މެޑްރިޑް (މެއި 5) - ސްޕެއިނުގައި މިހާރު ކުރިއަށްދާ މެޑްރިޑް މާސްޓާސް ޓެނިސް މުބާރާތުގެ ގަދަ 16 ބުރުގައި މިއަދު ސާބިއާގެ ނޮވަކް ޖޮކޮވިޗާ ދެކޮޅަށް ކުޅެން އޮތް މެޗަށް އިނގިރޭސި ތަރި އެންޑީ މަރޭ އަށް ހާޒިރުވެވެން ނެތުމުން މެޗު ދޫކޮށްލަން ޖެހިއްޖެ އެވެ.

މަރޭ އަށް މެޗަށް ދެވޭގޮތްނުވީ ބަލި ހާލަތުގެ ސަބަބުން ކަމަށް އޭނާގެ މެނޭޖަރު ވަނީ މުބާރާތް އިންތިޒާމްކުރާ ފަރާތަށް މައުލޫމާތު ދީފަ އެެވެ. ކުރިން ދުނިޔޭގެ އެއް ވަނަ މަގާމަށް ވެސް ޖެހިލި، މަރޭ މި ވަގުތު އޮތީ ރޭންކިން 78 ވަނައިގަ އެވެ. މަރޭ، އަށް މިއަދުގެ މެޗު ނުކުޅެވުމުން، އޮޓޮމެޓިކުން މެޑްރިޑް މާސްޓާސްގެ ކުއާޓާގެ ފައިނަލުގެ ޖާގަ ލިބުނީ ޖޮކޮވިޗަށެެވެ.

ޖޮކޮވިޗް ވަނީ މެޑްރިޑް މާސްޓާސްގެ ތަށި ތިން ފަހަރު އުފުލާލައިފަ އެވެ. މި ފަހަރުގެ މުބާރާތުގެ ކުއާޓާގައި ޖޮކޮވިޗް ކުޅެން ޖެހޭނީ ގަދަ 16 ބުރުގައި ޕޮލެންޑްގެ ހިއުބާޓް ހުކާޒް އާއި ސާބިއާގެ ޑޫސާން ލާޖޮވިޗް ކުޅެގެން މޮޅުވާ ކުޅުންތެރިއަކާ އެވެ.

މީގެ ކުރިން މަރޭ އާއި ޖޮކޮވިޗް ވަނީ އެކި މުބާރާތްތަކުގައި ޖުމްލަ 36 ފަހަރު ވާދަކޮށްފަ އެވެ. މިދިޔަ އަހަރުތަކުގައި އަނިޔާގެ ސަބަބުން މަރޭ އަށް ގިނަ މުބާރާތްތަކެއް ވަނީ ގެއްލިފަ އެވެ. އެހެންވެ، މަޝްހޫރު ކުޅުންތެރިންނާ ދެކޮޅަށް މަރޭ އަށް ކުޅެވިފައިވަނީ މަދު މެޗުތަކެކެވެ.

މަރޭ އާއި ޖޮކޮވިޗް އެންމެ ފަހުން ކުޅެފައިވަނީ 2017 ވަނަ އަހަރު ޖެނުއަރީގައި ދުބާއީގައި ބޭއްވި މުބާރާތެއްގަ އެވެ.

ސްކޮޓްލެންޑަށް އުފަން މަރޭ، 34، އަށް މި ފަހަރުގެ މެޑްރިޑް މާސްޓާސްގައި ވާދަކުރަން ލިބުނީ ވައިލްޑްކާޑް އިންވިޓޭޝަނެކެވެ. ގަދަ 16 ބުރަށް އައުމުގެ ކުރިން މަރޭ ވަނީ ޑޮމިނިކް ތިއެމް އާއި ޑެނިސް ޝަޕޮވަލޯފް ބަލިކޮށްފަ އެވެ.