އިންސާނުން އުފެއްދެވީ މަށިންނެވެ. ބިމުގެ ތަފާތު ހިސާބުތަކުން އެންމެހައި ކުލަތައް ހިމެނޭ ގޮތުން ނެގެވުނު ވެލީންނެވެ. އެ ވެލި ފެނާ އެއްކުރެވި އެތައް މުއްދަތެއް ހޭދަވުމަށްފަހު ހަރު މައްޓަށް ބަދަލުވިއެވެ.

އަބޫ މޫސާ އަލްއަޝްޢަރީ ރަޟިޔަﷲ ޢަންހުގެ ކިބައިން ރިވާވެގެން އައިސްފައިވާ ސައްހަ ހަދީސްއެއްގައިވެ އެވެ. ރަސޫލުﷲ ޞައްލަﷲ އަލައިހި ވަސައްލަމަ ހަދީސް ކުރެއްވި ބަސްފުޅެއްގެ މާނައިގައިވެ އެވެ.

"ހަމަކަށަވަރުން ﷲ ސުބްޙާނަހޫވަތަޢާލާ އާދަމްގެފާނު ހެއްދެވީ، ބިމުގެ އެންމެހައި ކަންކޮޅުތަކުން، ﷲ ނެންގެވި ވެލި މުށްވަރަކުންނެވެ، ފަހެ އާދަމް ދަރިތަކުން އައިސްފައިވާކަން ކަށަވަރީ އެބިމުގެ މިންވަރަށެވެ. (އެބަހީ ވެލި ނެންގެވި މިންވަރަށެވެ. ނުވަތަ ވެލީގެ ކުލައާ ޠޮބީޢަތަށެވެ،) އެބައިމީހުންގެ ތެރެއިން ރަތް (މީހުންނާއި) ހުދު (މީހުންނާއި) ކަޅު (މީހުން) ހިމެނިގެން އައިސްފައިވެއެވެ. (އެބަހީ މީސްތަކުންގެ ކުލަ ތަފާތުވުމާއި މިޒާޖާއި ޚުލްޤާއި ސުލޫކު ތަފާތުވެފައިވަނީ ވެލި ނެންގެވި ބިމުގައި ހުރި ވެލީގެ ކުލައާއި ޠޮބީޢަތާއި މިޒާޖުގެ ތަފާތު ހުރި ނިސްބަތުންނެވެ)"

އަހަރުމެންގެ އަސްލަކީ މިއީ ކަމުގައި ވާއިރު، އެކި ނަސްލުގެ އެކި މީހުންގެ ގައިގައި ތަފާތު އެކި ސިފަތައް ހުރުން އެއީ އަޖައިބުވާން ޖެހޭ ވަރުގެ ކަމެއް ނޫނެވެ. އަދި އެ ތަފާތުތަކުގެ މައްޗަށް ނަޒަރު ހިންގައި ބަލައިލުމަކީ އެއީ މައްސަލައެއް އޮތް ކަމެއް ވެސް ނުމެނޫންމެ އެވެ.

ދުނިޔޭގެ އެކި ދަރިފަސްކޮޅުގެ އެކި ނަސްލުގެ މީހުންގެ ތެރޭގައި ހުންނަ އެންމެ ބޮޑު އެއް ތަފާތަކަށް ހަމަ ޔަގީނުން ވެސް ބޮލުގެ އިސްތަށިގަނޑު ވާނެ އެވެ. އެއްބައެއްގެ އިސްތަށީގައި ބަނޑިއެއްހައި ހިސާބު ވެސް ނުހުންނަ އިރު އަނެއް ބައެއްގެ އިސްތަށިގަނޑުގައި އިސްތިރި އަޅައިގެން ނޫނީ ހަމަދިގުމިނަށް ދެމިވެސް ނުލަ އެވެ.

ސުވާލު އުފެދެނީ މިހާ ހިސާބުންނެވެ. އެއްބައެއްގެ ބޯބުޅި ވެފައި އަނެއް ބައެއްގެ ބޯފަން ވަނީ ކީއްވެބާ އެވެ؟ އެއީ އެބަޔަކު ދިރިއުޅޭ މާހައުލަށް ހޭނުމުގެ ގޮތުން ހަށިގަނޑަށް އަންނަ ބަދަލަކީ ބާވައެވެ؟ ނުވަތަ އެއީ އިންސާނާގެ މައިފުށުން ނުވަތަ ބަފާފުށުން ވާރުތަވާ ޖެނެޓިކްސްއާ ގުޅުން ހުރި ކަމެއް ބާވައެވެ؟ މިހެން ދިމާވާން މެދުވެރިވާ ސަބަބަކީ ކޮބައި ބާވައެވެ؟

ތަފާތު ވައްތަރުގެ އިސްތަށިގަނޑާ ބެހޭ ގޮތުން އެނގެނީ ކޯޗެއް؟

އިސްތަށިގަނޑުގެ ބޯމިނާއި ވައްތަރު ބިނާ ވަނީ ބޮލުގެ އިސްތަށި ވަޅުތަކުގެ ފުންމިނާއި އޭގެ ބައްޓަމުގެ މައްޗަށެވެ. އިސްތަށި ވަޅހު ފުން ވާވަރަކަށް ބޮލުގައި ފަޅާ އިސްތަށި ވަރުގަދަވެ އެވެ. އަދި އެ ވަޅުތައް ތިލަވަ ވަރަކަށް ބޮލުގައި ފަޅާ އިސްތަށިތައް ނިކަމެތިވެ އެވެ.

ދެން އޮތީ އިސްތަށިގަނޑު ބޯވުމާއި ތުނި ވުމެވެ. މިކަން ބަރޯސާވެފައި އޮންނަނީ ބޮލުގައި ހުންނަ އިސްތަށިވަޅުތަކުގެ މަދުގިނަ މިނުގެ މައްޗަށެވެ. އާންމުކޮށް އިންސާނެއްގެ ބޮލުގައި 100،000އާ ހަމައަށް އިސްތަށި ވަޅު ހުންނަ ކަމަށްވެ އެވެ. އެހެންކަމުން ބޮލުގެ އިސްތަށިގަނޑު ތުނި ނަމަ އޭގެ މާނައަކީ ބޮލުގައި ހުންނަ އިސްތަށި ވަޅުތައް މަދު ކަމެވެ.

އިސްތަށީގެ ވައްތަރުތައް ތަފާތުވުމުގައި ވެސް އެންމެ މުހިއްމު ދައުރެއް އަދާ ކުރަނީ އިސްތަށީގެ ބުޑާއި އޭގެ ބައްޓަމެވެ. ބޮލުގައި ހުންނަ އިސްތަށި ބުޑުތަކުގެ ބައްޓަން ވަށްބުރަށް ހުންނަ ކަމަށްވާނަމަ ފަޅާނީ ފަން އިސްތައްޓެވެ. އެ ބުޑުތައް ކުކުޅު ބިސްބުރަށް ހުންނަ ނަމަ ފަޅާނީ ރާޅުބާނީ އިސްތައްޓެވެ. އަދި އެ ބުޑުތައް ފަތިކޮށް ހުންނަ ނަމަ ފަޅާނީ ބުޅި އިސްތައްޓެވެ.

އެފްރިކާ ބައްރުގެ ބުޅިބޮލާއި އޭޝިއާ ބައްރުގެ ފަންބޯ

އެފްރިކާ ބައްރުގެ މީހުންގެ ބޮލުގެ އިސްތަށިގަނޑު ހަމައެކަނި ބުޅީއަކީ ނޫނެވެ. ހުންނަ ގޮތް ވެސް އެހެން ހުރިހާ އެންމެނާއި ތަފާތެވެ. ހަމަ އެގޮތަށް އޭޝިއާގެ ޖަޕާން، ޗައިނާ އަދި ކޮރެއާ ފަދަ ގައުމުތަކުގެ އަހުލުވެރިންގެ ބޮލުގެ އިސްތަށިގަނޑު އެހާ ފަށުތްވެވެ. އެކަމަކު އެއީ ކީއްވެ ހެއްޔެވެ؟

ދެހާސްފަސްވަނަ އަހަރު އެމެރިކާގެ ސްޓެންފޯޑް ޔުނިވާސިޓީގައި ޕީއެޗުޑީ ހާސިލު ކުރަމުންދިޔަ ދަރިވަރެއް ކަމަށްވާ އޭން ޓެކްލެންބާގު މި މައުލޫގައި ދަ ޓެކް އިންޓަރެކްޓިވްގައި ޝާއިރު ކޮށްފައިވާ ލިޔުމެއްގައި ވަރަށް ބޮޑަށް މިކަމަށް އަލި އަޅުވާލައިފައިވެ އެވެ.

އެ ލިޔުމުގައި ބުނެފައިވާ ގޮތުން އެކަމާ ގުޅޭގޮތުން ކުރެވިފައި ހުރި ދިރާސާތަކުން ދައްކާ ގޮތުގައި އެފްރިކާ ނަސްލުގެ މީހުންގެ ބޮލުގައި ސީބަމް އޭ ކިޔާ ތެލެއް ގިނަ އަދަދަކަށް އުފައްދަ އެވެ. މިއީ ގުދުރަތީ ގޮތުން ބޮލުގައި އުފެދޭ ތެލެކެވެ. މި ތެލަކީ ބޮލުގެ އިސްތަށިގަނޑުގެ ސިއްހަތު ރަނގަޅުކޮށްދޭ ތެލެކެވެ. މިތެޔޮ ބޮލުގައި އުފެދޭ މިންވަރު އިތުރުވުމުގެ ނަތީޖާއެއްގެ ގޮތުން އެފްރިކާ ދަރިކޮޅުގެ މީހުންގެ ބޮލުގެ އިސްތަށިގަނޑު އިންތިހާއަށް ވަރުގަދަވެ އެވެ.

ނަމަވެސް އެފްރިކާ ދަރިކޮޅުގެ މީހުންގެ ބޮލުގެ އިސްތަށިގަނޑު ބުޅިކަމުން މި ތެލުގެ އަސަރު މުޅި ބޮލަކަށް ނުކުރެ އެވެ. މިއީ އެ މީހުންގެ އިސްތަށިގަނޑު އިތުރަށް ބުޅިވެ ހަރުވާ މައިގަނޑު ސަބަބެވެ. އަސޭމިރުސް ފުއްފުއް ގޮތަށާއި ފޯލި ފޯއްޔަށް އެފްރިކާ ދަރިކޮޅުގެ މީހުންގެ އިސްތަށިގަނޑު ހުންނަނީ މިހެންވެ އެވެ.

މިހާތަނަށް މި މައްސަލައިގައި ކޮށްފައި ހުރި ދިރާސާތަކުން ދައްކާ ގޮތުގައި ބުޅިބޮލާއި ފަންބޮލަކީ ވެސް ޖެނެޓިކަލީ ވާރުތަވާ އެއްޗެއްކަން އެނގެ އެވެ. އެހެންކަމުން މަތީގައި ފާހަގަކޮށްފައި އެވާ ފަދައިން އިންސާނުން އުފެދިގެން އައި ގޮތުގެ ސަބަބުން އަހަރުމެންގެ ތެރޭގައި މި ތަފާތުތަކެއް ހުރީ އެވެ. އިސްތަށިގަނޑު ބުޅިވުމާއި ފަންވުން ވާރުތަވާން މެދުވެރިވަނީ ކޮން ޖީންއަކާ ހުރެކަން އަދި ދެނެގަނެވިފައި އެއް ނުވެ އެވެ.

މިކަމުގައި ދެން އޮތީ ދިރިއުޅޭ މާހައުލާ އޮތް ގުޅުމެކެވެ. އެފްރިކާ ބައްރުގެ ގައުމުތަކަކީ ހަނަފަސްކަން ބޮޑު އަދި އެހާމެ ހޫނު ގައުމުތަކަކަށް ވާތީ އިރުގެ ހޫނުން އެމީހުންނަށް ކުރާ އަސަރު ބޮޑުވެ އެވެ. އިރުގެ ހޫނަކީ، އޭގެ ސަބަބުން އިންސާނާގެ ހަންގަނޑަށް ވެސް ބޮޑެތި އަސަރުތަކެއް ކުރާ އެއްޗެކެވެ. އެހެންކަމުން އިންސާނުން އުފައްދަފާއި ވަނީ އެ ބަޔަކު ދިރިއުޅޭ މާހައުލެއްގައި ސަލާމަތުން ދިރިއުޅެވޭނެ ފަދަ ގޮތަކަށެވެ. އެފްރިކާ މީހުންގެ ބުޅި ބޮލުގެ އިތުރުން އެމީހުންގެ ހަންގަނޑު އުފެދިފައިވާ ގޮތުގެ ސަބަބުން އެމީހުންނަށް އިރުގެ ދޯދިތަކުން ލިބޭ ގެއްލުން ކުޑަކޮށްދެ އެވެ. މިއީ އޭޝިއާ ފަދަ ސަރަހައްދުތަކުގައި ދިރިއުޅޭ މީހުންނާ އެމީހުން ތަފާތުވާ އެންމެ ބޮޑު އެއް ސަބަބެވެ.

އެހެންކަމުން ބުޅިބޮލާއި ފަންބޮލުގެ ވާހަކަ ގޮސް ނިންމާލަން ޖެހެނީ އަހަރުމެން އިންސާނުންގެ ފެށުމާ ހަމައިންނެވެ. އަހަރުމެންގެ އަސްލު ގުޅިފައި އޮތީ ދުނިޔޭގެ އެކި ކަންކޮޅުތަކުގައި ހުރި ތަފާތު ވެއްޔާ އެވެ. އަހަރުމެންގެ ބޮލުގެ ފަންކަމާއި ބުޅިކަން ގުޅިފައި އޮތީ އަހަރުމެންގެ ނަސްލުތަކުގެ އަސްލާ އެވެ. މިއީ ބަދަލު ނުވާނެ ހަގީގަތެކެވެ. މި މައުލޫގައި އިތުރަށް ދިރާސާ ކުރަމުންދާ މިންވަރަކުން މިކަމާ ގުޅޭ އިތުރު މައުލޫމާތުތައް އެނގި ހާމަވަމުން ދާނެކަން ޔަގީނެވެ.