އައްޑޫ އެކުއެޓޯރިއަލް ހޮސްޕިޓަލު (އޭއީއެޗް) ގައި ފުރަތަމަ ފަހަރަށް ކަކުލު ހުޅު ބަދަލުކުރުމުގެ ހިދުމަތް ދޭން ފަށައިފި އެވެ.

އޭއީއެޗް އިން މިއަދު ކުރި ޓުވީޓެއްގައި ބުނެފައިވަނީ މިއަދުން ފެށިގެން އެ ހޮސްޕިޓަލުން ކަކުލުގެ ސާޖަރީ އަދި ކަކުލު ހުޅު ބަދަލުކުރުމުގެ ހިދުމަތް ލިބިގެންދާނެ ކަމަށެވެ.

އޭއީއެޗް އިން އިތުރަށް ބުނެފައިވާ ގޮތުގައި މި ހިދުމަތް ހޯދުމަށް އެ ހޮސްޕިޓަލުގެ ކަށީގެ ހާއްސަ ޑޮކްޓަރުންނަށް ދައްކައިގެން ފަރުވާ ކުރިއަށް ގެންދެވޭނެ އެވެ.

އާންމުގޮތެއްގައި ކަކުލަށް ލިބޭ އަނިޔާތަކުގެ ސަބަބުން ނުވަތަ އާތިރިޓިސް ފަދަ ބަލިތަކުގެ ސަބަބުން ހިނގުން ނުވަތަ ސިޑިން އެރުން ފަދަ ކަންކަމުގެ ސަބަބުން ކަކުލު ހުޅު ބަދަލުކުރަންޖެހެ އެވެ.

މި އޮޕަރޭޝަނަކީ ރާއްޖޭގައި ގިނައިން ކުރަންޖެހޭ އޮޕަރޭޝަނަކަށްވާއިރު މާލެއިން ބޭރުން މި ހިދުމަތް ލިބިގެން ދިއުމަކީ އައްޑޫ އަދި ކައިރި އަތޮޅު ތަކުގެ ރައްޔިތުންނަށްވެސް ލިބިގެންދާނެ ފަސޭހައެކެވެ.