އަރަބިއްޔާ ސުކޫލުގެ ދަރިވަރުން އިއްޒުއްދީން ސްކޫލަށް ބަދަލު ކުރުމާ ދެކޮޅަށް ބެލެނިވެރިން ނުކުމެއްޖެ އެވެ.
އަރަބިއްޔާ އިމާރާތުގެ ތަނބުތަކުން ބައިބައި ވެއްޓެމުން އަންނަ ކަމަށާއި އަދި އެ ސްކޫލުގައި ކިޔަވާ ދަރިވަރުންގެ ފުރާނައަށް ނުރައްކާވުމުގެ ފުރުސަތު ބޮޑު ކަމަށް ބުނެ ބައެއް ބެލެނިވެރިން ދަނީ ކަންބޮޑުވުން ފާޅުކުރަމުންނެވެ.
އަންނަ ޖެނުއަރީއަށް ނިންމުމަށް ދީފައިވާ އެ ސްޓްރަކްޗަރަލް އެސެސްމެންޓަށްފަހު އަރަބިއްޔާ އިމާރާތަކީ ކުދިންނަށް ރައްކާތެރި އިމާރާތެއް ނޫން ކަމަށް އަންގައިފިނަމަ ދެން ކަންތައް ކުރާނެ ގޮތުގެ ޕްލޭނެއް މިނިސްޓްރީން ވަނީ ނިންމާފަ އެވެ.
ޕްލޭންގައިވާ ކަންކަން މިނިސްޓްރީން ވަނީ އަރަބިއްޔާ ސްކޫލުގެ ޕީޓީއޭއާ ވެސް ހިއްސާކޮށްފަ އެވެ. އެގޮތުން, މިނިސްޓްރީން ހުށަހެޅީ ދެ ގޮތަކަށެވެ. އެއްގޮތަކީ އޮންލައިންކޮށް ކުދިން ކިޔެވުމަށް ބަދަލު ކުރުން ނުވަތަ މާލޭގެ އެހެން ސްކޫލަކަށް އަރަބިއްޔާ ދަރިވަރުން ބަދަލުކުރުމެވެ.
އަރަބިއްޔާގެ ބެލެނިވެރިޔަކު "އަދަދު" އަށް ބުނީ އަރަބިއްޔާގެ ބެލިނިވެރިންގެ ވިސްނުމާ ހިލާފަށް އިއްޒުންދީން ސްކޫލަށް އެތަނުގެ ދަރިވަރުން ވަގުތީ ގޮތުން ބަދަލު ކުރުމަށް އެޑިއުކޭޝަން މިނިސްޓްރީއިން މަސައްކަތް ކުރައްވަމުން ދާ ކަމަށެވެ.
އަރަބިއްޔާ ސްކޫލް ހުންނަނީ ޗާންދަނީ މަގުގަ އެވެ. އިއްޒުއްދީން ސްކޫލް ހުންނަނީ ނިކަގަސްމަގުގަ އެވެ.
އެކަމާ ގުޅިގެން ބެލެނިވެރިންގެ ފަރާތުން ބޮޑެތި ކަންބޮޑުވުންތަކެއް ހުރި ކަމަށާއި އެ މައްސަލަތަކަށް ހައްލެއް ހޯދުމުގެ ގޮތުން ރައީސް އިބްރާހިމް މުހައްމަދު ސޯލިހާ ބައްދަލު ކުރަން ނިންމާފައިވާ ކަމަށެވެ.
"ސީދާ ރައީސް ސޯލިހާ އެކު އަރަބިއްޔާ ސްކޫލުގެ ބެލެނިވެރިން ބައްދަލު ކުރަން ކޮންމެހެން ވެސް ބޭނުންވޭ. މިދިޔަ ބުރާސްފަތި ދުވަހު ވާނީ ސިޓީ ލާފައި ބައްދަލުކުރަން،"
ރައީސާ ބައްދަލު ކުރުމުގެ އެންމެ ބޮޑު އެއް ބޭނުމަކީ ބެލެނިވެރިންނާ އެއްވެސް މަޝަވަރާއެއް ކުރުމެއް ނެތި ކަންކަން ނިންމަމުން ދާތީ ކަމަށްވެސް ބެލެނިވެރިން ބުންޏެވެ.
އަރަބިއްޔާ އިމާރާތް އެންމެ ގިނަވެގެން ބޭނުން ކުރެވޭނީ 5 އަހަރު: ރިޕޯޓް
ރާއްޖޭގެ ކުންފުންޏަކާ ގުޅިގެން ވަނީ އިމާރާތުގެ ވިޝުއަލް އިންސްޕެކްޝަނެއް ހަދާފަ އެވެ. އެ އިންސްޕެކްޝަންގެ ރިޕޯޓުގައި ފާހަގަ ކޮށްފައިވާ ކަންކަމާއެކު ރެކަމަންޑޭޝަންތަކެއް ދީފައިވާ ކަމަށް އެޑިޔުކޭޝަން މިނިސްޓަރު ޑރ. އައިޝަތު އަލީ "އަދަދު "އަށް ދެއްވި އިންޓަވިއުއެއްގައި ވަނީ ވިދާޅުވެފަ އެވެ.
އެގޮތުން، ރިޕޯޓުގައި ބުނެފައިވަނީ، ކޮންމެ ހަ މަހަކުން ސްޓްރަކްޗަރަލް އެސެސެމެންޓެއް ހަދަން ޖެހޭނެ ކަމަށެވެ. ނަމަވެސް އެކަން ކޮށްފައި ނުވާކަން ފާހަގަ ކޮށްފައި ވެއެވެ.
އަރަބިއްޔާ ސްކޫލުގެ އާ އިމާރާތް، 29 މިލިއަން ރުފިޔާއަށް ހަދަން އެންމެ ފުރަތަމަ ހަވާލުކުރީ މާލޭ ހައި ރައިޒިން ކުންފުންޏާ އެވެ. އެއީ މާޗް 2، 2011 ގަ އެވެ. ނަމަވެސް މަސައްކަތް ނުގެންދާތީ ޖުލައި 20، 2011 ގައި އުވާލި އެވެ. އެއަށް ފަހު އޮގަސްޓް 25، 2011 ގައި ފަހުން ހައުސިން މިނިސްޓްރީން އެ އިމާރާތުގެ މަސައްކަތް ހަވާލުކުރީ އެލްއެފް ކޮންސްޓްރަކްޝަން އާ އެވެ.
ހަތް ބުރީގެ އެ އިމާރާތުގެ މަސައްކަތް އެކުންފުނިން ނިންމައި، އިމާރާތް ހުޅުވީ ސެޕްޓެމްބަރު 19، 2013 ގައެވެ. ހުޅުވިތާ އަށް އަހަރު ފަހުން އެ ސްކޫލުގެ ތަނބުތަކުގައި ބޮޑެތި ރެނދުތައް ލައި ވަރަށް ބޮޑަށް ވަނީ ހަލާކުވެފަ އެވެ.
