މ. މުލަކުގައި މަސައްކަތްކުރާ ފުލުހެއްގެ ސައިކަލުގައި ބަޔަކު ރޯކޮށްލައިފި އެވެ.

ފުލުހުންގެ މީޑިއާ އޮފިޝަލް "އަދަދު" އަށް ވިދާޅުވީ މުލަކުގައި ފުލުހެއްގެ ސައިކަލުގައި ރޭގެ ވަގުތެއްގައި ރޯކޮށްލާފައިވާ ކަމަށެވެ.

އެކަމާ ގުޅިގެން ބަލަން ޖެހޭ ކަންކަން ބަލަމުން ދާއިރު އެކަމާ ގުޅޭ އިތުރު މައުލޫމާތެއް ފުލުހުން ނުދެ އެވެ.

ފުލުހުން އެ މައްސަލަ އިތުރަށް ތަހުގީގުކުރަމުން ދާއިރު، ފުލުހުންނާ ދެކޮޅަށް ހިންގާ އަމަލުތައް އިތުރުވަމުންދާ ކަމަށް ފާހަގަ ކުރެވެ އެވެ. އެގޮތުން މާލޭގައި ދެ ފުލުހެއްގެ ގައިގައި ވަނީ މަގުމަތިން މި މަހުގެ ތެރޭގައި ތަޅައިގަނެފަ އެވެ. އަދި ވައްކަން ކުރަން އުޅުނުކަމުގެ ތުހުމަތުގައި މީހަކު ހައްޔަރު ކުރުމުން ބަޔަކު ޕޮލިސް ސްޓޭޝަނަކަށް ވަދެ ފުލުހުންނަށް ވަނީ އިންޒާރު ދީފަ އެވެ.

އޭގެ އިތުރުން ބައެއް ރަށްރަށުގައި ވެސް ފުލުހުންނާ ދެކޮޅަށް ހަމަލާތަކެއް ވަނީ ދީފަ އެވެ. އެގޮތުން މި އަހަރުގެ ފެބްރުއަރީ މަހު ނ. މިލަދޫގައި މަސްތުވާތަކެތީގެ ވިޔަފާރީ ކުރަން އުޅުނު މީހެއް ހުއްޓުވުމުން، އެ އޮފިސަރަށް އިންޒާރުދީ، އޭނާގެ ސައިކަލުގައި ވެސް ރޯކޮށްލި އެވެ.

މައުލޫމާތު ލިބިފައިވާ ގޮތުގައި އެ ސައިކަލުގައި ރޯކޮށްލީ އެ ފުލުސް މީހާ ދިރިއުޅޭ ގޭގައި ހުއްޓަ އެވެ.

އެ މައްސަލާގައި މުދަލަށް ގެއްލުންދިނުމުގެ ދައުވާއާ، ހުއްދަ ނެތި އެެގެއަށް ވަދުމުގެ ދައުވާވެސް ކުރެވޭނެ އެވެ. ސާބިތު ކުރެވިއްޖެ ނަމަ، 3-5 އަހަރާ ދެމެދުގެ ހުކުމެއް އަންނާނެ އެވެ.