މާލޭގައި މިހާރު ކުރިއަށްދާ ދެކުނު އޭޝިއާގެ އަންހެން ބާސްކެޓްބޯޅަ މުބާާރާތް، ސާބާ ވިމެންސް ޗެމްޕިއަންޝިޕްގައި މިރޭ ކުޅުނު މެޗުން އެންމެ ފަހުގެ ޗެމްޕިއަން ސްރީ ލަންކާ އަތުން މޮޅުވެ ނޭޕާލުން މުބާރާތުގައި ކާމިޔާބު ހޯދުމުގެ އުންމީދު ދަމަހައްޓައިފި އެވެ.

ފުރަތަމަ މެޗުން ނޭޕާލް ވަނީ ރާއްޖެ އަތުން 51-47 އިން ބަލިވެފަ އެވެ. ލަންކާ ވަނީ ރޭ ބޫޓާން އަތުން 98-33 އިން މޮޅުވެފަ އެވެ. އެކަމަކު، މިރޭ ނޭޕާލް އަތުން ލަންކާ ވަނީ 49-55 އިން ބަލިވެފަ އެވެ. މި ނަތީޖާއާ އެކު ނޭޕާލަށް ވަނީ އެންމެ ފަހުގެ ޗެމްޕިއަން އަތުން މޮޅެއް ލިބި މި ފަހަރުގެ މުބާރާތުގައި ކާމިޔާބު ހޯދަން ދިރުމެއް ލިބިފަ އެވެ.

ޒުވާނުންގެ މަރުކަޒު އެތެރެ ކޯޓުގައި މިރޭ ކުޅުނު މެޗު ފަށައިގެން ލަންކާ ޓީމުގެ ފަރާތުން ވަރުބަލިކަން ފެނުނުއިރު، އޭގެ ފައިދާ ވަރަށް ރަނގަޅަށް ނޭޕާލް ޓީމުން ނެގި އެވެ. ފުރަތަމަ ދެ ކުއާޓަރުގައި ވެސް ނޭޕާލް ފެނުނީ ލަންކާ އަށް ވުރެން ރަނގަޅަށް ސްކޯ ކުރިތަނެވެ. އެ ގޮތުން ފުރަތަމަ ދެ ކުއާޓަރު ނިންމާލިއިރު، ނޭޕާލް ކުރީގައި އޮތީ 21-32 އިންނެވެ.

މުޅި މެޗަށް ބަލާއިިރު ވެސް ލަންކާގެ ގޭމްގައި މިރޭ މައްސަލަ ދިމާވީ ސްކޯ ކުރުމުގަ އެވެ. ފްރީ ތުރޯ އާއި ތިން ޕޮއިންޓަށް އެއްލާ ބޯޅަތަކުގެ އިތުރުން ރީބައުންޑްތަކުގައި ވެސް ލަންކާގެ އަސްލު ފެންވަރު ދިޔައީ ނުދެއްކި އެވެ. މި މެޗުގައި ލަންކާ އަށް އެންމެ ގިނަ ޕޮއިންޓް ސްކޯކޮށްދިން ރަޝްމީ ތާނިޔާ 17 ޕޮއިންޓް އެއްކުރިއިރު، ރީބައުންޑް ބޯޅައިން ސްކޯ ކުރީ އެންމެ ދެ ޕޮއިންޓެވެ.

ލަންކާ ޓީމަށް ދެން މިރޭ އެންމެ ގިނަ ޕޮއިންޓް ސްކޯ ކޮށްދިނީ 11 ޕޮއިންޓް ހޯދި އެޕްސިބާ ވޮޝިންޓަން އެވެ.

ސްކޯރިން އަށް ބަލާއިރު ފަހު ދެ ކުއާޓަރުގައި ލަންކާ އިން ކުޅުން ރަނގަޅުކުރި އެވެ. އެކަމަކު، ގޭމް މެނޭޖްކޮށް އެޓޭކިން ޒޯންތަކުގައި ނޭޕާލުން ދެއްކި ރަނގަޅު ކުޅުން ވެގެންދިޔައީ ލީޑުގެއްލުނަނުދީ އެ ޓީމު މެޗުން މޮޅުވި ސަބަބަށެވެ.

މި މެޗުގައި ނޭޕާލްގެ ތިން ކުޅުންތެރިއަކު ވަނީ ލަންކާ ކައިރީގައި ތަފާތު މޮޅު ކުޅުމެއް ދައްކައިފަ އެވެ. އެއީ 21 ޕޮއިންޓް ސްކޯކުރި ޕްރަތިކްޝާ މަގަރް އާއި 14 ޕޮއިންޓް ހޯދި އަނޫޝާ މައްލާ އަދި އިސްކޮޅުން ކުރު ނަމަވެސް ތަފާތު ކުޅުމެއް ދައްކާ، މުނާ މަހާރްޖަން އެވެ. އޭނާ ވަނީ ޖުމްލަ އެކު ނުވަ ޕޮއިންޓް ސްކޯކޮށްފަ އެވެ.

މިއީ އަމިއްލަ ފަސްގަނޑުގައި 2016 ވަނަ އަހަރުގެ ސާބާ ވިމެންސް ޗެމްޕިއަންޝިޕްގައި ލަންކާ އަތުން ބަލިވުމުގެ ހަނދާން ނައްތާލަން ނޭޕާލަށް ލިބުނު ރަނގަޅު ނަތީޖާއެކެވެ. ލަންކާ އިން އެ ފަހަރު ސާބާ މުބާރާތް ކާމިޔާބުކުރީ ނޭޕާލް 75-49 އިން ބަލިކޮށްފަ އެވެ.

މިރޭގެ ނަތީޖާ އަށް ފަހު، މި ފަހަރުގެ މުބާރާތުގައި ލަންކާ އާއި ރާއްޖެ އަދި ނޭޕާލަށް ކޮންމެ ޓީމަކަށް ވަނީ އެއް މޮޅު ލިބިފަ އެވެ. ނޭޕާލާއި ލަންކާ ދެ މެޗު ކުޅުނުއިރު، ރާއްޖޭން ކުޅުނީ އެންމެ މެޗެކެވެ. ރާއްޖެ ކުޅޭ ދެ ވަނަ މެޗުގައި މާދަމާރޭ ލަންކާއާ ބައްދަލުކުރާނެ އެވެ.

ރާއްޖޭން ވަނީ އެންމެ ފަހުން 2019 ވަނަ އަހަރު ބޭއްވި ސައުތު އޭޝިއަން ގޭމްސްގައި ލަންކާގެ މައްޗަށް ކުރިހޯދައި، ސެމީ ފައިނަލަށް ދަތުރުކޮށްފަ އެވެ. މާދަމާރޭ ލަންކާ އަތުން މޮޅުވެއްޖެނަމަ މި ފަހަރުގެ ސާބާ މުބާރާތުން ރަން މެޑަލް ހޯދުމުގެ ފުރުސަތު ރާއްޖެ އަށް ވަރަށް ބޮޑަށް ފަހިވާނެ އެވެ.