ހަނގުރާމަވެރި ސަރަޙައްދުތަކުގައި ދިވެހިންނަށް ލިބޭ ދަރިން ދިވެހި ރައްޔިތުންގެ ދަފްތަރުގައި ރަޖިސްޓްރީ ކުރުމުގައި އަމަލުކުރަން ޖެހޭ ހާއްސަ އުސޫލު ޑިޕާޓްމަންޓް އޮފް ނޭޝަނަލް ރަޖިސްޓްރޭޝަނުން އިއްޔެ އާންމުކޮށްފި އެވެ.
ޓެރަރިޒަމް މަނާކުރުމުގެ ގާނޫނުގެ ދަށުން އެކުލަވައިލި މި އުސޫލުގައި، އެކި ގައުމުތަކުގައި ހިނގާ ދާހިލީ ހަނގުރާމަތަކުގައި ބައިވެރިވާ ދިވެހިންނަށް ލިބޭ ދަރިން ރަޖިސްޓްރީ ކުރަން ބެލެނިވެރިން ފުރިހަމަ ކުރަން ޖެހޭ ކަންކަމާއި ކައުންސިލުތަކުގެ ޒިންމާ ސާފުކޮށް ބަޔާންކޮށްފައިވެ އެވެ.
"ހަނގުރާމަވެރި ސަރަހައްދެއްގައި ދިވެހި ރައްޔިތަކަށް އުފަންވެފައިވާ ކުދިންގެ އުފަންވުން، ކަމާބެހޭ ގާނޫނުތަކުގައިވާ ގޮތުގެ މަތިން ދިވެހިރާއްޖޭގައި ރަޖިސްޓަރ ކޮށްފައި ނުވާނަމަ، އެ ކުދިންގެ އުފަންވުން، މި އުސޫލުގައި ބަޔާންކޮށްފައިވާ ގޮތުގެ މަތިން ދިވެހިރާއްޖޭގައި ރަޖިސްޓަރ ކުރަންވާނެ،" އެ އުސޫލުގައި ލިޔެފައިވެ އެވެ.
ގާނޫނު ބުނާ ގޮތުން ހަނގުރާމައިގެ މައިދާނުގައި ލިބޭ ކުދިން އަނބުރާ ރާއްޖެ އައުމުގެ ކުރިން އެ ކުދިންގެ އުފަންވުން ރާއްޖޭގައި ރަޖިސްޓްރީ ކުރަން ޖެހެ އެވެ. އެކަން ކުރަން އެ ކުއްޖާގެ ބެލެނިވެރިން ނޫނީ ބެލެނިވެރިން ހަމަޖައްސާ ޕަވާ އޮފް އެޓާނީ ފުރަތަަމަ ދާން ޖެހޭނީ ފެމިލީ ކޯޓަށެވެ. އެ ކުއްޖާއަކީ ދިވެހި ރައްޔިތަކަށް އުފަން ދަރިއަކުކަމާމެދު ގޮތް ނިންމާނީ އެ ކޯޓުންނެވެ.
ޑީއެންއޭ އާއި އެފަދަ ސައިންޓިފިކް ގަރީނާތަކަކީ ހައްދުގެ މައްސަލަތައް ތައުޒީރީ މިންގަނޑުން ސާބިތުކުރުމަށް ފުދޭނޭ ވަސީލަތްތަކެއް ކަން ސުޕްރީމް ކޯޓުން ކަނޑައަޅާފައިވާތީ، ދިވެއްސަކަށް އުފަން ދަރިއެއްތޯ ސާބިތުކުރުމަށް ޑީއެންއޭ ތަހުލީލު ރިޕޯޓް ހުށަހެޅޭނެ އެވެ.
މަންމަ އަދި ބައްޕަ ނެތް ހާލަތުގައި ގާތް ތިމާގެ މީހެއްގެ ޑީއެންއޭ ޕްރޮފައިލް ވެސް ހުށަހެޅެ އެވެ. އަދި، އެކަމަށް ހެކިކޮށްދޭނެ މީހުންގެ ބަޔާން ވެސް ހުށަހެޅޭނެ އެވެ.
މިގޮތަށް ކޯޓަށް ހުށަހަޅާ ހެކި މަދަނީ މިންގަނޑުން ވަޒަން ކުރުމަށް ފަހު، 14 ދުވަހުގެ ތެރޭގައި ކޯޓުން ފައިސަލާ ކުރަން ޖެހެ އެވެ.
އެ ކުއްޖަކީ ދިވެއްސެއްކަމަށް ކޯޓުން ކަނޑައަޅައިފި ނަމަ، މައްސަލަ ނިންމިގޮތުގެ ރިޕޯޓާއި އެކު ހަތަރު ދުވަހުގެ ތެރޭގައި އެކުއްޖާގެ އުފަންދުވަހުގެ ސެޓްފިކެޓް ހައްދަން ހުށަހަޅަން ޖެހެ އެވެ. ހުށަހަޅަންޖެހެނީ ބެލެނިވެރިންގެ ރަށްވެހިކަން އޮންނަ ސިޓީ ނޫނީ ރަށު ކައުންސިލަށެވެ.
މިއަދުން ފެށިގެން މި ގަވާއިދަށް އަމަލުކުރަން ފަށާފައި ވާއިރު، އެކި ގައުމުތަކުގައި ހިނގާ ދާހިލީ ހަނގުރާމަތަކަށް ދިއުމަށްފަހު އެނބުރި ރާއްޖެ އަންނަ މީހުންނާއި ކުދިން ބަންދުކުރެވޭނެ ހާއްސަ އިޖުރާއަތްތަކެއްވެސް ހޯމް މިނިސްޓްރީން ވަނީ ވަރަށް ފަހުން އެކުލަވާލާފަ އެވެ.
މިގޮތަށް ހަނގުރާމަތަކަށް ގޮސްފައިވާ ދިވެހިންގެ ސީދާ އަދަދެއް ނޭނގުނު ނަމަވެސް، ސީރިޔާގެ ރެފިއުޖީ ކޭމްޕުތަކުގައި ހާލުގައި ޖެހިފައިވާ މީހުންގެ ތެރޭގައި ގިނަ އަދަދެއްގެ ކުޑަކުދިން ހިމެނޭ ކަމަށް އެކި މަސްދަރުތަކުގެ މައުލޫމާތު ދެ އެވެ.
