ޓްރާންސްޕޭރެންސީ އިންޓާނެޝަނަލް އިން މިއަދު ނެރެފައިވާ 2021 ގެ ކޮރަޕްޝަން ޕާސެޕްޝަން އިންޑެކްސް (ސީޕީއައި) ރާއްޖެ ތިން ޕޮއިންޓު ދަށަށް ޖެހި، ގައުމުތަކުގެ ރޭންކިންގުގައި 10 ގިންތި ދަށަށް ވެއްޓި، ކުރިއެރުންތަކެއް ލިބިއްޖެ އެވެ.
ސީޕީއައި އިންޑެކްސް ގައިހިމެނޭ 180 ގައުމުގެ ތެރެއިން މިހާރު ރާއްޖެ ހިމެނެނީ 40 ޕޮއިންޓާ އެކު 85 ވަނަ ގިންތީގަ އެވެ. މީގެ ކުރިން 2020 ވަނަ އަހަރު ރާއްޖެ ގޮސްފައި ވަނީ 75 ވަނަ ގިންތިއަށެވެ. އެއީ 43 ޕޮއިންޓާއެކު އެވެ.
ސީޕީއައި އަކީ 180 ގައުމު ހިމެނޭހެން އެ ގައުމުތަކުގައި ކޮރަޕްޝަން އަށަގެންފައިވާ މިންވަރު ބެލުމަށް ކޮށްފައިވާ ސާވޭތަކާއި، ފަންނީ މާހިރުންގެ ހޯދުންތަކުގެ އަލީގައި އެ ގައުމުތައް ގިންތިކޮށް ޕޮއިންޓުދޭ އިންޑެކްސްއެކެވެ. (100-0) ދެމެދުގެ މިންގަނޑެއް ބޭނުންކޮށް ގިންތިކުރެވޭ މި އިންޑެކްސްގައި 0 ރަމްޒުކޮށްދެނީ އެންމެ ކޮރަޕްޓު ދައުލަތްތަކެވެ. އަދި 100 އަކީ ކޮރަޕްޝަންގެ އަމަލުތައް އެންމެ މަދު، ހާމަކަން ބޮޑު އަދި ސާފު ގޮތަކަށް ހިންގަމުންދާ ދައުލަތްތަކެވެ.
އެެއާކު ޓްރާންސްޕޭރެންސީ މޯލްޑިވްސް އިން ނެރުނު ބަޔާނެއްގައި ބުނެފައި ވަނީ ރާއްޖޭގެ ހިންގުމުގެ ނިޒާމަށް ކުރިއެރުން އައިސްފައިވީ ނަމަވެސް ކޮރަޕްޝަނާ ދެކޮޅަށް މަސައްކަތް ކުރުމަށް ހެދިފައިވާ ގާނޫނުތައް ތަންފީޒުކޮށް އެއަށް އަމަލު ކުރުމުގައި ސަރުކާރުން އަދިވެސް ފަސްޖެހޭކަން ފާހަގަ ކުރެވޭ ކަމަށެވެ.
މި ނަތީޖާ ނެރުމަށްޓަކައި ބައިނަލްއަގުވާމީ ތިން މަސްދަރަކަށް ރިއާޔަތްކޮށްފައިވެ އެވެ. އެއީ ގްލޯބަލް އިންސައިޑް ކައުންޓްރީޒް ރިސްކް ރޭޓިންގް، ވެރައެޓީޒް އޮފް ޑިމޮކްރެސީ ޕރޮޖެކްޓްގެ ޑޭޓާ، އަދި ވޯލްޑް ބޭންކް ކައުންޓްރީ ޕޮލިސީ އެންޑް އިންސްޓްޓިއުޝަނަލް އެސެސްމެންޓް (ސީޕީއައިއޭ) އެވެ.
"ސީޕީއައި އިންޑެކްސް ގެ މެދު ދަރަޖައިގެ އިންޑެކްސް ރާއްޖެއަށް ލިބުން ރަމްޒުކޮށްދެނީ ގްރޭންޑް ކޮރަޕްޝަން ފަދަ ބޮޑެތި އަމަލުތައް އޮތްކަމެވެ. އަދި ސަރުކާރުގެ ބޮޑެތި މަގާމުތަކުގައި ތިބި މުއްސަނދި މަދު ބަޔަކު ގިނަ ބަޔެއްގެ ހައްގުތައް ނަގާލައި އަމިއްލަ މަންފާ ހޯދަމުންދާކަމެއް،" އެކަމާ ގުޅިގެން ޓްރާންސްޕޭރެންސީ މޯލްޑިވްސްއިން ނެރެފައިވާ ބަޔާނުގައިވެ އެވެ.
އެ ކަންކަމަށް ވަގުތީ ހައްލެ ހޯދުމުގެ ބަދަލުގައި މައްސަލައަށް އެކަށީގެންވާ ބޮޑު ހައްލެއް ހޯދުމުގެ މުހިންމުކަން ޓްރާންސްޕޭރެންސީ މޯލްޑިވްސްއިން ފާހަގަކޮށްފައިވެ އެވެ. ކޮރަޕްޝަންގެ ސަބަބުން ދައުލަތުން އިންސާނީ ހައްގުތަކަށް އިހްތިރާމްކޮށް ރައްކާތެރިކުރަންޖެހޭ މިންވަރަށް އެކަން ނުކުރެވޭނެކަން ފާހަގަކޮށްފައިވެ އެވެ.
"ސަރުކާރު ޒިންމާދާރުކުރުމަށާއި ހާމަކަންބޮޑު ނިޒާމެއް ގާއިމްކުރުމަށާއި ކޮރަޕްޝަން ނައްތާލައި ކޮރަޕްޓު ފަރާތްތައް ހިމާޔަތްކޮށް ބާރުވެރިކުރުވާ ވިހަ ނިޒާމް ނައްތާލުމަށް ސިޔާސީ އެއްބާރުލުން ވަރަށްވެސް މުހިންމު،" ޓްރާންސްޕޭރެންސީ މޯލްޑިވެސްގެ ބަޔާނުގައި ވެއެވެ.
