މިދިޔަ މަހު ކުރީކޮޅުން ފެށިގެން، ކޮމިޝަނާ އޮފް ސްޕޯޓްސްގައި ރަޖިސްޓްރީ ކޮށްގެން ހިންގަމުން އަންނަ ރޭޑިއަންޓް ސްޕޯޓްސް ކްލަބްގެ ރެޖިސްޓްރޭޝަނުގައި ހުރި ނިއު ރޭޑިއަންޓް ސްޕޯޓްސް ކްލަބާ ފުށުއަރާ މައްސަަަލައެއް ކުރިމަތިވެއްޖެ އެވެ.

ކުޅުންތެރިންނަށް މުސާރަ ނުދޭ މައްސަލައިގައި ރާއްޖޭގެ އެންމެ ސަޕޯޓަރުން ގިނަ ކްލަބް ނިއު ރޭޑިއަންޓް ފުޓްބޯޅައިގެ ހަރަކާތްތަކުން ސަސްޕެންޑްކޮށްފައިވަނީ 2019 ވަނަ އަހަރު އެވެ. ފުރަތަމަ އެފްއޭއެމުން ނިއު ސަސްޕެންޑްކުރިއިރު، ފަހުން ދުނިޔޭގެ މައި ފުޓްބޯޅަ އިދާރާ ފީފާ އިން ވަނީ ނިއު ރޭޑިއަންޓަށް ފިޔަވަޅު އަޅައިފަ އެވެ. އެއީ އެ ކްލަބުން ގެނެސްފައިވާ ބިދޭސީ ކުޅުންތެރިންނަށް މުސާރަ ދޭން ތަކުރާރުކޮށް ދިން ފުރުސަތުތަކުގެ ބޭނުންހިފާފައިނުވާތީ އެވެ.

ނިއު އަލުން ގެންނަން ކުރި މަސައްކަތް ކާމިޔާބުނުވުމުން، ނިއުގެ ސަޕޯޓަރުން އިސްވެ، ވަނީ މިދިޔަ މަހު ރޭޑިއަންޓްގެ ނަމުގައި ކްލަބެއް ރަޖިސްޓްރީކޮށް މި އަހަރުގެ ތިން ވަނަ ޑިވިޝަނުގައި ވާދަކުރަން ޓީމެއް އެކުލަވާލުމުގެ މަސައްކަތް ފަަށައިފަ އެވެ. ރޭޑިއަންޓުން ވަނީ ކޯޗިން ސްޓާފުން ހަމަޖައްސައި، ކުޅުންތެރިން ވެސް ސޮއިކުރުވައިފަ އެވެ.

އެފްއޭއެމްގެ އެސޯސިއޭޓް މެމްބަރަކަށް ވުމަށް މިދިޔަ މަހު ފަހުކޮޅު ރޭޑިއަންޓުން ހުށަހަޅާފައިވާއިރު، އެކަން އެ ގޮތަށް ކުރަން އިދާރީ ކަންކަން ފުރިހަމަކުރަން އެފްއޭއެމުން ނިންމީ ކޮމިޝަނާ އޮފް ސްޕޯޓްސް އާއި އޭއެފްސީގެ މަޝްވަރާގެ މަތިންކަން އެނގިފައިވެ އެވެ. އެ ގޮތުން ރޭޑިއަންޓްގެ ރަޖިސްޓްރޭޝަން މަރުހަލާގައި ކަންކަން ހިނގާފައިވާ ގޮތާއި ސޯޝަލް މީޑިއާ ޕްލެޓްފޯމްތަކުން ކްލަބް ރަމްޒު ކުރާ އެކައުންޓްތަކުން ފެންނަނީ ރޭޑިއަންޓްގެ ލޯގޯ އާއި ކްލަބްގެ ކުލަ އަކީ ނިއު ރޭޑިއަންޓް އަސްލަކަށް ބަލައިގެން އައިސްފައިވާ ކަމެއް ކަމަށެވެ .

އަދި ރޭޑިއަންޓް ސްޕޯޓްސް ކްލަބްގެ ހިންގާ ކޮމިޓީގައި ތިބި ބައެއް މެމްބަރުންނަކީ އެންމެ ފަހުން އިންތިހާބުވި ނިއު ރޭޑިއަންޓްގެ ބޯޑުގައި ވެސް ތިބި ފަރާތްތަކާ ގުޅޭ ބަޔަކު ކަމަށްވާތީ، ރޭޑިއަންޓަކީ ނިއު ރޭޑިއަންޓްގެ "ސްޕޯޓިން ސަކްސެސާ" އެއްގެ ގޮތުގައި ބެލެވޭ ގޮތަށް ފީފާ އާއި އޭއެފްސީ މި ކަމުގައި އަމަލު ކުރަމުން އަންނަ މިންގަނޑުތަކުން ފެންނަން އެބައޮތް ކަމަށް ވަނީ ބަލައިފަ އެވެ.

ރޭޑިއަންޓްގެ އޮފިޝަލުންނާ އެފްއޭއެމާ މިއަދު ބޭއްވި ބައްދަލުވުމުގެ ތެރެއިން.-

ސްޕޯޓިން ސަކްސެސާ އެއްގެ ގޮތުގައި ބެލޭ މިންގަނޑަކީ ދަރަންޏެއް އޮތުމުގެ ސަބަބުން ސަސްޕެންޝަނެއްގައި އޮތް ކްލަބެއްގެ މަސްލަހަތު އޮތް ފަރާތެއް ނުވަތަ ފަރާތްތަކެއް ބައިވެެރިވެގެން އެހެން ކްލަބެއް ވުޖޫދުކުރުމެވެ. އޮންނަ އުސޫލުގެ ތެރެއިން ސްޕޯޓިން ސަކްސެސާއެއްގެ ގޮތުގައި ކުރިއަށްދެވޭނީ ކުރިން އޮތް ކްލަބްގެ ދަރަންޏާ ހަވާލުވާނަަމަ އެވެ. މިހާލަތުގައި، މީގެ މާނަ އަކީ ރޭޑިއަންޓަށް ރަސްމީ ގޮތުން އެފްއޭއެމާއި އޭއެފްސީ ތެރެއިން އެފިލިއޭޝަނެއް ލިބިގެން މެމްބަރު ކްލަބެއްގެ ގޮތުގައި ކުރިއަށް ދެވެން އޮތީ ނިއު ރޭޑިއަންޓްގެ ދަރަންޏާ ހަވާލުވެގެންނެވެ.

އެފްއޭއެމާއި ރޭޑިއަންޓްގެ އިސް އޮފިޝަލުން ވަނީ މިއަދު މި މައްސަލައިގައި ބައްދަލުވުމެއް ބާއްވައިފަ އެވެ. އެ ބައްދަލުވުމަށް ފަހު ރޭޑިއަންޓްގެ ކޮމިއުނިޓީ ވައިބާ ގްރޫޕްގައި އެ ކްލަބުން ބުނެފައިވަނީ އެފްއޭއެމުން ނިންމާފައިވަނީ ރޭޑިއަންޓަކީ ނިއު ރޭޑިއަންޓް ކަމަށެވެ.

"ރޭޑިއަންޓް ސްޕޯޓްސް ކްލަބަކީ ނިއުރޭޑިއަންޓް ސްޕޯޓްސް ކްލަބް ކަމަށް ކަނޑައަޅައި އެފްއޭއެމް އިން ރާވާ ހިންގާ އެއްވެސް މުބާރާތެއްގައި ރޭޑިއަންޓް ސްޕޯޓްސް ކްލަބް އަށް ބައިވެރި ނުވެވޭނެ ކަމަށް، އެފްއޭއެމް އިން ކްލަބަށް މަޢުލޫމާތު ދީފި. މި ނިންމުން ނިންމާފައިވަނީ އޭއެފްސީ އިން ކަމަށް އެފްއޭއެމް އިން މަޢުލޫމާތު ދޭ." ރޭޑިއަންޓުން ކްލަބްގެ ކޮމިއުނިޓީ ވައިބާ ގްރޫޕްގައި ބުނެފައިވެ އެވެ.

އެފްއޭއެމުން ބުނީ ރޭޑިއަންޓްގެ ހިންގުމުގައި ހުރި ބައެއް ކަންކަމާ ގުޅިގެން އޭއެފްސީގެ ލަފާގެ މަތިން އެ ކްލަބަށް ފުރުސަތު ދިނުން މަޑުޖައްސާލީ ކަމަށެވެ. އެއްވެސް ހާލަތެއްގައި މިއީ ރޭޑިއަންޓަށް ފުރުސަތު ނުދޭން ނިންމި ނިންމުމެއް ނޫން ކަމަށް ވަނީ ބުނެފަ އެވެ.

ދުނިޔޭގެ މައި ފުޓްބޯޅަ އިދާރާ ފީފާ އިން 2019 ވަނަ އަހަރު، ޑިސިޕްލިނަރީ ގަވާއިދު ހަރުދަނާކުރުމުގެ ގޮތުން ގެނައި ބަދަލުގެ ތެރެއިން ވަނީ ސްޕޯޓިން ސަކްސެސާ އިން ބަލާ މިންގަނޑު އިތުރަށް ފުޅާކޮށްފަ އެވެެ. އެއީ ދަރަނިވެރިވާ ކްލަބްތަކުގެ ތެރެއިން އެހެން ކްލަބްތައް އުފެދިގެން އަންނަ އައުމުގައި ކުޅުންތެރިންނަށް ލިބޭ ގެއްލުން ކުޑަކުރަން ފިފްޕްރޯ އިން ވެސް ލަފާދީފައިވާތީ އެވެ.

ނިއު ރޭޑިއަންޓް, 1979 ގައި ވުޖޫދުވުމުގެ ކުރިން، ހެންވޭރުގައި ކުރިން އޮތް ޓީމަކީ "ރޭޑިއަންޓް ކްލަބް" އެވެ. އެކަމަކު، ފަހުން ރޭޑިއަންޓް އުވި ނިއު ރޭޑިއަންޓް ވުޖޫދުވީ އެެ. އަދި މި ފަހުން ނިއު ރޭޑިއަންޓަށް ދިމާވި މާލީ މައްސަލަތަކުގެ ތެރޭގައި އައި ސަސްޕެންޝަނާ ހެދި، ނިއުގެ ސަޕޯޓަރުން އިސްވެ ތިބެ މި ވަނީ ރޭޑިއަންޓްގެ މަަސައްކަތް ފަށައިގަނެފަ އެވެ