އަނިޔާގެ ސަބަބުން ރާއްޖޭގެ ގައުމީ ޓީމުގެ އެއް ވަނަ ކީޕަރު މުހައްމަދު ފައިސަލް އަށް އަންނަ ހަފްތާގައި ސްރީ ލަންކާގައި ފަށާ މަހިންދުރަ ރާޖަޕަކްސަ ފޯ ނޭޝަންސް ކަޕް ގެއްލިއްޖެ އެވެ.
ސާފް ޗެމްޕިއަންޝިޕްގައި ސްރީ ލަންކާއާ ދެކޮޅަށް މިދިޔަ މަހު 10 ވަަނަ ދުވަހު ކުޅުނު މެޗުގައި ފައިސަލްގެ ފަލަމަސްގަނޑަށް އަނިޔާވެގެން ބަދަލުކުރަން ޖެހުނެވެ. އެކަމަކު، އޭގެ ތިން ދުވަސް ފަހުން ފައިސަލް ވަނީ އިންޑިއާއާ ދެކޮޅަށް ރާއްޖެ ކުޅުނު މެޗުގައި ކުޅެފަ އެވެ.
ފައިސަލް އެ މެޗުގައި ކުޅުނީ އެއްކޮށް ފިޓްކޮށް ހުރެތޯ ގިނަ ބަޔަކު ސުވާލު އުފެއްދިއިރު، އިންޑިއާ މެޗަށް ފަހު އޮތް ނޫސްވެރިންގެ ބައްދަލުވުމުގައި ގައުމީ ޓީމުގެ ކޯޗަކަށްް އޭރު ހުރި (މިހާރުގެ އެސިސްޓަންޓް ކޯޗު) އަލީ ސުޒޭން ވެސް ބުނީ އެ މެޗުގައި ފެނުނީ އެންމެ ފިޓް ފައިސަލް ކަމަށް ގަބޫލުނުކުރެވޭ ކަމަށެވެ.
ގައުމީ ޓީމުން ދާދި ފަހުން ހދ. ކުޅުދުއްފުށީ ޒިގްޒެގް ދަނޑު ހުޅުވާން ކުޅުނު މެޗުގައި ފައިސަލް ޓީމާ އެކު ދަތުރުކުރި ނަމަވެސް ނުކުޅެ އެވެ. މީގެ ފަސް ދުވަސް ކުރިން ޅ.ކުރެއްދޫ ރިސޯޓްގައި ކުޅުނު ހާއްސަ މެޗުގައި ވެސް ފައިސަލް ނުކުޅެ އެވެ. އަދި އިއްޔެ ގައުމީ ޓީމަށް ހާއްސަކޮށްގެން ހޮޓެލް ޖެންގައި ބޭއްވި އިވެންޓްގައި ވެސް ފައިސަލް ބައިވެރިނުވެ އެވެ.
ގައުމީ ޓީމުގެ އާ ހެޑްކޯޗު އިޓަލީގެ ފްރެންޗެސްކޯ މޮރިއޭރޯ ޓީމާ އެކު ފަރިތަކުރުންތައް ފަށައިގެން މިހާތަނަށް ބޭއްވި ސެޝަންތަކުގައި ފައިސަލް ފުލް ޓްރެއިނިންގައި ބައިވެރިވެފައި ނުވެ އެވެ. އެނގިފައިވާ ގޮތުގައި ފައިސަލް ޓީމާ އެކު ލަންކާ މުބާރާތަށް ނުދާން ނިންމީ ގައުމީ ޓީމުގެ ގޯލްކީޕަރު ކޯޗުންނާއި މޮރިއޭރޯއާ ވެސް މަޝްވަރާކުރުމަށް ފަހު އެވެ.
ފައިސަލްގެ އިއްޔެ ވަނީ ރަސްމީކޮށް ފަލަމަސްގަނޑަށް ލިބިފައިވާ އަނިޔާ އިން އެއްކޮށް ރަނގަޅުވާން ސްޓްރެންތު ޓްރެއިނިންތައް ފަށައިފަ އެވެ. މިހާރު އޭނާގެ ޓާގެޓަކީ އަންނަ މަހު 15 ވަނަ ދުވަހު ފަށާ ރާއްޖޭގެ ލޯކަލް ސީޒަން އެއްކޮށް ފިޓްވުމެވެ. ފައިސަލް މިދިޔަ ސީޒަނުގައި ކުޅުނީ ކްލަބް ވެލެންސިއާ އަށެވެ.
ގައުމީ ޓީމުގެ ޓްރެއިނިންގައި މި ވަގުތު ފަސް ކީޕަރުން ބައިވެރިވެ އެވެ. އެއީ ކްލަބް ވެލެންސިއާ އަށް މިދިޔަ އަހަރު ކުޅުނު މުހައްމަދު ޝަފީއު (ޗެކް)، ދަ ގްރާންޑޭގެ އިޔާން އަބްދުލް އަލީމް (ޗިކީ)، ވެލެންސިއާގެ ހަސަން ތޮލާލް (ޓޮޕްލަކް)، ޔުނައިޓެޑް ވިކްޓްރީ (ޔޫވީ) އާއި 23 އަހަރުން ދަށުގެ ޓީމުގެ ކީޕަރު، އަލީ ނާޖިހު (ނާޖީ) އަދި 19 އަހަރުން ދަށުގެ ޓީމުގެ ގޯލްކީޕަރު ޔޫސުފް މީސަމް އަބްދުﷲ އެވެ.
ފަސް ކީޕަރުންގެ ތެރެއިން ލަންކާ މުބާރާތަށް ދާނީ ތިން ކީޕަރުންނެވެ. މިހާރު އޮތްގޮތުން ގައުމީ ޓީމު މިއަދުގެ ވަގުތެއްގައި ފައިނަލްކޮށް، ލަންކާ އަށް ދާން މާދަމާ ފުރާނެ އެވެ. ގައުމީ ކޯޗު މޮރިއޭރޯ ވަނީ އޭނާގެ ޓާގެޓަކީ މުބާރާތް ކާމިޔާބު ކުރުން ކަމަށް ބުނެފަ އެވެ.
ލަންކާ މުބާރާތުގައި މި މަހު އަށް ވަނަ ދުވަހު ރާއްޖެ ކުޅޭނީ ލަންކާއާ އެވެ. ދެ ވަނަ މެޗުގައި 11 ވަނަ ދުވަހު ބަންގްލަދޭޝްއާ ބައްދަލުކުރާނެ އެވެ. އަދި ތިން ވަނަ މެޗުގައި ސީޝެލްސްއާ ކުޅޭނީ މި މަހު 14 ވަނަ ދުވަހު އެވެ. ފައިނަލަށް ގޮސްފިނަމަ އެ މެޗު އޮންނާނީ މި މަހު 17 ވަނަ ދުވަހު އެވެ.
