މިލާން (އޭޕްރީލް 15) - އޭސީ މިލާނަށް ކުޅެމުން އަންނަ ތަޖުރިބާކާރު ފޯވާޑް ޒަލަޓާން އިބްރަހިމޮވިޗަށް ދިމާވަމުން އަންނަ އަނިޔާގެ މައްސަލަތަކާ ހެދި އޭނާގެ މުސްތަގުބަލާ މެދު ކޮންމެ ނިންމުމެއް ނިންމި ކަމުގައި ވިޔަސް އެ އަށް މިލާނުގެ އިހުތިރާމް އޮންނާނެ ކަމަށް އެ ޓީމުގެ ކޯޗު ސްޓެފާނޯ ޕިއޯލީ ބުނެފި އެވެ.

އުމުރުން 40 އަހަރުގެ އިބްރަހިމޮވިޗަށް މި ފަހަރު އިޓާލިއަން ލީގުގައި މިލާން ކުޅުނު 32 މެޗުގެ ތެރެއިން ފުރަތަމަ އެގާރައިގައި ހިމެނިގެން ކުޅެވުނީ 11 މެޗެވެ. އިތުރު އަށް މެޗުގައި ބަދަލު ކުޅުންތެރިއެއްގެ ގޮތުގައި ކުޅެން އެރިއިރު، ލީގުގައި ޖެހީ ވެސް އަށް ގޯލެވެ.

ދާދި ފަހުން ކަކުލަށް ލިބުނު އަނިޔާއެއްގެ ސަބަބުން އިބްރަހިމޮވިޗަށް މިލާނުން ދެން އެންމެ އަވަހަށް ކުޅޭ ތިން ވަރަކަށް މެޗު ގެއްލޭނެ ކަމަށް މީޑިއާ ރިޕޯޓްތައް ބުނެ އެވެ. މިލާނުގެ ކޯޗު ޕިއޯލީ ބުނީ ސީޒަނުގެ ފަހު މެޗުތަކަށް އިބްރަހިމޮވިޗް ފިޓްވާނެ ކަމުގެ އުންމީދު އެބައޮތް ކަމަށެވެ.

"ކަކުލަށް ދިމާވެފައިވާ އެ އަނިޔާއިން އިބްރަހިމޮވިޗް ރިކަވާވެގެން އެނބުރި އަންނާނެ ކަމަށް މި ބަލަނީ ފަހު މެޗުތަކަށް. ދެން، އޭނާގެ ކެރިއަރުގެ މުސްތަގުބަލާ ބެހޭގޮތުން އެއްޗެއް ބުނަން ނޭނގޭ. އަހަންނަށް އެނގޭ ކަމަކީ އިބްރަހިމޮވިޗްގެ ކޮންމެ ނިންމުމަކަށް ވެސް މިލާނުން އިހުތިރާމްކުރާނެ،" ޕިއޯލީ ބުންޏެވެ.

އިޓަލީގެ ލެޖެންޑަރީ ފޯވާޑް ފްރެންޗެސްކޯ ޓޮޓީ ބުނީ އިބްރަހިމޮވިޗްގެ ކެރިއަރު ދެން އިތުރަށް ކުރިއަށް ގެންދިއުމުގެ ކުރިން އަމިއްލަ ހަށިގަނޑަށް ވިސްނާލުން ވަރަށް މުހިންމު ކަމަށެވެ.

މީގެ ދެ އަހަރު ކުރިން ދެ ވަނަ ފަހަރަށް މިލާނަށް ބަދަލުވެ، އިބްރަހިމޮވިޗް އެ ޓީމާ އެކު ހަދާފައިވާ ކޮންޓްރެކްޓް ވަނީ މި ސީޒަނުގެ ނިޔަލަށް އާ ކޮށްފަ އެވެ. އިބްރަހިމޮވިޗް ވަނީ މީގެ ކުރިން 2010 އިން 2012 އަށް މިލާނަށް ކުޅެފަ އެވެ. އޭރު މިލާނަށް 2011 ވަނަ އަހަރު ލީގު ކާމިޔާބު ކޮށްދިނުމެވެ.

މިލާން، މި ވަގުތު އިޓާލިއަން ލީގުގެ އެއް ވަނައިގައި އޮތްއިރު، ރިޕޯޓްތައް ބުނާގޮތުން އިބްރަހިމޮވިޗްގެ ވިސްނުމަކީ މި ސީޒަނުގައި މިލާނަށް ލީގު ހޯދައިދިނުމަށް ފަހު ކެރިއަރުގައި ދެން ކުރިއަށްދާނެ ގޮތެއް ނިންމުމެވެ. ތަކުރާރުކޮށް ދިމާވަމުން އަންނަ އަނިޔާގެ މައްސަލަތަކާ ހެދި ފުޓްބޯޅައިން ރިޓަޔާކުރުމުގެ ފުރުސަތު ވެސް އެބައޮތެވެ.

އިޓާލިއަން ލީގުގެ އެއް ވަނައިގައި މިލާން އޮތީ 32 މެޗުން 68 ޕޮއިންޓް ހޯދައިގެންނެވެ. ދެ ވަނައިގައި އެންމެ ފަހުގެ ޗެމްޕިއަން އޮތީ 31 މެޗުން 66 ޕޮއިންޓާ އެކު އެވެ. އިންޓަ އިން މިރޭ ސްޕެޒިއާއާ ކުޅޭއިރު، މިލާނުން އަމިއްލަ ދަނޑުގައި ބައްދަލުކުރާނީ ޖެނޯއާއާ އެވެ.