މަންޓާ އެއާއިން އައްޑޫ ސިޓީއަށް މި މަހު ދަތުރުތައް ފަށާނެކަން މިއަދު އިއުލާނުކޮށްފި އެވެ.

މަންޓާ އެއާއިން މާލެ-އައްޑޫ ދަތުރުތައް ފެށުމާ ގުޅިގެން އެ އެއާލައިނުގެ ޑެޕިޔުޓީ ސީއީއޯ އަހުމަދު މައުމޫން (މާނު) "އަދަދު" ނޫހަށް ވިދާޅުވީ ސިވިލް އޭވިއޭޝަނުން ހުއްދަތައް ލިބުމާއެކީ ދަތުރުތައް ފަށާނެ ކަމަށެވެ. އެކަމަކު ސީދާ ތާރީހެއް ދަންނަވަން އަދި ދަތި ކަމަށް އޭނާ ވިދާޅުވި އެވެ.

"އަޅުގަނޑުމެން މި ބަލަނީ މި މަހު 15-20 ހިސާބުގައި ދަތުރުތައް ފެށޭވަރު ވާނެ ކަމަށް. އޭތި ޑިޕެންޑު ވާނީ ސިވިލް އޭވިއޭޝަން ހުއްދައަށް," މާނު ވިދާޅުވި އެވެ.

މަންޓާ އެއާއިން އައްޑޫއަށް ދަތުރުތައް ފެށުމުން ދުވާލަކު ފްލައިޓެއް ގަން އިންޓަނޭޝަނަލް އެއާޕޯޓަށް ދަތުރުކުރާނެ އެވެ. އަދި ސިވިލް އޭވިއޭޝަނުން ހުއްދަ ލިބުމާއެކީ އާންމުކޮށް ޓިކެޓް ވިއްކަން ހުޅުވާލާނެ އެވެ.

މަންޓާ އެއާއިން ބުނީ ޓިކެޓު ވިއްކާ އަގުތައް ވެސް ވަރަށް އަވަހަށް އާންމުކުރާނެ އެވެ.

އައްޑޫ ސިޓީއަށް ދަތުރުތައް ފަށަން ނިންމި ސަބަބާ ގުޅިގެން މާނު ވިދާޅުވީ މަންޓާ އެއާގެ ފެންވަރު ރަނގަޅު ހިދުމަތްތަކަށް އައްޑޫއިން ޑިމާންޑު އެބައޮތް ކަމަށެވެ. އަދި މިއީ އައްޑޫ ރައްޔިތުން ވަރަށް އެދެމުން އައި ކަމެއްކަން ވެސް އޭނާ ފާހަގަކުރެއްވި އެވެ.

"މަންޓާ އެއާއިން ތަފާތު ހިދުމަތްތައް ލިބޭނެ. އައްޑޫ ރައްޔިތުން ވަރަށް ބޭނުންވޭ ގަމަށް މަންޓާ އެއާގެ ފްލައިޓެއް ޖައްސަން." މާނު ވިދާޅުވި އެވެ.

ފަސް ތަރީގެ ހިދުމަތްދޭ ހަމައެކަނި ޑޮމެސްޓިކް އެއާލައިނުގެ ގޮތުގައި މަޝްހޫރުވެފައިވާ މަންޓާ އެއާއަކީ ޑޮމެސްޓިކް އެއާލައިނުތަކުގެ ފަސިންޖަރުންނަށް ދޭ ހިދުމަތްތަކަށް ސަމާލުކަންދޭ އެއާލައިނެކެވެ. ޑޮމެސްޓިކް ދަތުރުކުރާ އެއާލައިނުތަކުގެ ތެރެއިން އެންމެ ހަގު އެއާލައިނަކީ ވެސް މަންޓާ އެވެ.

އެ އެއާލައިނުން ދަތުރުތަކުގައި ބޭނުންކުރާ އޭޓީއާރު 600-72 މަރުކާގެ ފްލައިޓުތަކަކީ ދެ ގޮނޑި ދޭތެރޭގައި ޖާގަ ތަނަވަސް ހިތްގައިމު ފްލައިޓުތަކެކެވެ. ދަތުރުކުރާ ވަގުތު ފަސިންޖަރުންނަށް ފޯރުކޮށްދޭ ހިދުމަތްތައް ވެސް ފުރިހަމަވެފައި ތަފާތެވެ.

މަންޓާ އެއާއިން މިހާރު ދަތުރުކުރަނީ ދެ އެއާޕޯޓަކަށެވެ. އެއީ ދާލު އެއާޕޯޓާއި ދަރަވަންދޫ އެއާޕޯޓެވެ.