ބޭންކިން އަދި ފައިނޭންސް ދާއިރާއިން މަތީ ތައުލީމު ހާސިލުކުރަން ބޭނުންވާ ދިވެހިންނަށް ސްކޮލާޝިޕް ދިނުމުގެ ބޭނުމުގައި ބޭންކް އޮފް މޯލްޑިވްސް (ބީއެމްއެލް) އިން ލޯންޗުކުރި "ބީއެމްއެލް ސްކޮލާޝިޕް ފަންޑް" އިން ކިޔަވަން ތިން މީހަކަށް މިއަދު ސްކޮލާޝިޕް ހަވާލުކޮށްފި އެވެ.

ބޭންކަށް 40 އަހަރު ފުރުމުގެ މުނާސަބަތުގައި އަހަރަކު އެއް ފަހަރު ސްކޮލާޝިޕް ދޭގޮތަށް މިދިޔަ އަހަރު ބީއެމްއެލް އިން ހުޅުވި މި ފަންޑުގެ ދަށުން ކިޔެވުމުގެ ފުރުސަތު ލިބުނު ތިން ޒުވާނުންނަކީ:

• އަހުމަދު ނިސާލް އަބްދުﷲ
• އައިމިނަތު މައިސާ ނިޔާޒު
• އިސްމާއިލް ޒަކުވާން ޝިހާދު

މިއީ ކިޔެވުމުގެ ހަރަދުގެ އިތުރުން ހުރުމުގެ ހަރަދު ވެސް ހިމެނޭ ގޮތަށް ބީއެމްއެލްއިން ދޭ ފުލް ސްކޮލާޝިޕްތަކެކެވެ.

ސްކޮލާޝިޕް ފަންޑުގެ އިތުރުން ބީއެމްއެލް އިން އަންނަނީ 40 ވަނަ އަހަރީ ދުވަހާ ހަމައަށް މުޖުތަމައުއަށް ފައިދާހުރި 12 ހަރަކާތެއް ފަށަން ނިންމާފަ އެވެ. މިހާތަނަށް ފެށި ހަރަކާތްތަތަކީ:

• ސްމޯލް ގްރާންޓްސް ސްކީމް - އިޖުތިމާއީ ޕްރޮޖެކްޓުތަކަށް ފަންޑިން ދޭން
• ސްޓާޓްއަޕް ގްރާންޓު - ފަށާ ވިޔަފާރިތަކަށާއި ވިޔަފާރި ފުޅާކުރަން ފަންޑިން ދޭން
• ހައުސިން ގްރާންޓް - ހާލުގައި އުޅޭ އާއިލާތަކަށް ގެދޮރު އަޅަން އެހީ ދޭން
• ގައުމީ ކުތުބުހާނާ ޒަމާނީ ފެންވަރަށް އަޕްގްރޭޑު ކުރުމުގެ މަސައްކަތް
• ކައިންޑްލީ ބައި ބީއެމްއެލް - ދަރުމައަށް ކްރައުޑްފަންޑު ކުރާ ޕްލެޓްފޯމެއް

ކުރިޔަށް އޮތް ދުވަސްތަކުގެ ތެރޭގައި އިތުރު ކަންކަން އިއުލާނުކުރަމުން ދާނެ ކަމަށް އެ ބޭންކުން ބުނެ އެވެ.