ބަންގްލަދޭޝްގައި އިއްޔެ ނިމިގެންދިޔަ ސެންޓްރަލް އޭޝިއަން ޒޯން ބީޗްވޮލީބޯޅަ މުބާރާތުގެ ރަން މެޑަލް ރާއްޖޭގެ އިސްމާއިލް ސާޖިދު (ކުޑަކާއްޓެ) އާއި އާދަމް ނަސީމް (އެޑަމް)ގެ ޕެއާ އިން ހޯދީ ވަރަށް ގިނަ ބަޔެއްގެ މަސައްކަތާ އެކު ކަމަށް ކޯޗު ބްރެޒިލްގެ ވިނީޝިއުސް މާޓިން ޖިއޯނީ ބުނެފި އެވެ.

އެޑަމް އާއި ކުޑަކާއްޓެގެ ޕެއާ އިން ވަނީ އިއްޔެ ނިމުނު މުބާރާތުގައި ކުޅުނު ފަސް މެޗުން ވެސް މޮޅުވެފަ އެވެ. ފުރަތަމަ މެޗުން ފެށިގެން މޮޅު ކުޅުމެއް ދައްކަމުން އައި، އެޑަމް އާއި ކުޑަކާއްޓެގެ ޕެއާ އިން އިއްޔެގެ ފައިނަލުގައި ވަނީ ނޭޕާލްގެ އެއް ވަނަ ޕެއާ، މަން ބަހާދުރު ޝްރެސްތާ އާއި ދިލް ބާހާދުރު ސުނަރުގެ ޕެއާ، 21-13، 21-19 އިން ބަލިކޮށްފަ އެވެ.

މި އަހަރުގެ ޖެނުއަރީ މަހުން ފެށިގެން ގައުމީ ބީޗްވޮލީބޯޅަ ޓީމުގެ ޓްރެއިނިން ކުރިއަށް ގެންދަމުން އަންނަނީ ދުނިޔޭގެ ވޮލީބޯޅަ ފެޑެރޭޝަން، އެފްއައިވީބީން ހަމަޖައްސައިދިން، ބްރެޒިލްގެ ތަޖުރިބާކާރު ކޯޗު ވިނީޝިއުސްއާ އެކުގަ އެވެ.

ގައުމީ ބީޗްވޮލީ ޓީމުން ވަނީ ވިނީޝިއުސްގެ އިރުޝާދުގެ ދަށުން ސްރީ ލަންކާގައި ފެބްރުއަރީ މަހު ކުރިއަށްދިޔަ، ސެންޓްރަލް ޒޯން ބީޗް މުބާރާތާއި މާޗް މަހު ބޭއްވި ކޮމަންވެލްތު ގޭމްސް ކޮލިފައިން، ޖުލައި/އޮގަސްޓް ގައި އިނގިރޭސިވިލާތުގެ ބާމިންހަމްގައި ކުރިއަށްދިޔަ ކޮމަންވެލްތު ގޭމްސްގެ އިތުރުން އޮކްޓޫބަރު މަހު ސަން އައިލެންޑްގައި ހޯސްޓްކުރި އެފްއައިވީބީ ޓުއާ މުބާރާތާއި މި ފަހަރު ބަންގްލަދޭޝްގައި ބޭއްވި ސެންޓްރަލް އޭޝިއަން ޒޯން ބީޗް ޓުއާގައި ވާދަކޮށްފަ އެވެ.

މާޗް މަހު، ކޮމަންވެލްތު ކޮލިފައިންގައި އެޑަމް އާއި ކުޑަކާއްޓެގެ ޕެއާ ރިހި މެޑަލް ހޯދިއިރު، މި ފަހަރު ސެންޓްރަލް އޭޝިއާގެ ބީޗްޓުއާގައި މި ވަނީ ރަން މެޑަލް ހޯދައިފަ އެވެ. މިއީ ރާއްޖެ އަށް ވޮލީބޯޅައިގައި ލިބުނު ފުރަތަމަ ރަން މެޑަލް އެވެ.

"އަހަރެން އަބަދުވެސް ބުނަމުން އައީ ޝާހު (ކުޑަކާއްޓެ) އާއި އެޑަމްގެ އެބަހުއްޓޭ ކޮލިޓީ. އެ މީހުން އެކުގައި ވަރުގަދަ މެޗުތަކުގައި ކުޅޭ ވަރަކަށް އިމްޕްރޫވް ވާނެއޭ، އެކަން މި މުބާރާތުގައި މި ފެނުނީ، ހަގީގަތުގައި ރަން މެޑަލް މި ލިބުނީ ވަރަށް ގިނަ ބައެއްގެ މަސައްކަތުން، ރަން މެޑަލެއް ނުލިބޭނެ އެންމެން އެކުގައި މަސައްކަތް ކޮށްގެން ނޫން ގޮތަކަށް،" ވިނީޝިއުސް، "އަދަދު" އަށް ބުންޏެވެ.

ބަންގްލަދޭޝްގައިި ކުރިއަށް ދިޔަ ސެންޓްރަލް އޭޝިއަން ބީޗް ވޮލީބޯލް ޓުއާގައި ވާދަކުރި ދިވެހި ޓީމާއި އޮފިޝަލުން.

އެޑަމް އާއި ކުޑަކާއްޓެގެ ޕެއާ އިން ހުރިހާ މެޗަކުން މޮޅުވެގެން ސެންޓްރަލް ޒޯން ބީޗް ޓުއާގެ ޗެމްޕިއަންކަން ހޯދުމުން ހަަމައެކަނި ސްކޯ އަށް ބަލައިގެން އެއް ބަޔަކު މިއީ ވަރަށް ފަސޭހަ މުބާރާތެއް ކަމަށް ނިންމައިފާނެ ކަމަށް ވިނީޝިއުސް ވަނީ ބުނެފަ އެެވެ.

ވިނީޝިއުސް ބުނީ ހަގީގަތުގައި ހަ ގައުމުން އަށް ޕެއާ ވާދަކުރި މި މުބާރާތުގައި އެޑަމް އާއި ކުޑަކާއްޓެގެ ޕެއާ އިން ކުޅުނު މެޗުތަކުގެ ކޮންމެ ޕޮއިންޓަކަށް ފޯކަސް ކޮށްގެން ދެއްކީ ވަަރަށް މޮޅު ކުޅުމެއް ކަމަށެވެ.

"މީގެއިން އެއްވެސް މެޗެއް ފަސޭހައެއް ނޫން. މެޗުތައް ނުފެނި ސްކޯ ބަލައިގެން ބަޔަކު ނިންމައިފާނެ ވަރަށް ފަސޭހައޭ، އެހެނެއް ނޫން، މި ކުޅުންތެރިން ކޮންމެ ޕޮއިންޓަކަށް އެ ކުޅުނު ކުުޅުން. ޕްރެޝަރުގައި ވެސް އެ ނެގި ޑިޒިޝަންތައް ވަރަށް ފުރިހަމަ، އަހަރެން މި ހުރީ ވަރަށް ހިތްހަމަޖެހިފައި،" ވިނީޝިއުސް ބުންޏެވެ. "އަހަންނަށް އަބަދުވެސް އެޑަމް އާއި ޝާހު (ކުޑަކާއްޓެ)އާ މެދު އިތުބާރު އޮތް،"

އެޑަމް އާއި ކުޑަކާއްޓެ ޕެއާއެއްގެ ގޮތުގައި ކުޅެން ފެށީ މި އަހަރު އެވެ. އަހަރެއްގެ ތެރޭގައި މި ވަނީ ރާއްޖެ އަށް ރަން މެޑަލް ގެނެސްދީފަ އެވެ.

ބަންގްލަދޭޝްގައި ކުރިއަށްދިޔަ ސެންޓްރަލް އޭޝިއަން ބީޗްޓުއާގައި އެޑަމް އާއި ކުޑަކާއްޓެގެ ޕެއާގެ އިތުރުން ދެން ވާދަކުރި ރާއްޖޭގެ އަނެއް ޕެއާ އަކީ ޝަމާއިލް ހުސެއިން އާއި އަހުމަދު މުހައްމަދު (ކޯކޭ)ގެ ޕެއާ އެވެ. ވިނީޝިއުސް ބުނީ ކޯކޭ އާއި ޝަމާއިލްގެ ޕެއާ އެކުގައި އަަލަށް މުބާރާތަކަށް އައިސް ކުރި މަސައްކަތް ފާހަގަކުރާ ކަމަށެވެ.

މީގެ ކުރިން ކޯކޭ ކުޅެމުން އައީ މުހައްމަދު އަލީ (ޑެންޒޯ)އާ އެއް ޕެއާ އަކަށެވެ. އެއީ އެންމެ ފަހުން ބޭއްވި ގައުމީ މުބާރާތުގެ ޗެމްޕިއަން ޕެއާ އެވެ. އެކަމަކު، މި ފަހަރުގެ ބީޗް ޓުއާގައި ޑެންޒޯ ޓީމުގައި ނުހިމެނެ އެވެ. އެއީ އެސޯސިއޭޝަނާއި ކޯޗު ވިނީޝިއުސްއާ މަޝްވަރާ ކުރުމަށް ފަހު ނިންމި ނިންމުމެއްކަން އެނގިފައިވެ އެވެ.

ވިނީޝިއުސް ބުނީ މި ވަގުތު ރާއްޖޭގެ ބީޗްވޮލީ ބޯޅަ އަށް ރަން މެޑަލެއް ލިބުމަކީ މި ކުޅިވަރުގެ ތެރެއަށް އިތުރު ކުޅުންތެރިން ވައްދައިގެން، ރަނގަޅު ލެވަލެއްގައި ޓްރެއިނިންތައް ރާވައިގެން ކުރިއަށްގެންދަން ލިބިގެންދިޔަ ފުރުސަތެއް ކަމަށެވެ.

"އަހަރެން (ރާއްޖެ އައި ފަހުން) އާންމު ގޮތެއްގައި ޓްރެއިން ކުރަމުން މިދިޔައީ މަދު ޕެއާތަކެއް ގޮވައިގެން. އެހެންވީމަ، ބޭނުންވާ ކޮމްޕެޓިޝަނެއް ޓްރެއިނިންތަކުގައި ނެތް. އުންމީދަކީ، ކުރިއަށް އޮތްތަނުގައި ގިނަ އަދަދެއްގެ ފެންވަރު ރަނގަޅު ބީޗްވޮލީ ކުޅޭހިތްވާ ކުޅުންތެރިން ޓްރެއިނިން އަށް އިތުރުވުން،" ގްރީސްގެ އެތަންސްގައި 2004 ވަނަ އަހަރު ބޭއްވި އޮލިމްޕިކްސްގެ ބީޗްވޮލީން ފަސް ވަނަ ހޯދި ބްރެޒިލް ޓީމުގައި ހިމެނުނު ވިނީޝިއުސް ބުންޏެވެ.

ވިނީޝިއުސްއާ އެކު މި ފަހަރު ގައުމީ ބީޗްވޮލީ ޓީމުގައި ހިމެނޭ އޮފިޝަލުންގެ ޓީމަކީ ކުރިން ގައުމީ ބީޗް ޓީމަށް ކުޅުނު ކުޅުންތެރިންނެވެ. އެ ގޮތުން މެނޭޖަރަކަށް ހުރީ 2019 ވަނަ އަހަރުގެ އިންޑިއަން އޯޝަން އައިލެންޑް ގޭމްސް (އައިއޯއައިޖީ)ގައި ރާއްޖެ އަށް މެޑަލް ގެނެސްދިން ޓީމުގައި ހިމެނޭ ޝިއުނާޒް އަބްދުލް ވާހިދު (މަންކޭ) އެވެ.

މި ފަހަރުގެ ޓީމުގެ އެސިސްޓަންޓް ކޯޗަކަށް ހުރީ ގައުމީ ބީޗްވޮލީ ޓީމަށް ގިނަ މެޗުތަކެއް ކުޅެދީފައިވާ އަހުމަދު އަނިލް ނަސީރު އެވެ. ގައުމީ ލެވަލްގެ ބީޗްވޮލީގެ ކަންކަން ކުރިއަރުވަން ބީޗް ވޮލީ ކޮމިޝަންގެ ޗެއާމަން، އަދި ގައުމީ ޓިމުގެ ކުރީގެ ކޯޗު، އަބްދުﷲ ނަޝީދު (އަބުޅޯ) ކުރާ މަސައްކަތް ވެސް ކުުޅުންތެރިން ފާހަގަކުރެ އެވެ.