އެމެރިކާގެ ބާސްކެޓްބޯޅަ ތަރި ކޯބީ ބްރަޔަންޓް މަރުވާން މެދުވެރިވި ހެލިކޮޕްޓަރު އެކްސިޑެންޓުގެ ފޮޓޯތައް އާއްމުކުރި މައްސަލައިގައި ބަދަލުގެ ގޮތުގައި 29 މިލިއަން ޑޮލަރު ދޭން ލޮސް އެންޖެލިސް ކައުންޓީއިން އެއްބަސްވެއްޖެ އެވެ.

މީގެ ތިން އަހަރު ކުރިން ލޮސް އެންޖެލިސް ސަރަހައްދުގައި ހިނގި އެކްސިޑެންޓުގައި ބްރަޔަންޓް އާއި އޭނާގެ ދަރިފުޅު ޖިއާނާ އަދި އިތުރު ހަތް މީހުން މަރުވި އެވެ.

އެ މީހުން މަރުވެފައި ތިބި މަންޒަރުގެ ފޮޓޯތައް ފުލުހުން އާއްމު ކުރުމުން، ކޯޓަށް މައްސަލަ ހުށަހެޅީ ބްރަޔަންޓްގެ އަންހެނުން އަދި ޖިއާނާގެ މަންމަ ވެނެއްސާ އެވެ.

ބަދަލުގެ ގޮތުގައި 29 މިލިއަން ޑޮލަރު ދޭން އެއްބަސްވުމުން ވެނެއްސާގެ ވަކީލުން ބުނީ މަރުވި މީހުންނަށް އިހްތިރާމް ކުޑަކޮށް އަމަލު ކުރުމުން ކޯޓަށް މައްސަލަ ގެންގޮސް ކުރި މަސައްކަތުން ކާމިޔާބު ލިބިއްޖެ ކަމަށާއި މުސްތަގުބަލުގައި އެފަދަ ގޮތަކަށް އިދާރާތަކުން އަމަލުކޮށްގެން ނުވާނެ ކަމަށެވެ.

އެ ހާދިސާގައި އަންހެނުންނާއި ދަރިފުޅު މަރުވި ކްރިސް ޗެސްޓާ ނަމަކަށް ކިޔާ މީހަކު ވެސް ފޮޓޯތައް އާއްމު ކުރުމުން ވަކިން ކޯޓަށް ގޮސް، ބަދަލުގެ ގޮތުގައި 20 މިލިއަން ޑޮލަރު ހޯދި އެވެ.

މިހާރު ކެލިފޯނިއާގައި ވަނީ ހާދިސާތަކުގައި މަރުވާ މީހުންގެ ފޮޓޯ، ހުއްދަ ނެތި ނެގުން، ހުރިހާ އޮފިޝަލުންނަށް މަނާކުރާ ގާނޫނެއް ފާސްކޮށްފަ އެވެ.