އުރީދޫ ސާފް ޗެމްޕިއަންޝިޕްގައި މާދަމާ ސްރީ ލަންކާއާ ދެކޮޅަށް ރާއްޖެ ކުޅޭ މެޗަކީ ފަސޭހަ މެޗަކަށް ނުވާނެ ކަމަށާއި ރާއްޖޭގެ ޓީމު އޮތީ މި މެޗަށް ވަރަށް ރަނގަޅަށް ތައްޔާރުވެފައި ކަމަށް ގައުމީ ޓީމުގެ ކޯޗު އަލީ ސުޒޭން ބުނެފި އެވެ.

ލަންކާއާ ދެކޮޅަށް ރާއްޖެ ނުކުންނައިރު، މުބާރާތުގައި އެންމެ ފަހު ކުޅުނު މެޗުގައި ބަންގްލަދޭޝް އަތުން 2-0 އިން މޮޅުވެ، ރާއްޖެ ވަނީ ފައިނަލްގެ އުންމީދު ދަމަހައްޓައިފަ އެވެ. އެހެންކަމުން، ފައިނަލްގެ ފުރުސަތު ބޮޑުކުރުމަށް، މާދަމާ މެޗުން ތިން ޕޮއިންޓް ހޯދުން ރާއްޖެ އަށް ވަރަށް މުހިންމެވެ.

"އެންމެ ފަހުން މެޗަށް ފަހު (ބަންގަލަދޭޝް މެޗަށް) ފަހު ބޮޑަށް ރިކަވަރީގެ ބައި މި ދަނީ. އެންމެ ފަހުން ކުޅުނު މެޗުގައި ވަރަށް ރަނގަޅަށް ކަންތައްތައް ދިޔައީމަ ކުޅުންތެރިން ތިބީ ވަރަށް ރަނގަޅު މޯޓިވޭޝަނެއްގައި،" މިއަދު އޮތް ޕްރީ މެޗު ޕްރެސް ކޮންފަރެންސްގައި ސުޒޭން ބުންޏެވެ. "މިއީ ހަވީރު ކުޅޭ މެޗެއްވީމަ، ކޮންމެ ވެސް ވަރެއްގެ ބަދަލުތަކެއް އަންނާނެ. ޓީމު އޮތީ ތައްޔާރަށް."

ރާއްޖެ މި ވަގުތު އޮތީ ޕޮއިންޓް ތާވަލުގެ ތިން ވަނައިގަ އެެވެ. އެކަމަކު މާދަމާ ހަވީރު ލަންކާ އަތުން މޮޅުވެގެން އެއް ވަނަ އަށް އެރޭނެ އެވެ. އޭރުން މާދަމާރޭ ނޭޕާލާއި އިންޑިއާ ކުޅޭ މެޗު ދެ ޓީމަށް ވެސް ނަތީޖާއެއް ނެރުން މުހިއްމުވާނެ އެވެ.

ސުޒޭން ބުނީ ހިސާބުތަކެއް ޖަހައިގެން މާ ކުރިއަށް ވިސްނުމަށް ވުރެ ފޯކަސް ކުރަން ޖެހޭނީ ކުރިއަށް އޮތް މެޗަށް ކަމަށެވެ.

"ކަލްކިއުލޭޝަންތަކެއް ހަދަން. އެ ގޮތަށް މިހާރު ވެސް ބަޔަކު ހިސާބު ޖަހައިފާނެ. އެހެން ނަމަވެސް މެޗަކުން މެޗަކުން ޕްލޭން ކޮށްލައިގެން މި ގޮތަށް ދިއުން ރާއްޖެ އަށް ވެސް އިންޑިއާ އަށް ވެސް އެންމެ ރަނގަޅުވާނީ،" ސުޒޭން ބުންޏެވެ.

އެއީ އަޅުގަނޑުމެން މި ތިބީ ތަންކޮޅެއް ފަހަތުގައި އެހެންވީމަ ކުރިއަށް އަރާ ކަމަށްވާނަމަ އެންމެ މަތީގައި އޮތް ހިސާބަށް ބެލުމަށް ވުރެ ފުރަތަމަ އަޅަން އިން ހަރުފަތަށް ވިސްނައިފިއްޔާ ނުވެއްޓި ސަލާމަތްވާނެ. އެއީ މަތީގައި އޮތް ހަރުފަތަށް ބަލައިގެން ތިރީ އޮތް ހަރުފަތަށް ނުބަލައި އޮވެއްޖިއްޔާ ނުބައިތަނެއްގައި ފައި އެޅިގެން ވެއްޓޭނެ. މެޗަކުން މެޗަކުން ރަނގަޅަށް ދާނީ،"

ލީގު ބުރުގެ ފަހު މެޗުގައި އަންނަ ބުދަ ދުވަހުގެރޭ ރާއްޖެ ކުޅެން ޖެހޭނީ އިންޑިއާއާ އެވެ.

ލަންކާއާ ކުޅުމަކީ ޗެލެންޖެއް

މުބާރާތުގައި އެންމެ ފަހުން ކުޅުނު މެޗުގައި، ލަންކާ އިން ވަނީ މުބާރާތުގެ ފޭވަރިޓެއް ކަމަށްވާ އިންޑިއާއާ ލަނޑެއް ނުޖެހި އެއްވަރުކޮށްފަ އެވެ. ކުޅުނު ތިން މެޗުގެ ތެރެއިން، ދެ މެޗުން ބަލިވެ، ލަންކާ ވަނީ މުބާރާތުން ކަޓައިފަ އެވެ. އެކަމަކު ތިން މެޗުގައި ވެސް، ލަންކާ ޓީމާ ދެކޮޅަށް ކުޅުނު ޓީމުތަކަށް އުނދަގޫތަކާ ކުރިމަތިވި އެވެ.

ސުޒޭން ބުނީ ލަންކާއާ ދެކޮޅަށް ކުޅުމަކީ "އުނދަގޫ ޗެލެންޖެއް" ކަމަށެވެ. އަދި ލަންކާ އަކީ ވަރަށް މަސައްކަތުގެ ރޭޓް ރަނގަޅު، ޑިފެންސް ރަނގަޅު ޓީމަކަށްވުމަކީ އެ ޓީމާ ދެކޮޅަށް ކުޅެން އުނދަގޫވާނެ ސަބަބުތައް ކަމަށެވެ.

"އިންޑިއާއާ ދެކޮޅަށް ލަންކާ އިން ޓެކްޓިކަލް ޕްލޭން ކާމިޔާބުކުރި. ވަރަށް މަސައްކަތުގެ ރޭޓް ރަނގަޅު ޓީމެއް. ޑިފެންސިވްކޮށް ވަރުގަދަ. އެހެންވީމަ، ރާއްޖޭން ވަރަށް ބޮޑަށް ސަމާލުވާންޖެހޭ. އެކަމަކު ރާއްޖޭގެ އެޓޭކިން އެހެން ޓީމުތަކާ ތަފާތު. އަޅުގަނޑުމެން މި މެޗުގައި 100 ޕަސެންޓް ދޭގެން، ޕޮއިންޓްތައް ހޯދަން މަސައްކަތްކުރާނަން،" ސުޒޭން ބުންޏެވެ.

ރާއްޖެ އެންމެ ފަހުން ކުޅުނު މެޗުގައި އަނިޔާގެ މައްސަލަތަކެއް ދިމާވެ، ދެ މިޑްފީލްޑަރުން ކަމަށްވާ އައްސަދު އަލީ (އަޑުބަރޭ) އާއި ހުސެއިން ނިހާން (ނިހާޓް) ވަނީ ބަދަލުކޮށްފަ އެވެ.

އެކަމަކު ސުޒޭން ބުނީ އަނިޔާގެ މައްސަލަ އަކާ ގުޅިގެން މި މެޗުގައި ބޭނުން ނުކުރެވޭނެ އެއްވެސް ކުޅުންތެރިއެއް ނެތް ކަމަށެވެ.

"މާދަމާ ބޭނުންނުކުރެވޭނެ ކުޅުންތެރިއެއް ނެތް. އެކަމަކު އެންމެ ފަހުން ކުޅުނު މެޗަށް ނިކުތްއިރު، 100 ޕަސެންޓް ފިޓުކޮށް ތިބި ބައެއް ކުޅުންތެރިން އެބަތިބި މުޅިން ފިޓުނޫން. އެކަމަކު މާދަމާ މެޗަށް އެ ކުޅުންތެރިން ރިކަވާ ވާނެ ކަމަށް އުންމީދުކުރަނީ،" ސުޒޭން ބުންޏެވެ.

ރާއްޖެ އެންމެ ފަހުން ކުޅުނު މެޗުގައި، ވަރަށް ގިނަ އަދަދެއްގެ ސަޕޯޓަރުން ވަނީ ދަނޑަށް ވަދެ، ރާއްޖޭގެ ޓީމަށް ބޮޑު ތަރުހީބެއް ދީފަ އެވެ.

ސުޒޭން ވަނީ އެގޮތުގައި ސަޕޯޓަރުން ދެމިތިބުމަށް އެދިފަ އެވެ. އަދި މާދަމާގެ މެޗަށް ދަނޑަށް ވަންނަން ބޭނުންވާ އެންމެނަށް ދަނޑަށް ނުވަދެވުނަސް، "ކެތްރިކަމާއެކު ޓީމުގެ ފަހުތުގައި" ތިބުމަށް ސުޒޭން ވަނީ އެދިފަ އެވެ.

"އަޅުގަނޑު ދަންނަވާލަން ބޭނުންވަނީ އަޅުގަނޑުމެންނާ ދޭތެރޭ އުންމީދު ކުރާށޭ، ޔަގީންކަން ބާއްވާށޭ. އިރާދަކުރެއްވިއްޔާ ކުޅުންތެރިން ތި ބޭފުޅުން މާޔޫސްވިޔަކަ ނުދޭނޭ،" ސުޒޭން ބުންޏެވެ.

"ވަރަށް އަދަބުވެރިކަމާ އެކު ފުޓްބޯޅަ ސަޕޯޓަރުންގެ ކިބައިން އެދެން، މި ދަނޑުގެ ކެޕޭސިޓީއަކީ 5000. އެންމެން ވެސް ބޭނުންވާނެ ސަޕޯޓުކުރަން ދަނޑަށް ވަންނަން. ވަރަށް ކުޑަ އަދަދެއް. ކެތްތެރިކަމާއެކު ޓީމުގެ ފަހަތުގައި ތިއްބަވާ. ތި ބޭފުޅުން މާޔޫސްވާނެ ކަމެއް ޓީމުގެ ފަރާތުން އިރާދަކުރެވިއްޔާ ނާންނާނެ."

ރާއްޖެ އާއި ލަންކާ ވަނީ 2018 ވަނަ އަހަރު ސާފް ޗެމްޕިއަންޝިޕްގެ ގުރޫޕް ސްޓޭޖުގައި ވެސް ބައްދަލުކޮށްފަ އެވެ. އެ މެޗު ނިމުނީ ލަނޑެއް ނުޖެހި އެއްވަރުވެގެނެވެ. މާދަމާ ކުޅޭ މެޗު ފަށާނީ ހަވީރު ހަތަރެއް ޖަހާއިރު އެވެ.