އިންޑިއާގެ އޮޑިޝާގައި މިހާރު ކުރިއަށްދާ 18 އަހަރުން ދަށުގެ ފީބާ އޭޝިއަން ޗެމްޕިއަންޝިޕްގެ ސާބާ ކޮލިފައިންގައި ރާއްޖެ ކުުޅުނު ދެ ވަނަ މެޗުން ވެސް ބަލިވެއްޖެ އެވެ.

ރާއްޖޭގެ 18 އަހަރުން ދަށުގެ ފިރިހެން ބާސްކެޓްބޯޅަ ޓީމް ވާދަކުރާ ސަރަހައްދީ ކޮލިފައިންގައި ކުޅުނީ ތިން ގައުމެވެ. އެއީ ރާއްޖެ އާއި ބަންގްލަދޭޝްގެ އިތުރުން އިންޑިއާ އެވެ.

އިއްޔެ ފެށި މުބާރާތުގެ ފުރަތަމަ މެޗުގައި ރާއްޖެ އާއި ބަންގްލަދޭޝް ވާދަކުރި މެޗުން ރާއްޖެ ބަލިވީ 64-37 ޕޮއިންޓުންނެވެ.

މި މެޗަށް ފަހު ގައުމީ ކޯޗު، އިލްޔާސް އިބްރާހިމް (އިއްލެ) ބުނީ ޖުމްލަކޮށް ބަލާއިރު ދިވެހި ޓީމްގެ ކުޅުން ރަނގަޅު ކަމަށާއި، މެޗުގައި މައިގަނޑު ތަފާތަކަށް ފެނުނީ ދިވެހި ޓީމަށް ސްކޯ ނުކުރެވުންކަމަށެވެ.

ލިބޭ ފުރުސަތުތަކުގައި ސްކޯ ނުކުރެވުމުގެ މައިގަނޑު ސަބަބެއްގެ ގޮތުގައި އިއްލެ ފާހަގަކުރީ މުބާރާތަށް ތައްޔާރުވުމަށް އިންޑޯ ކޯޓުގައި ޕްރެކްޓިސް ނުކުރެވުމެވެ. އިއްލެ ބުނީ އައުޓްޑޯގައި ފަރިތަކޮށްފައި މުބާރާތް އިންޑޯގައި ކުޅެން ޖެހުމަކީ ޒުވާން ކުޅުންތެރިންނަށް ދިމާވި ގޮންޖެހުމެއް ކަމަށެވެ. އަދި ކުޅުންތެރިންގެ ކުޅުމަށް ބަލާއިރު އެ ތަފާތު ފާހަގަވި ކަމަށް ވެސް އިއްލެ ވަނީ ބުނެފަ އެވެ.

ސާބާ ކޮލިފައިންގައި ކުޅޭ ރާއްޖޭގެ 18 އަހަރުން ދަށުގެ ފިރިހެން ބާސްކެޓްބޯޅަ ޓީމު.

"ކުޅުން ގޯހެއް ނޫން. މި ކުދިން މި ލެވެލްގައި ކުޅޭއިރު މިސްޓޭކްވެސް ހަދާނެކަމަށް ގަބޫލުކޮށްގެން ނުކުތީވެސް. މައިގަނޑު ތަފާތަކަށްވީ ސްކޯރިން. ލިބޭ ޗާންސްތަކުގައި ސްކޯ ނުކުރެވި ދިޔައީ. އަނެއްކޮޅުން އިންޑޯއެއްގައި ޕްރެކްޓިސްކޮށްލަން ނުލިބުމުން އެކަންވެސް ވަރަށް ބޮޑަށް ގޮންޖެހުމަކަށްވި" ކޯޗު އިއްލެ ބުންޏެވެ.

އިއްލެ ބުނީ ރަނގަޅަށް ތައްޔާރުވެގެން މިކަހަލަ މުބާރާތަކަށް ނުކުމެވިއްޖެނަމަ ބަންގްލަދޭޝް އަކީ ބަލިކުރެވޭ ފެންވަރުގެ ޓީމެއް ކަމަށެވެ. ފުރަތަމަ މެޗުގައި ބަންގްލަދޭޝް އަތުން ބަލިވި ނަމަވެސް ހުރިހާ ކުޅުންތެރިން ވެސް ދެއްކި ހިތްވަރު އިއްލެ ވަނީ ފާހަގަކޮށްފަ އެވެ.

ދެ ވަނަ މެޗުގައި މިއަދު ރާއްޖެ ނުކުތީ ސަރަހައްދީ ގަދަބާރު އިންޑިއާއާ ދެކޮޅަށެވެ. މި މެޗުން އިންޑިއާ މޮޅުވީ 154-32 ޕޮއިންޓުންނެވެ. އިންޑިއާ އިން ބޮޑު ލީޑެއްގައި މުޅި މެޗު ކުޅުނުއިރު، ރާއްޖޭގެ ކުޅުންތެރިން މެޗުގެ ތެރެއަށް ވަދެ ރަނގަޅަށް ކުޅެވޭތޯ ކުރި މަސައްކަތް ކާމިޔާބެއްނުވި އެވެ.

އިންޑިއާގެ އޮޑިސާގައި ކުރިއަށްދާ މުބާރާތުގެކުރިން 18 އަހަރުން ދަށުގެ ގައުމީ ޓީމް ވަނީ ކޮލްކަތާގައި އެކުވެރިކަމުގެ ތިން މެޗެއް ކުޅެފަ އެވެ. އެ ތިން މެޗުން ބަލިވި ނަމަވެސް ޖޫނިއާ ޓީމުން ރަނގަޅު ވާދައެއްކޮށް ކުރި އެރުން ހޯދި އެވެ.