ދެ ވަނަ ލެގުގައި ރޭ 7-0 އިން ޖަރުމަނުގެ އާރްބީ ލައިޕްޒިގު ބަލިކޮށް, މެންޗެސްޓާ ސިޓީން ފެންވަރު ދައްކާލިއިރު، ޕޯޓޯ ކަޓުވާލުުމަށް ފަހު އިންޓަ މިލާން ވެސް މުބާރާތުގެ ކުއާޓާ އިން ފުރުސަތު ހޯދައިފި އެވެ.

ރޭގެ މެޗަށް ނުކުތްއިރު، ލައިޕްޒިގު ދަނޑުގައި ސިޓީއާ ވަނީ 1-1 އިން އެއްވަރުވެފަ އެވެ. ކޮންމެ ޓީމެއް މޮޅުވިޔަސް ކުއާޓާގެ ޖާގަ ލިބޭ ގޮތަށް އޮތް މި މެޗު ސިޓީން ވަނީ ބޮޑު ތަފާތަކުން މޮޅުވެފަ އެވެ.

އަނެއްކޮޅުން، އިންޓަ އިން ވަނީ އަމިއްލަ ދަނޑުގައި 1-0 އިން ނެގި ލީޑު، ރޭ ޕޯޓޯ ދަނޑުގައި 0-0 އިން އެއްވަރުކޮށްގެން ހިފަހައްޓައި، އަނެއް ބުރުން ޖާގަ ހޯދައިފަ އެވެ. މިއީ 2005/2006 ގެ ސީޒަނަށް ފަހު ޗެމްޕިއަންސް ލީގުގެ ކުއާޓާ ފައިނަލުގައި މިލާނުގެ ދެ ޓީމު ކަމަށްވާ، އޭސީ މިލާނާއި އިންޓަ މިލާން ކުޅޭނެ ފުރަތަމަ ފަހަރެވެ.

އިއްތިހާދު ސްޓޭޑިއަމްގައި ރޭ ސިޓީ ކުޅުނު މެޗުގައި އެ ޓީމުގެ ތަރި އަކީ ފަސް ގޯލު ޖެހި އާލިން ބްރައުޓް ހާލަންޑް އެވެ. ސިޓީން ލީޑުނެގީ 22 ވަނަ މިނިޓްގައި ހާލަންޑް ޖެހި ޕެނަލްޓީންނެވެ. މިއީ ލައިޕްޒިގުގެ ކުޅުންތެރިއަކު އަތުގައި ޖެހުނު ކަމަށް ވީޑިއޯ އެސިސްޓަންޓް ރެފްރީ (ވީއޭއާރް) އިން ނިންމުމުން ދިން ޕެނަލްޓީ އެކެވެ. އޭގެ ދެ މިނިޓް ފަހުން، ހާލަންޑް ދެ ވަނަ ގޯލެއް ޖެހީ، ސިޓީގެ ކެވިން ޑި ބްރޭނާގެ ޝޮޓެއް ހުރަސްދަނޑީގައި ޖެހިފައި ނުކުތް ވަގުތު ރީބައުންސް ބޯޅަ ބޮލުން ގޯލަށް ފޮނުވާލައިގެންނެވެ. ފުރަތަަމަ ހާފުގެ އިތުރު ވަގުުތުގައި ސިޓީގެ ތިން ވަނަ ލަނޑު ޖަހައި ހާލަންޑް އޭނާގެ ހެޓްރިކް ފުރިހަމަ ކުރި އެވެ. މިއީ ސިޓީގެ ރުބެން ޑިއާޒް ބޮލުން ޖެހި ބޯޅައެއް ދަނޑީގައި ޖެހިފައި ގޯލު ރޮނގުމަތިން އައި ވަގުތު ހާލަންޑް ޖެހި ގޯލެކެވެ.

ދެ ވަނަ ހާފުގެ ކުޅުން ފަށައިގެން ހަތަރު މިނިޓް ތެރޭ ސިޓީގެ އިލްކާއި ގުންޑޮގާން ތިރިތިރިން ގޯލުގެ ދުރު ކަނަށް ބޯޅަ ފޮނުވާލައި ސިޓީގެ ހަތަރު ވަނަ ގޯލު ޖެހި އެވެ. މެޗުގެ 52 ވަނަ މިނިޓްގައި އޭރިއާތެރެއިން . ލިބުނު ފުރުސަތަކުން ހާލަންޑް ވަނީ އިތުރު ގޯލެއް ޖަހައިދީފަ އެވެ. އޭގެ ހަތަރު މިނިޓް ފަހުން، އަނެއްކާ ވެސް އޭރިއާތެރެއިން ލިބުނު ބޯޅައެއް ހާލަންޑް ވަނީ ގޯލުގެ ކަނަށް ފޮނުވާލައިފަ އެވެ.

މެޗުގެ އިތުރު ވަގުުތުގައި އޭރިއާބޭރުން ގޯލުގެ މަތީ ކަނަށް ބޯޅަ ފޮނުވާލައިގެން ސިޓީގެ ފަހު ގޯލު ޖެހީ ޑި ބްރޭނާ އެވެ.

މި މެޗުގައި ހާލަންޑް ޖެހި ގޯލުތަކާ އެކު ސީޒަނުގައި އޭނާ މި ވަނީ ޖުމްލަ އެކު 39 ގޯލު ޖަހައިފަ އެވެ. ޖުމްލަ ފަސް ހެޓްރިކް ހަދާފައިވާއިރު، މި ސީޒަނުގައި ޔޫރަޕްގެ ވަރުގަދަ ފަސް ލީގުގައި ވެސް އެކަން އެހެން ކުޅުންތެރިއަކަަށް ހާސިލްނުކުރެވެ އެވެ. އަނެއްކޮޅުން ހާލަންޑަކީ އެންމެ އަވަހަށް ޔޫރަޕްގެ މުބާރާތްތަކުގައި 30 ގޯލު ހަމަކުރި ކުޅުންތެރިޔާ އެވެ. އަދި ޗެމްޕިއަންސް ލީގުގެ އެއް މެޗެއްގައި ފަސް ގޯލު ޖެހި ތިން ވަނަ ކުޅުންތެރިޔާާ އެވެ. ކުރިން އެކަން ހާސިލްކުރެވިފައި އޮތީ ޝަހުތަރު ޑޮނެސްކަށް ކުޅުނު ލުއިޒް އެޑްރިއާނޯ އާއި ބާސެލޯނާ އަށް ކުޅުނު މެޗެއްގައި ލިއޮނަލް މެސީ އެވެ.