އަނބިމީހާ މަރާލި ކަމުގެ ތުހުމަތަށް ހައްޔަރުކޮށްފައި ހުއްޓާ ދަންޖެހުނު، އަބޫބަކުރު ފައިސަލްގެ ހަށިގަނޑު މާލެ ގެނެސް އާއިލާއާ މިއަދު ހަވާލުކޮށްފި އެވެ.

ފައިސަލް، 30، މަރުވީ ހދ. ކުޅުދުއްފުށީ ޕޮލިސް ސްޓޭޝަނުގައި އޭނާ ބަންދުކޮށްފައި ހުރި ގޮޅީގައި ދަންޖެހުނުތާ ހަ ދުވަސް ފަހުންނެވެ. ވެއެތުވެދިޔަ ހަ ދުވަހު އޭނާ ބާއްވާފައި އޮތީ މެޝިނަކުން ނޭވާ ލައްވައިގެނެވެ.

ފުލުހުން ބުނީ ކުޅުދުއްފުށިން ފައިސަލްގެ ހަށިގަނޑު މާލެ ގެނެސް އާއިލާއާ ހަވާލުކޮށްފައިވާ ކަމަށެވެ. ދައުލަތުގެ ބެލުމުގެ ދަށުގައި ހުއްޓާ ފައިސަލް ދަންޖެހުނު މައްސަލަ ބަލަމުންދާ ކަމަށް ސަރުކާރުން ބުނެފައިވެ އެވެ.

ޑިސެމްބަރު 10، ވަނަ ދުވަހު ފައިސަލް އަމިށްލައަށް ހދ. ކުޅުދުއްފުށިން ފުލުހުންނާ ހަވާލުވީ އޭނާގެ އަންހެނުން ހދ. ނޮޅިވަރަމް, ހިތަށްފިނިވާގޭ، ނިޝާމާ މުހައްމަދު މަރުވެފައި އޮއްވާ ފެނުނުތާ ގަޑިއިރުތަކެއް ފަހުންނެވެ.

ނިޝާމާ، 28، އޭނާ ދިރިއުޅޭ ކޮޓަރި ތެރޭގައި މަރުވެފައި އޮއްވާ ފެނުނީ އާއިލާގެ މީހުންނަށެވެ. އެ ދެމަފިރިންގެ ހަތް އަހަރުން ދަށުގެ ތިން ކުދިން ތިބެ އެވެ.

ފައިސަލްގެ ހަށިގަނޑު މިއަދު އާއިލާއާ ހަވާލުކުރިއިރު ނިޝާމާގެ ހަށިގަނޑު، ޕޯސްޓްމޯޓަމެއް ހެދުމުގެ ބޭނުމުގައި އޮތީ މޯޗަރީގައި ބާއްވައިފަ އެވެ.