އެފްއޭ ކަޕްގެ ތިން ވަނަ ހޮވާ މެޗު, ސުޕަ ޔުނައިޓެޑް ސްޕޯޓްސް ކްލަބް (ސަސް) އިން ނުކުޅެން ނިންމުމާ އެކު ކްލަބް ގްރީން ސްޓްރީޓްސް އަށް މުބާރާތުގެ ތިން ވަނަ ލިބިފައިވާ ކަމަށް އެފްއޭއެމުން ބުނެފި އެވެ.
އެފްއޭއެމުން ދާދި ފަހުން ނެރުނު ނޫސްބަޔާނެއްގައި ބުނެފައިވަނީ އާދިއްތަ ދުވަހު ހަވީރު ސަސް އާއި ގްރީން ސްޓްރީޓްސް ކުޅެން އޮތް އެފްއޭ ކަޕްގެ ތިން ވަނަ ހޮވާ މެޗުގައި ސަސް އަށް ބައިވެރިވެވެން ނެތްކަން އަންގާފައިވާ ކަމަށެވެ.
އެހެންވެ، އެފްއޭއެމުން ނިންމީ ތިން ވަނަ ހޮވާ މެޗު ކެންސަލް ކުރުމަށެވެ.
އެފްއޭކަޕްގެ ގަވާއިދުގައިވާ ގޮތުން މުބާރާތް ފެށުމަށް ފަހު އެއްވެސް ޓީމަކަށް މުބާރާތުން ވަކިނުވެވޭނެ އެވެ. އެކަން އެހެން ގަވާއިދުގައި އޮއްވައި، ސަސް އިން މެޗު ނުކުޅެން ނިންމާފައިވާތީ، އެފްއޭއެމުން ވަނީ އެ މައްސަލަ ބަލަން ނިންމައިފަ އެވެ.
"މި މައްސަލަ ބެލުމަށްފަހު މުބާރާތުގެ ގަވާއިދުގައިވާ ހަމަތަކުގެ މަތީން ފިޔަވަޅު އެޅުމަށް ނިންމާފައިވާކަން މައުލޫމާތައްޓަކައި ހިއްސާ ކުރަމެވެ،" އެފްއޭއެމްގެ ބަޔާނުގައިވެ އެވެ.
ކުއާޓާ ފައިނަލުގައި ކްލަބް އީގަލްސް ކަޓުވާލި ސަސް އިން ތިން ވަނަ ހޮވާ މެޗު ދޫކޮށްލުމާ އެކު ގްރީން ސްޓްރީޓްސް އަށް ވަނީ ތިން ވަނަ ލިބިފަ އެވެ. ގްރީން ސްޓްރީޓްސް އަށް މެޑަލް ހަވާލުކުރުން އޮންނާނީ އާދިއްތަ ދުވަހުގެރޭ ކުޅޭ އެފްއޭ ކަޕް ފައިނަލް މެޗަށް ފަހު އެވެ.
އެފްއޭ ކަޕް ފައިނަލުގައި ބައްދަލުކުރަނީ ކްލަބް ވެލެންސިއާ އާއި މާޒިޔާ ސްޕޯޓްސް އެންޑް ރެކްރިއޭޝަން އެވެ. މާޒިޔާ އަކީ މި ސީޒަނުގެ ލީގު ޗެމްޕިއަނެވެ. މާޒިޔާ ބަލިކޮށް, މި ފަހަރުގެ ސީޒަނުގެ ފުރަތަމަ މުބާރާތް، ޕްރެޒިޑެންޓްސް ކަޕް ކާމިޔާބުކުރީ ވެލެންސިއާ އިންނެވެ.
ސަސް އަށް ދެން އޮތީ އަންނަ އަހަރު ފުރަތަމަ ޑިވިޝަނުގައި ދެމި އޮންނަން ކުރަން ޖެހޭ މަސައްކަތެވެ.
އަންނަ އަހަރުގެ ދިވެހި ޕްރިމިއާ ލީގުގެ ކޮލިފިކޭޝަން ބުރުގައި ފެށޭ ހަފްތާގައި ސަސް އާއި ދަ ގްރާންޑޭ ސްޕޯޓްސް ކްލަބް ނުކުންނާނީ ދެ ވަނަ ޑިވިޝަންގެ ޗެމްޕިއަން ބުރު ސްޕޯޓްސް ކްލަބާއި ރަނަރަޕް ކްލަބް ޓީނޭޖާ ދެކޮޅަށެވެ. މި ހަތަރު ޓީމުގެ މެދުގައި ލީގު ބުރެއް ކުޅުމަށް ފަހު އެންމެ ރަނގަޅު ނަތީޖާ ނެރޭ ދެ ޓީމަކަށް އަންނަ އަހަރުގެ ފުރަތަމަ ޑިވިޝަނުގެ ޖާގަ ލިބޭނެ އެވެ.
އެނގިފައިވާ ގޮތުގައި ސަސް އިން އެފްއޭ ކަޕްގެ ތިން ވަނަ ހޮވާ މެޗުގައި ނުކުޅުނީ ކޮލިފިކޭޝަން ބުރަށް ތައްޔާރުވުމުގެ ގޮތުންނެެވެ. ލިމިޓެޑް އަދަދަކަށް ސަސްގެ ކުޅުންތެރިން ތިބިއިރު، ގާތްގާތުގައި މެޗުތައް ކުޅެން ޖެހޭތީ އެ ޓީމުން އެފްއޭ ކަޕް ތިން ވަނަ ހޮވާ މެޗު ނުކުޅެ ދޫކޮށްލީ އެވެ.
އަންނަ ހަފްތާގެ ބުދަ ދުވަހު ކޮލިފިކޭޝަން ބުރު ފަށާއިރު، ސަސް އެ ދުވަހު ހަވީރު ކުޅޭނީ ބުރުއާ ދެކޮޅަށެވެ.
