ކުރިއަށް އޮތް ރިޔާސީ އިންތިހާބާ ގުޅޭގޮތުން ޖަމިއްޔަތުއްސަލަފްގެ އިސް ސަފުގައި ހަރަކާތްތެރިވާ ދީނީ އިލްމުވެރިންނާއެކު މަޝްވަރާކުރި ނަމަވެސް، ރިޔާސީ ކެމްޕޭނުގައި ސީދާ ގޮތުން ސަލަފު ނުފެނިދާނެ ކަމަށް އިދިކޮޅު ޕީޕީއެމް އިން ބުނެފި އެވެ.

އިއްޔެގެ މަޝްވަރާތަކާ ގުޅޭގޮތުން "އަދަދު" އަށް މައުލޫމާތު ދެއްވަމުން ޕީޕީއެމްގެ ނައިބު ރައީސް އަހުމަދު ޝިޔާމް ވިދާޅުވީ ސަލަފަކީ ސިޔާސީ ޕާޓީއެއް ނޫންކަމުން ސީދާ ކެމްޕޭނު ހަރަކާތްތަކުގައި އެ ޖަމްއިއްޔާ ފެނިގެންދާނެ ކަމަށް ދަންނަވަން ނޭނގޭ ކަމަށެވެ.

"ނަމަވެސް، އަޅުގަނޑުމެންނަށް ސަލަފުން، ގައުމު ބިނާކުރުމުގައި، ހާއްސަކޮށް ދީނީ ތައުލީމު ކުރިއެރުވުމަށް ކުރެވެން ހުރި ކަންކަމުގައި އަޅުގަނޑުމެންގެ ސިޔާސަތުތަކުގެ ތެރެއިން އަޅުގަނޑުމެންނަށް އެބޭފުޅުންނާ އެކު ކޮންމެވެސް ޒާތެއްގެ މަސައްކަތްތަކެއް ކުރެވޭނެ" ޝިޔާމް ވިދާޅުވި އެވެ.

އިއްޔެގެ މަޝްވަރާތަކާ ގުޅޭގޮތުން ޝިޔާމް އިތުރަށް ވިދާޅުވީ ޕީޕީއެމް އިން ސަލަފާއެކު މަޝްވަރާކުރީ އެ ޖަމްއިއްޔާއަކީ މުޖުތަމައުގެ ބައިވެރިއަކަށްވެފައި، އެބޭފުޅުންގެ ހިޔާލާ ފިކުރާއި ޕީޕީއެމްގެ ސިޔާސަތުތަކާ އަޅާކިޔުމަށް ކަމަށެވެ.

އެގޮތުން ކުރެވުނު މަޝްވަރާތަކުގެ ތެރޭގައި ދީނީ ހޭލުންތެރިކަން އިތުރުކުރުމާއި ދީނީ ތައުލީމު އިތުރުކުރުން ހިމެނޭ ކަމަށް ޝިޔާމް ވިދާޅުވި އެވެ.

"ރާއްޖޭގައި ވަރަށް އިހުތިރާމުކުރެވޭ ދީނީ އިލްމުވެރިންތަކެއް ހިމެނޭ ޖަމްއިއްޔާއަކަށްވާތީވެ އެބޭފުޅުންގެ ހިޔާލާއި މަޝްވަރާ މިކަމުގައި ހޯދަން ބޭނުންވާތީ (މަޝްވަރާކުރީ)" ޝިޔާމް ވިދާޅުވި އެވެ.

މީގެއިތުރުން އިދިކޮޅުން ކުރާ އެކި މަސައްކަތްތަކަށްވެސް ސަލަފުން ތާއީދުކުރާކަން ޝިޔާމް ފާހަގަކުރެއްވި އެވެ. އެގޮތުން ގައުމުގެ މިނިވަންކަމަށް ކުރާ މަސައްކަތް ފާހަގަކުރައްވާ ޝިޔާމް ވިދާޅުވީ، ގައުމުގެ މިނިވަންކަން 'ކޮމްޕްރޮމައިޒް' ވެއްޖެނަމަ އެއީ ގައުމާއި ދީނަށް އޮތް ނުރައްކަލެއްކަން ސަލަފުގެ ދީނީ އިލްމުވެރިންވެސް ގަބޫލުކުރައްވާ ކަަމަށެވެ.

ރިޔާސީ އިންތިހާބާ ގުޅޭގޮތުން އިދިކޮޅުން ސަލަފާއެކު މަޝްވަރާކޮށްފައިވާއިރު އެ ޖަމިއްޔާ ފާހަގަވެގެން ގޮސްފައިވަނީ މިހާރު އޮތް ސަރުކާރުގެ އެކި ސިޔާސަތުތަކަށް ވަރަށް ބޮޑަށް ފާޑުކިޔާ ޖަމިއްޔާއެއްގެ ގޮތުގަ އެވެ.

ދެހާސްއަށާރަވަނަ އަހަރުގެ ރިޔާސީ އިންތިހާބުގައި ވެސް ޖަމިއްޔަތުއްސަލަފުން ތާއީދުކޮށްފައިވަނީ މިފަހަރުގެވެސް ޕީޕީއެމްގެ ރިޔާސީ ކެންޑިޑޭޓް އަދި އޭރުގެ ރައީސް އަބްދުﷲ ޔާމީނަށެވެ.

މި އަހަރުގެ ރިޔާސީ އިންތިހާބުގައި ވާދަކުރަން ވެސް ޕީޕީއެމްގެ ރިޔާސީ ޓިކެޓު އަރުވާފައިވަނީ ޔާމީނަށެވެ. ނަމަވެސް މާފުށީ ޖަލުގައި ހުކުމެއް ތަންފީޒުކުރައްވަމުން ގެންދަވާ ޔާމީނަށް އިންތިހާބުގައި ވާދަކުރުމުގެ ފުރުސަތު މި ވަގުތަށް ވަނީ ބަންދުވެފަ އެވެ.

ސަބަބަކީ ގާނޫނު އަސާސީގައި ބަޔާންކޮށްފައިވާ ރައީސުލްޖުމްހޫރިއްޔާއަށް ވުމުގެ އެއް ޝަރުތަކީ، ޖިނާއީ ކުށެއްކުރިކަން ސާބިތުވެގެން 12 މަސް ދުވަހަށް ވުރެ ދިގު މުއްދަތެއްގެ ހުކުމެއް އޮތް ނަމަ، އެ ހުކުމް ތަންފީޒުކޮށް ނިމުނުތާ ނުވަތަ ކަނޑައެޅުނު އަދަބު މައާފުކުރެވުނުތާ ތިން އަހަރުވެފައިވާ މީހަކަށް ވާންޖެހުމެވެ.