ކްލަބް މޯލްޑިވްސް ކަޕްގެ އަންހެން ޑިވިޝަން 18/30 ފުޓްސަލް ފިއެސްޓާގެ ތަށި އަށް އަހަރަށް ފަހު ދިވެހި ސިފައިންގެ ކްލަބް (ޑީއެސްސީ) އިން މި ފަހަރު ހޯދިއިރު، އެ ކާމިޔާބީ ހާއްސަވާނެ އެއް ކުޅުންތެރިއަކީ ބޮޑު އަނިޔާއަކުން ސަލާމަތްވެގެން މިދިޔަ އަހަރު އެނބުރި އައި ޓީމުގެ ކެޕްޓަން، އައިމިނަތު ޒާހިޔާ (ޒެޑޭ) އަށެވެ.

އެންމެ ފަހުން ތިން ފަހަރު ޗެމްޕިއަންކަން ހޯދި އެމްޕީއެލް އަތުން ފައިނަލުގައި ސިފައިން 10-2 އިން މޮޅުވި މެޗަކީ މިދިޔަ ދެ އަހަރުގެ މުބާރާތުގައި ވެސް ޒާހިޔާގެ ފަރާތުން އެންމެ މޮޅު ކުޅުމެއް ފެނުނު މެޗެވެ. ޒާހިޔާ އަކީ ސިފައިންގެ ޓީމުން މީގެ ކުރިން 2013 އާއި 2014 ވަނަ އަހަރު ތަށި ހޯދިއިރު، ޓީމުގައި ތަފާތު ދެއްކި ކުޅުންތެރިއެކެވެ. އެކަމަކު، މި ފަހަރުގެ ކާމިޔާބީގައި ޒާހިޔާގެ ރޯލު ކުރިން ފަހަރުތަކަށް ވުރެން ތަފާތު ވިޔަސް، އޭނާ ދެއްކި ހިތްވަރު ފާހަގަކުރަން ޖެހެ އެވެ.

ސީރިއަސް އަނިޔާ އަކުން ރަނގަޅުވެ، ޒާހިޔާ ކުޅުމަށް އެނބުރި އައިތާ މިވީ ކުރު މުއްދަތުގައި އޭނާ އާންމު ގޮތެއްގައި ނުކުޅޭހާ ގިނަ ވަގުތު ދަނޑުމަތީގައި ހުރެ ކުޅުނީ މި ފަހަރުގެ ފައިނަލުގަ އެވެ. އެ މެޗުގައި ލަނޑުު ޖެހުމުގެ އިތުރުން ގޯލު ސަލާމަތްކުރަން ކީޕަރު ސާއިގާ ހުސެއިންގެ އެންމެ ބޮޑު އެހީތެރިއަކަށް ހުރެ، ޒާހިޔާ ވަނީ ހިތްވަރު ގަދަ ކުޅުމެއް ދައްކައިފަ އެވެ.

"ހަތަރު އަހަރުގެ ބްރޭކަކަށް ފަހު، މި ސްޓާޓްކުރީ، ވަރަށް ބިރުން ހުންނަނީ އަސްލު، އެކަމު، މި ފައިނަލް މެޗުގައި އަޅުގަނޑުގެ ޓާގެޓަކަށް ވީ މި ތަށި، އަޅުގަނޑުގެ ބިރު ކަނޑާލާފައި ދަނޑަށް ނުކުތީ، ހަމަ މި ތަށި ވިން ކުރަން،" ފައިނަލް މެޗަށް ފަހު، ދިން އިންޓަވިއުގައި ޒާހިޔާ ބުންޏެވެ.

ގައުމީ ޓީމަށް އެންމެ ގިނަ މެޗު ކުޅެދިން ކުޅުންތެރިންގެ ތެރޭގައި ހިމެނޭ ޒާހިޔާ އަށް އަނިޔާވީ 2018 ވަނަ އަހަރު ގައުމީ އަންހެން ޓީމުން ބަހްރޭނާ ދެކޮޅަށް އެ ގައުމުގައި ކުޅުނު މެޗުގަ އެވެ. އެ މެޗުގައި ޒާހިޔާގެ އަތްބިންދައިގެން ގޮސް، އޭނާ އިތުރު ފަރުވާ އަށް އެމްބިއުލަންސްގައި ހޮސްޕިޓަލަށް ގެންދިޔަ އެވެ. ޒާހިޔާގެ އަތްބިންދައިގެން ދިޔައިރު، ދެ ކަށިގަނޑު އެއްކޮށް ދިއުމުން އޭރު ވެސް އޭނާ އަށް އޮތް ބިރަކީ "އެނބުރި ދަނޑަށް އާދެވޭނެތޯ" އުފެދޭ ސުވާލަށް ޔަގީން ޖަވާބެއް ސިކުނޑީގައި ވެސް ނެތުމެވެ.

ބަހްރޭނުގައި ފުރަތަމަ އޮޕަރޭޝަނެއް ކުރިއިރު، އަތުގައި ދަގަނޑު ޕްލޭޓެއް އަޅައި، އެތެެރެއިން ބޯލްޓް ލައްވައިގެން، ދުވަސްތައް ގުނީ އަނިޔާއިން ރިކަވަރީވުމަށް ޝެޑިއުލެއް ހަދައިގެންނެވެ.

އެކަމަކު، މާލެ އައިސް ރިކަވަރީ މުއްދަތުގައި އިތުރު ކަންތައްތަކާ ކުރިމަތިލާން ޖެހުނެވެ. އައިޖީއެމްއެޗުން އިތުރު އޮޕަރޭޝަނެއް ކުރުމުން ވެސް އަތުގައި ހުރި ރިހުމަށް ލުޔެއް ނުލިބި ދިއުމުން، ދެން ޖެހުނީ އިތުރު ޑޮކްޓަރެއްގެ ލަފާ ހޯދާށެވެ. އެހެންވެ، ޓްރީޓޮޕަށް ދައްކައިގެން ބެލިއިރު، އަތުގެ ކަށިގަނޑު އޮތީ ފީވެފަ އެވެ. އެހެންވެ، އަތުގެ އެ ކަށިގަނޑު ބުރިކޮށްލައިގެން ވެސް ކުޅުން ކުރިއަށްގެންދަން ބޭނުންވާތީ އެ ގޮތަށް ކުރިއަށް ދިޔައީ އެވެ. މިހާރު އޭނާ ކުޅެމުން އެ ދަނީ އަތުގައި ބޭންޑެއް އަޅައިގެން ވެސް ހުރި ހިތްވަރެއް ނެރެގެންނެވެ.

އެމްޕީއެލް ކޮޅަށް ސިފައިންގެ ތިން ވަނަ ގޯލު ޖެހި ޒާހިޔާ އުފާފާޅުކުރަނީ.--- ފޮޓޯ: އަބްދުﷲ އިޔާން/ އަދަދު

އުނދަގޫ ހަތަރު އަހަރަކަށް ފަހު ޒާހިޔާ އެނބުރި ދަނޑަށް އައިސް ގައުމީ ޖޯޒީގައި ވެސް ވަނީ ފެނިފަ އެވެ. އެއީ ދާދި ފަހުން ނިމިގެންދިޔަ އަންހެން ސާފް ވިމެންސް ޗެމްޕިއަންޝިޕަށް ދިޔަ ޓީމުގައި ހިމެނިގެންނެވެ.

ސާފަށް ފަހު ޒާހިޔާ ސިފައިންގެ ޓީމު ލީޑުކޮށްފައި މިވަނީ ކްލަބް މޯލްޑިވްސް ކަޕްގައި ނަމޫނާ ކެޕްޓަނެއްގެ ގޮތުގައި ހުރެ އެވެ.

"މިއީ އަޅުގަނޑުމެންގެ ކުޅުންތެރިން ކުރި ބުރަ މަސައްކަތުގެ ނަތީޖާ. މަދު ދުވަސްކޮޅެއްގައި ކޯޗާ އެކު މަސައްކަތް ކުރެވުނީ، ޕްރެކްޓިސްގައި ރަނގަޅަށް ބައިވެރިވެ، ހުރިހާ ކުޅުންތެރިން އެކައްޗެއް ކިޔައިގެން، ފުރަތަމަ ދުވަހުން ފެށިގެން ކުރި މަސައްކަތުގެ ނަތީޖާ މިއީ،" ކްލަބް މޯލްޑިވްސް ކަޕްގެ 18/30 ފުޓްސަލް ފިއެސްޓާގެ ތަށި ހޯދަން ސިފައިންގެ ޓީމު ކުރި މަސައްކަތަށް އިޝާރާތްކޮށް ޒާހިޔާ ބުންޏެވެ.

މިދިޔަ އަހަރު ސިފައިންގެ ކްލަބުން ރަނގަޅަށް ކުރިއަށް ދަނިކޮށް ސެމީގައި ބަލިވީ ކްލަބް ވެމްކޯ އަތުންނެވެ. ސިފައިން ވަނީ މި ފަހަރު ސެމީގައި ވެމްކޯ ބަލިކޮށް މިދިޔަ އަހަރުގެ ބަދަލުހިފައިފަ އެވެ. ސެމީގެ ކާމިޔާބީއާ އެކު ފައިނަލަށް ނުކުތީ ވަރަށް ބޮޑު އިތުބާރަކާ އެކު އެވެ.

"ސެމީން މޮޅުވީމަ އަޅުގަނޑުމެން ކޮންފިޑެންސް އޮތް، އަދި ގްރޫޕް ސްޓޭޖުގައި އެމްޕީއެލް އަތުން ބަލިވެފައި (5-1 އިން ބަލިވެފައި) އޮތް ކަމުގައި ވިޔަސް، ކޮންފިޑެންސް އޮތް މަސައްކަތް ކޮށްފިއްޔާ ވާނެކަން (ޗެމްޕިއަންކަން ހޯދޭނެކަން)،" ޒާހިޔާ ބުންޏެވެ.

ސިފައިންގެ ޓީމުގެ ކާމިޔާބީގައި ހިއްސާ ބޮޑު އެއް ކުޅުންތެރިއަކީ ކުރިން ޕޮލިސް ކްލަބުން މި މުބާރާތުގައި ފެނުނު ފާތިމަތު ތީބާ އެވެ. ޕޮލިސް މި ފަހަރު ބައިވެރިނުވާތީ ތީބާ ސިފައިންގެ ޓީމަށް ގެނައީ އޭނާއާ މެދު ވަރަށް ބޮޑު "ޔަގީންކަމެއް" އޮތުމުން ކަމަށް ޒާހިޔާ ވަނީ ބުނެފަ އެވެ.

ސިފައިންގެ ޓީމުން މުބާރާތުގެ ތަށި ތިން ވަނަ ފަހަރަށް އުފުލާލިއިރު، އެ ޓީމަށް ބަންގްލަދޭޝްގެ ދެ ކުޅުންތެރިން ކަމަށްވާ ސަބީނާ ހަތުން އާއި މަތުސުޝިމާ ސުމައްޔާ ވަނީ މޮޅު ކުޅުމެއް ދައްކައިފަ އެވެ. އެ ދެ ކުޅުންތެރިންނަށް ސަޕޯޓް ދިނުމަށާއި ސިފައިންގެ ޓީމަށް ހިތްވަރުދޭން މެޗުތަކަށް އައި ބަންގްލަދޭޝްގެ މީހުން، ސިފައިންގެ މި ކާމިޔާބީގައި މުހިންމު ދައުރެއް އަދާކުރި ކަމަށް ޒާހިޔާ އެއްބަސްވެ އެވެ.