މިލާން (އޮކްޓޫބަރު 30) - އިޓާލިއަން ލީގުގައި ރޭ އޭސީ މިލާން 2-0 އިން ބަލިކޮށް ނަޕޯލީން ލީގުގެ އެއް ވަނައިގައި ހަތް ޕޮއިންޓަށް ލީޑުފުޅާކޮށްފި އެވެ.

ލީގުގެ އެއް ވަނައިގައި އޮތް ނަޕޯލީ އަށް ވަނީ 10 މެޗުން 25 ޕޮއިންޓް ލިބިފަ އެެވެ. ދެ ވަނައިގައި އޮތް އިންޓަ އަށް ނުވަ މެޗުން 18 ޕޮއިންޓް ލިބިފައިވާއިރު، އިންޓަ އިން މިރޭ އެމްޕޮލީއާ ކުޅޭނެ އެވެ.

ރަށުންބޭރުގައި ކުޅުނަސް ނަޕޯލީން ރޭގެ މެޗު ފެށީ ރަނގަޅަށެވެ. ފަސް ވަނަ މިނިޓްގައި ޒަމްބޯ އަންގީސާ ދިން ބޯޅައަކުން ރޮމެލޫ ލުކާކޫ ވަނީ ނަޕޯލީ އަށް ލީޑުނަގައިދީފަ އެވެ. ބޯޅަ ހިފަހައްޓައިގެން ކުޅެ، މިލާނުން ގޯލެއް ޖަހައި، އެއްވަރުކުރެވޭތޯ ބެލި ނަމަވެސް ކާމިޔާބެއްނުވި އެވެ.

ފުރަތަމަ ހާފު ނިމުމުގެ ކުރިން ނަޕޯލީ އަށް ދެ ވަނަ ލަނޑެއް ޖަހައިދިނީ، އެ ޓީމަށް ކުޅޭ އާރްމީނިއާގެ މިޑްފީލްޑަރު، ކްވިޗާ ކްރަވަޝްކޭލިއާ އެވެ. އަރިމަތިން ލިބުނު ބޯޅަ ހިފައިގެން ހުސް ޖާގައެއް ހޯދާލުމަށް ފަހު ކްރަވަޝްކޭލިއާ ވަނީ ގޯލުގެ ކަނަށް ބޯޅަ ފޮނުވާލައިފަ އެވެ.

ދެ ވަނަ ހާފު ފެށުނުތަނާ މިލާންގެ އަލްވާރޯ މޮރާޓާ ވަނީ ބޮލުން ގޯލެއް ޖަހައިފަ އެވެ. އެކަމަކު، ސެމިއުލް ޗުކުވޭޒީ ނެގި ހުރަަހަކުން މޮރާޓާ ޖެހި މި ގޯލު ވަނީ އޮފްަސައިޑް ކަމަށް ނިންމައިފަ އެވެ. މިއީ، ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލައިފައި ނިންމި ނިންމުމެކެވެ.

ނުވަ މެޗުން 14 ޕޮއިންޓާ އެކު، މިލާން އޮތީ ލީގުގެ އަށް ވަނައިގަ އެވެ. އެ ޓީމު މި ހަފްތާގައި، ލީގުގައި ކުޅެން އޮތް ފުރަތަމަ މެޗު ވިއްސާރައިގެ ސަބަބުން ނުކުޅެވުނެވެ.