ޕާކިސްތާން ތެހްރީކޭ އިންސާފް ޕާޓީ (ޕީޓީއައި) ގެ ލީޑަރުކަމުގެ ކުރީގެ ބޮޑު ވަޒީރު އިމްރާން ހާން ވަކިކުރުމުގެ މަސައްކަތް އެ ގައުމުގެ އިލެކްޝަންސް ކޮމިޝަނުން ފަށައިފި އެވެ.

އެ މަސައްކަަތް ފެށީ ބޭރުގެ އިއްޒަތްތެރިން ދައުލަތަށް ހަދިޔާ ކުރި ތަކެތި ބައްލަވައި ގަަނެ، އެ ތަފްސީލް އިލެކްޝަން ކޮމިޝަނާ ހިއްސާ ނުކުރައްވާ ކަމަށް ބުނާ މައްސަލައެއްގަ އެވެ.

މިދިޔަ އޮކްޓޯބަރު މަހު އެ ކޮމިޝަނުން ބުނީ އިމްރާން ހާން "ކޮރަޕްޓް އަމަލުތައް" ހިންގެވިކަން ސާބިތުވާ ކަމަށެވެ. އެހެންވެ، 2018 ވަނަ އެމަނިކުފާނު ވޯޓު މެދުވެރިކޮށް ހޯއްދެވި ޕާލަމެންޓު ގޮނޑި ގެއްލިފައިވާ ކަމަށް ކަނޑައެޅި އެވެ.

އިމްރާން ހާނަށް ފޮނުއްވި ނޯޓިސްއެއްގައި ބުނީ އެ މައްސަލައިގެ އަޑުއެހުމެއް ޑިސެމްބަރު 13 ގައި އޮންނާނެ ކަމަށެވެ. ޕީޓީއައިއިން ބުނީ އިލެކްޝަންސް ކޮމިޝަންގެ ޒިންމާއަކީ އިންތިހާބުތަކުގެ ކަންކަން ބެލެހެއްޓުން ކަމަށާއި ސިޔާސީ ޕާޓީއެއްގެ ވެރިޔަކު މަގާމުން ވަކިކުރުމުގެ ބާރު އެ ކޮމިޝަނަށް ނޯންނާނެ ކަމަށެވެ.

އޭގެ އިތުރުން ކުރީގެ ބޮޑު ވަޒީރު ނަވާޒް ޝަރީފަށް ދިމާވެވަޑައިގެންނެވި ގޮތް އިމްރާން ހާނަށް ކުރިމަތިވެވަޑައިނުގަންނަވާނެ ކަމަށް އެ ޕާޓީއިން ބުންޏެވެ.

ނަވާޒް ޝަރީފް ބޮޑު ވަޒީރުކަމުން ވަކިކުރީ 2018 ވަނަ އަހަރު ސުޕްރީމް ކޯޓުންނެވެ. "އިހްލާސްތެރި ނޫން" ކަމަށް ކަނޑައަޅައި އެމަނިކުފާނު އެއްވެސް ޕާލަމެންޓް ގޮނޑިއަކަށް ވާދަކުރުން މަނާކުރި އެވެ. އޭގެ ފަހުން ޕާކިސްތާން މުސްލިމް ލީގް ނަވާޒް (ޕީއެމްއެލް-އެން) ގެ ލީޑަރުކަމުން ވެސް ވަކިކުރި އެވެ.