ބާސެލޯނާ (އޮކްޓޫބަރު 9) - ބާސެލޯނާ އިން ލޯނެއްގެ ގޮތުގައި އެތުލެޓިކޯ މެޑްރިޑަށް ދޫކޮށްފައިވާ ފްރާންސްގެ ފޯވަޑް އޮންޓޮއިން ގްރީޒްމަން، އެތުލެޓިކޯ އަށް ވިއްކާލުމަށް އެ ދެ ކްލަބުގެ މެދުގައި އެއްބަސްވުމަކަށް އާދެވިއްޖެ އެވެ.

މިދިޔަ އަހަރު ގްރީޒްމަން، 31، ބާސެލޯނާ ދޫކޮށް ކުރީގެ ކްލަބް އެތުލެޓިކޯ މެޑްރިޑަށް ބަދަލުވީ ދެ އަހަރުގެ ލޯން އެއްބަސްވުމެއްގެ ދަށުންނެވެ. އެ ކޮންޓްރެކްޓްގައިވާ ބައެއް މާއްދާތަކަށް ބަލާއިރު، އަންނަ އަހަރު އެތުލެޓިކޯ އިން ގްރީޒްމަންގެ އެއްބަސްވުން ދާއިމީ ކުރަން ޖެހޭ ހާލަތްތަކެއް ހިމެނެ އެވެ.

އޭގެ ތެރެއިން އެއް މާއްދާ އަކީ އެތުލެޓިކޯގެ މެޗުތަކުގައި ގްރީޒްމަން 50 ޕަސެންޓް މިނިޓް ކުުޅުމެވެ. އެ ގޮތުން އެ މިނިޓްތަކުގެ ޖުމްލަ އެއްކޮށްލައިގެން ވަކި ވަރަކަށް މެޗުގެ އަދަދު ވެސް ހަމަވާންޖެހެ އެވެ. އެ އަދަދު ހަމަވެއްޖެނަމަ ބާސެލޯނާ އަށް ގްރީޒްމަންގެ ފީގެ ގޮތުގައި އެތުލެޓިކޯ އިން 40 މިލިއަން ޑޮލަރު ދައްކަން ޖެހޭނެ އެވެ.

ލޯނު އެއްބަސްވުމުގެ މި މައްދާތަކަށް ވިސްނާފައި، އެތުލެޓިކޯގެ ކޯޗު ޑިއޭގޯ ސިމިއޯނީ ގިނަ މެޗުތަކުގައި ގްރީޒްމަން ބޭނުންކޮށްފައިވަނީ ބަދަލު ކުޅުންތެރިއެއްގެ ގޮތުގަ އެވެ. އަދި ގިނަ މެޗުތަކުގައި އޭނާ ކުޅެފައިވަނީ ވެސް 30 މިނިޓަށްވުރެ މަދުކޮށެވެ.

މި މައްސަލައިގައި އެތުލެޓިކޯ އާއި ބާސެލޯނާއާ ދެމެދު އުފެދުނު ދެބަސްވުންތައް ހައްލުކޮށް، ގްރީޒްމަން ވިއްކާލުމަށް ދެ ކްލަބުގެ މެދުގައި ވަނީ އެއްބަސްވުމަކަށް އާދެވިފަ އެވެ.

ބާސެލޯނާގެ ކޯޗު ޒަވީ ވެސް ވަނީ ގްރީޒްމަންގެ ޓްރާންސްފާއާ ގުޅޭ ގޮތުން ދެ ކްލަބުގެ މެދުގައި އެއްބަސްވުމަކަށް އާދެވިފައިވާކަން ކަށަވަރުކޮށްދީފަ އެވެ.

"ގްރީޒްމަން ވިއްކާލުމަށް ދެ ކްލަބުގެ މެދުގައި އެއްބަސްވުމަކާ ހަމައަށް އާދެވިފައިވާ ކަމަށް ކްލަބުން (ބާސެލޯނާ އިން) އަހަންނަށް އަންގައިފި. އެކަމަކު، އަދި އެކަން ރަސްމީކޮށް ނުނިމޭ. އެއްބަސްވުމަކާ ހަމައަށް އާދެވުމަކީ ހުރިހާ ފަރާތަކަށް ލިބޭ ހިތްހަމަޖެހުމެއް،" ޒަވީ ބުންޏެވެ.

މީޑިއާ ރިޕޯޓްތަކުން ބުނާގޮތުގައި ބާސެލޯނާ އާއި އެތުލެޓިކޯ އިން އެއްބަސްވީ ލޯނު އެއްބަސްވުން ހަމަވުމުން، އަންނަ އަހަރު 20 މިލިއަން ޑޮލަރުގެ ޓްރާންސްފާ ފީއެއްގައި އެތުލެޓިކޯ އަށް ގްރީޒްމަން ބަދަލުވުމަށެވެ.

މީގެ ތިން އަހަރު ކުރިން، 2019 ވަނަ އަހަރު، ގްރީޒްމަން ބާސެލޯނާ އަށް ބަދަލުވީ އެތުލެޓިކޯއާ އެކު ހަދާފައިވާ އެއްބަސްވުން އުވާލަށް ދައްކަންޖެހޭ 135 މިލިއަން ޑޮލަރު ދައްކަން ބާސެލޯނާ އިން އެއްބަސްވުމުންނެވެ. އެ ފަހަރު ވެސް ދެ ކްލަބުގެ މެދުގައި ދެބަސްވުންތަކެއް އުފެދުނެވެ.

ގްރީޒްމަން ބާސެލޯނާއާ އެކު ފަސް އަހަރަށް ސޮއިކުރިއިރު، އެ ކޮންޓްރެކްޓް ހަމަވާނީ 2024 ގަ އެވެ. އެކަމަކު، ބާސެލޯނާ އަށް ދިމާވި މާލީ މައްސަލަތަކުގެ ތެރޭގައި ގްރީޒްމަން ލޯނަށް ދޫކޮށްލަން އޭރު ނިންމީ އެވެ.