މަސްވެރިކަމުގެ ތެރެއިން އެންދަމަން ފޭބި މީހަކު ގެއްލިގެން ހޯދަނިކޮށް މަރުވެފައި އޮއްވާ ފެނިއްޖެ އެވެ.

ފުލުހުން މައުލޫމާތު ދިން ގޮތުގައި އުމުރުން 56 އަހަރުގެ މި މީހާއަކީ ގއ. ދެއްވަދޫއިން މަހަށް ނުކުތް މީހެކެވެ.

މި ހާދިސާގެ ރިޕޯޓު ފުލުހުން ލިބިފައިވަނީ މިއަދު ހެދުނު 08:30 ހާއިރު ކަމަށާއި އެމީހާ ފެނިފައިވަނީ ދެއްވަދޫއާ މޭލެއްހާތަން ބޭރު ކަނޑުން ކަމަށް ފުލުހުން ވަނީ ބުނެފަ އެވެ.

ފުލުހުން ބުނެފައިވަނީ އެ މީހާ ފެނުމާއެކު ދެއްވަދޫ ސިއްހީ މަރުކަޒަށް ގެންގޮސްފައިވާ ކަމަށާއި، ސިއްހީ މަރުކަޒަށް ގެންދިޔައިރުވެސް މަރުވެފައިވާ ކަމަށެވެ. އަދި މި ހާދިސާއާ ގުޅިގެން ބަލަންޖެހޭ ކަންކަން ބަލަމުންދާ ކަމަށްވެސް ފުލުހުން ބުންޏެވެ.