ނޭޕްލްސް، އިޓަލީ (އޮކްޓޫބަރު 26) - އިޓާލިއަން ލީގުގައި ޖިއޮވާނީ ޑި ލޮރެންޒޯ ޖެހި ގޯލުން 1-0 އިން ލެއްޗޭ ބަލިކޮށް ނަޕޯލީން ލީގުގެ އެއް ވަނައިގައި ލީޑުފުޅާކޮށްފި އެވެ.

އެންޓޯނިއޯ ކޮންޓޭގެ ކޯޗުކަމުގައި މި ފަހަރުގެ ލީގު ދަށްކޮށް ފެށި ނަމަވެސް ނަޕޯލީ ވަނީ ފޯމު ރަނގަޅުކޮށްފަ އެވެ. އެ ޓީމުން މިރޭގެ ނަތީޖާއާ އެކު، ބަލިނުވެ ލީގުގައި މި ވަނީ އަށް މެޗު ހަމަކޮށްފަ އެވެ. ލީގުގައި މި ފަހަރު ކުޅުނު ފުރަތަމަ މެޗުން ނަޕޯލީ ވަނީ ހެޔަސް ވެރޯނާ އަތުން 3-0 އިން ބަލިވެފަ އެވެ. އެ ފަހުން، އެ ޓީމުން ފަސް އެނބުރި ބަލާފައިނުވެ އެވެ.

ނަޕޯލީ އެއް ވަނައިގައި އޮތީ ނުވަ މެޗުން 22 ޕޮއިންޓާ އެކު އެވެ. ދެ ވަނައިގައި އޮތް އެންމެ ފަހުގެ ޗެމްޕިއަން، އިންޓަ މިލާނަށް ވަނީ އަށް މެޗުން 17 ޕޮއިންޓް ލިބިފަ އެެވެ. އިންޓަ އިން މާދަމާރޭ ކުޅޭ މެޗުގައި ޔުވެންޓަސްއާ ބައްދަލުކުރާއިރު، ޔުވެންޓަސް މި ވަގުތު ތިން ވަނައިގައި އޮތީ، 16 ޕޮއިންޓާ އެކު ތިން ވަނައިގަ އެވެ. މިރޭ، ކަލިއަރީ އަތުން 2-0 އިން މޮޅުވި އުދިނޭޒީ ހަތަރެއްގައި އޮތީ ނުވަ މެޗުން 16 ޕޮއިންޓް ހަމަކޮށްގެންނެވެ.

އަށް މެޗުން 14 ޕޮއިންޓާ އެކު، ލީގުގެ ފަސް ވަނައިގައި އޮތް އޭސީ މިލާން ކުޅެން އޮތް މެޗު ވަނީ ވިއްސާރައިގެ ސަބަބުން ފަސްކޮށްފަ އެވެ. އެއީ، ބޮލޯނިއާ ދަނޑުގައި މި މެޗު ކުޅެވޭ ވަރަށް ވިއްސާރައިގެ ހާލަތު ރަނގަޅުނުވާނެތީ އެވެ.

ނަޕޯލީގެ ކެޕްޓަން، ޑި ލޮރެންޒޯ، ރަނގަޅު ގޯލު ޖެހުމުގެ ފޯމެއްގައި ހުރިއިރު، މެޗުގެ 26 ވަަނަ މިނިޓްގައި އޭނާ ޖެހި ގޯލު ވަނީ އޮފްސައިޑް ކަމަށް ނިންމައިފަ އެެވެ. އެކަމަކު، މެޗުގެ 73 ވަނަ މިނިޓްގައި ޑި ލޮރެންޒޯ ވަނީ ނަޕޯލީގެ ލަނޑު ޖަހައިފަ އެެވެ. މިއީ، ނަޕޯލީގެ މިޑްފީލްޑަރު، ސްކޮޓް މެކްޓޮމިނޭ ބޮލުން ޖެހި ބޯޅައެއް، ލެއްޗޭ ކީޕަރު ވްލަޑިމީރޯ ފަލްކޯނޭ އަތުގައި ޖެހިފައި ނުކުތް ވަގުތު ރީބައުންސަކުން ޑި ލޮރެންޒޯ ޖެހި ގޯލެކެވެ.