މަންޓާ އެއާއިން ކެބިން ކްރޫއިން ތަމްރީނު ކުރުމުގެ ޕްރޮގްރާމެއް ފަށައިފި އެވެ.

ހަ ހަފްތާގެ މުއްދަތަށް ކުރިއަށް ގެންދިއުމަށް ހަމަޖެހިފައިވާ މި ތަމްރީނު ޕްރޮގްރާމަކީ ސްޕޮންސާ ކޮށްފައިވާ ޕްރޮގްރާމެކެވެ. ތަމްރީނު ޕްރޮގްރާމުގައި ބައިވެރިވުމުގެ ފުރުސަތު ހުޅުވާލާފައި ވަނީ މިމަހު 28 ވަނަ ދުވަހުގެ ނިޔަލަށެވެ.

މަންޓާއިން ބުނީ މި ތަމްރީނުގައި ބައިވެރިވެވޭނީ އުމުރުން 18 އަހަރު ފުރިފައިވާ، އޯލެވެލްގެ ތިން މާއްދާއިން 'ސީ' ފާސް ލިބިފައިވާ މީހުންނަށް ކަމަށެވެ. އަދި އިތުރު އެހީއަކާ ނުލާ މަދުވެގެން 50 މީޓަރު ފެތުމުގެ ގާބިލުކަން ހުރި، ފަރިތަކޮށް އިނގިރޭސިން ލިޔަން ކިޔަން އެނގުމުގެ އިތުރަށް އެހެން މީހުންނާ ގުޅިގެން އުޅުމުގެ ހުނަރު ހުރުމަކީ މުހިންމު ކަމެއް ކަމަށް މަންޓާއިން ބުނެ އެވެ.

މަންޓާއިން ބުނީ ކެބިން ކްރޫ ތަމްރީނު ފުރިހަމަ ކުރާ ބައިވެރިވެރިންނަށް ވަޒީފާގެ ފުރުސަތު ހުޅުވާލާނެ ކަމަށާއި، ތަމްރީނުގައި ބައިވެރިވެވޭނީ ވަކި އަދަދެއްގެ ބައިވެރިންނަށް ކަމަށެވެ.

މަންޓާ އެއާއަކީ އެތެރޭގެ އުދުހުންތަކުގައި ފަސް ތަރީގެ ހިދުމަތްދޭ ހަމައެކަނި އެއާލައިނުގެ ގޮތުގައި މަޝްހޫރުކަން ހޯދާފައިވާ އެއާލައިނެކެވެ. އެންމެ ހަގު ދިވެހި އެއާލައިން ކަމުގައިވީ ނަމަވެސް, ކުޑަ ދުވަސްކޮޅެއްގެ ތެރޭގައި މަންޓާއިން ވަނީ ހިދުމަތުގެ ފުރިހަމަ ކަމަށް ކަސްޓަމަރުންގެ މެދުގައި އިތުބާރު ހޯދައިފަ އެވެ.