ދެ އޮލިމްޕިކްސް އެއްގައި ރާއްޖެ ތަމްސީލްކުރުމުގެ ފުރުސަތު ލިބިފައިވަނީ މިހާތަނަށް ވަރަށް މަދު އެތުލީޓުންނަކަށެވެ. އޭގެ ތެރެއިން އެއް އެތުލީޓަކީ ދެކުނު ކޮރެއާގެ ސޯލްގައި 1988 ވަނަ އަހަރު ބޭއްވި އޮލިމްޕިކްސްގައި ރާއްޖެ ދިދަ އުފުލި ހުސެއިން ހަލީމް (ކުޑަ ހުސެން) އެވެ. އޭނާ ވަނީ 1992 ވަނަ އަހަރު ސްޕެއިނުގެ ބާސެލޯނާގައި ބޭއްވި އޮލިމްޕިކްސްގައި ވެސް ރާއްޖެ ތަމްސީލް ކޮށްފަ އެވެ.

ކުޅިވަރުގެ ދާއިރާ އިން ހިތްވަރު ދިނުމުގެ ގައުމީ އިނާމު 2016 ވަނަ އަހަރު ހާސިލްކުރި ކުޑަ ހުސެންގެ ސޯޝަލް މީޑިއާ އެކަައުންޓްތައް މި ފަހަރުގެ ޓޯކިޔޯ އޮލިމްޕިކްސް ފެށި ފަހުން ހާއްސަކޮށްފައި އޮތީ ކުޅިވަރުގެ މި ބޮޑު އީދަށެވެ.

މަޝްހޫރު ސޯޝަލް މީޑިއާ ޕްލެޓްފޯމް ފޭސްބުކްގައި ކުޑަ ހުސެން ކޮށްފައިވާ އެއް ޕޯސްޓެއްގައި ވަނީ އޮލިމްޕިކްސް އަކުން ރާއްޖެ އަށް ރަން މެޑަލެއް ނޫނީ މެޑަލެއް ހޯދޭނެ ގޮތްތަކެއް ކިޔައިދީފަ އެވެ. މިއީ ކުރީގެ ދުވުންތެރިޔާ އަދި ފެތުމުގެ ގިނަ ކަންކަން ކުރަމުން އަންނަ ކްލަބެއް ކަމަށްވާ ސްވިމް މޯލްޑިވްސް ހިންގެވުމުގައި އިސް ދައުރެއް އަދާކުރައްވާ ޕްރޮސެކިއުޓާ ޖެނެރަލް (ޕީޖީ)، އަލްއުސްތާޒް ހުސެއިން ޝަމީމްއާ ކުރެވުނު މަޝްވަރާތަކަށް ފަހު ސޯޝަލް މީޑިއާ އަށް ކުޑަ ހުސެން ދޫކޮށްލި ވާހަކަތަކެކެވެ.

"ދިވެހިރާއްޖެ އަށް އޮލިމްޕިކުން ރަން މެޑަލެއް ހޯދަން ކޮބާހޭ ރޫޓަކީ. މި ވާހަކަ އަކީ އަޅުގަނޑު ވަރަށް ޒަމާނުއްސުރެ ދައްކާ ވާހަކައެއް. އަޅުގަނޑު ޑިގްރީއެއް ހެދި ހިސާބުން ފެށިގެން ދައްކާ ވާހަކައެއް. ދިވެހިރާއްޖެ ކަހަލަ އާބާދީ ކުޑަ ގައުމަކަށް އޮލިމްޕިކްސްގެ ރަން މެޑަލެއް ހޯދުމަކީ ވަރަށް އުނދަގޫ ވަރަށް ޗެލެންޖިން ކަމެއް،" ކުޅިވަރުގެ ދާއިރާއިން، ކުޅިވަރު ކުޅުމާއި މީހުން ތަމްރީނު ކުރުމުގެ ރޮނގުން ގައުމީ އިނާމް ހާސިލްކުރި ކުޑަ ހުސެން ބުންޏެވެ.

ކުޅިވަރުގެ ދާއިރާ އިން ޕީއެޗްޑީ ނަންގަވާފައިވާ ކުޑަ ހުސެން ބުނީ އޮލިމްޕިކް ފެންވަރުގެ ރަން މެޑަލެއް ހޯދަން ކުރަން ޖެހޭ މަސައްކަތް ބިނާވަނީ އާންމު ގޮތެއްގައި 10 އަހަރު ދުވަހުގެ ޓްރެއިނިން އަށް ކަމަށެވެ. އެ ގޮތުން ދިހަ އަހަރު ހަފްތާ އަކު ހަ ދުވަހުގެ މަގުން ކޮންމެ ދުވަހަކު ފަސް ގަޑިއިރު ނޫނީ އަށް ގަޑިއިރު ފަރިތަކުރުމާއި ފެންވަރު ރަނގަޅު މޮޅު ކޯޗުންގެ ތަމްރީން ލިބުން ހިމެނެ އެވެ. އަދި ބައިނަލްއަގުވާމީ ގޮތުން ބަލާއިރު ވަރަށް ރަނގަޅު މުބާރާތްތަކުގައި ވާދަކުރުން މުހިއްމުއިރު، އަހަރަކު މަދުވެގެން ހަ މުބާރާތުގައި ބައިވެރިވުން ވެސް ވަރަށް ބޮޑަށް އެދެވިގެންވެ އެވެ. ރަނގަޅު ސްޕޮންސަރެއްގެ އެހީ އާއި އާއިލާގެ ސަޕޯޓް ވެސް ލިބެން ޖެހެ އެވެ.

"މޯޓިވޭޝަން ނުގެއްލި ރެޔާއި ދުވާލު މަރަށް ފުރާނަ އަށް އުޅިގެން 10 އަހަރު ތެރޭގައި އޮލިމްޕިކްގެ މެޑަލް އެއް ކީއްކުރަން އެންމެ އާދައިގެ މެޑަލެއް ލިބުމުގެ ފުރުސަތު މި އޮންނަނީ. އެހެން ކަމުން މި ފޯމިއުލާ އަށް ދިވެހިރާއްޖޭގެ އެތުލީޓަކު އަދި މިހާތަނަށް ދާން ގާތަށް ވެސް ނުދެވޭ. އަދި އެއީ ވަރަށް އުނދަގޫ ކަމެއް،" ކުޑަ ހުސެން ބުންޏެވެ.

ކުޅިވަރުގެ ދާއިރާއިން ހިތްވަރު ދިނުމުގެ ގައުމީ އިނާމު ޑރ. ހުސެއިން ހަލީމް އަށް، ރައީސް ޔާމީން 2016 ވަނަ އަހަރު ދެއްވަނީ.---ފޮޓޯ: ރައީސް އޮފީސް.-- ފޮޓޯ: ރައީސް އޮފީސް

ރާއްޖެ ކަހަލަ ކުދި ގައުމަކުން އޮލިމްޕިކުން މެޑަލް ހޯދަން ބަލާއިރު އަމަލުކުރެވޭނެ ހަތަރު ގޮތެއް ކުޑަ ހުސެން ވަނީ ކިޔައިދީފަ އެވެ.

ފުރަތަމަ ގޮތަކީ ދިވެއްސަކާ އިނދެގެން އުޅޭ ބިދޭސީ މީހަކަށް ލިބޭ ދަރިއަކު އެ ގައުމެއްގައި އެތައް އަހަރެއް ވަންދެން ފަރިތަކޮށްގެން އޮލިމްޕިކްސްއާ ހަމައަށް ގެންދިއުމެވެ. ދެ ވަނަ ގޮތަކީ ރާއްޖޭގެ އެތުލީޓެއް ދިގު މުއްދަތަކަށް ބޭރަށް ގެންގޮސްގެން ތަމްރީން ކުރުވުމެވެ. ތިން ވަނަ ގޮތަކީ ބައެއް އަރަބި އަދި ޔޫރަޕްގެ ގައުމުތަކުން އަމަލު ކުރަމުން އަންނަ އުސޫލެއް ނަކަލުކޮށް އެހެން ގައުމެއްގެ އެތުލީޓަކަށް ދިވެހި ޕާސްޕޯޓެއް ދީގެން ވާދަކުރުމެވެ. އަދި ހަތަރު ވަނަ ގޮތަކީ ރާއްޖޭގެ ކުޅިވަރު ދާއިރާ ރަނގަޅު ފެންވަރަކަށް ތަރައްގީ ކޮށްގެން އޮލިމްޕިކްސްގައި މެޑަލް ހޯދޭ ވަރަށް އެތުލީޓުން ތަމްރީން ކުރުމެވެ.

ކުޑަ ހުސެއިންގެ ފޯމިއުލާތަކަށް ކަޅިއެއް

ފުރަތަމަ ފޯމިއުލާގައި ކުޑަ ހުސެން ބުނެދެނީ ދިވެއްސެއް އިނދެގެން އުޅެނީ އޮސްޓްރޭލިއާ މީހެއް ނޫނީ އެމެރިކާ މީހެއް ނޫނީ ޖަޕާން މީހަކާ ކަމަށްވަންޏާ އެ ކުއްޖާ މި ހެދި ބޮޑުވަނީ ޖަޕާނުގައި ނޫނީ އެމެރިކާގައި ނޫނީ އޮސްޓްރޭލިއާގައި ކަމަށްވާއިރު، އެ ގައުމުތަކަކީ ކުޅިވަރުގެ ރޮނގުން ބަލާއިރު ވަރަށް ތަރައްގީ ގައުމެއް ކަމަށްވާތީ އޭގެ ބޭނުން ހިފުމަށެވެ. އެ ގައުމުގައި ތަމްރީން ކުރުމުގެ ކަންކަން އޮންނާނީ ރަނގަޅު ސިސްޓަމެއްގެ ތެރެއިން ކަމަށްވާއިރު، އޭގެއިން ކުއްޖަކަށް ފުރުސަތު ދީގެން ރާއްޖެ އަށް މެޑަލް ހޯދިދާނެ ކަމަށް ކުޑަ ހުސެން ގަބޫލުކުރެ އެވެ.

"އެ ކުއްޖާގެ މި ދެންނެވި ހުރިހާ ކެރެކްޓާއެއް ހުރެ ކުއްޖާ ބޮޑުވެގެން ދިވެހި ޕާސްޕޯޓް އޮންނަ ކަމަށްވަންޏާމު ދިވެހި ރާއްޖެ ތަމްސީލް ކޮށްގެން ރަން މެޑަލް ލިބުމުގެ ފުރުސަތު ވަރަށް ބޮޑަށް އޮންނާނެ،" ކުޑަ ހުސެން ބުންޏެވެ.

ދެ ވަނަ ގޮތަކީ ދިވެހިރާއްޖޭގައި ތިބި ހުނަރުވެރި ކުދިންގެ ތެރެއިން ހޮވާލެވޭ ކުދިންތަކެއް ދިގު މުއްދަތުގެ ޓްރެއިނިންތަކަކަށް ރާއްޖޭން ބޭރަށް ފޮނުވައިގެން ތަމްރީން ކޮށްގެން މެޑަލަކާ ހަމަށް ދިއުމެވެ.

ކުޑަ ހުސެން ވަނީ އޭނާ ދެކޭގޮތުގައި ޓްރެއިނިން އަށް ފޮނުވިދާނެ ކުދިންތަކެއްގެ ނަން ހިއްސާކޮށްފަ އެވެ. އެއީ އެތުލެޓިކްސްގެ އަރަމުން އަންނަ ދެ ތަރި އައިޝަތު ހިމްނާ ހަސަން އާއި މަރިޔަމް ރޫޔާ އަލީ އަދި ކާމިޔާބު ހޯދަމުން އަންނަ ފެތުންތެރިޔާ މުހައްމަދު އާން ހުސެއިން އެވެ.

ކުޑަ ހުސެން ބުނީ ސަރުކާރުންނާއި ކުޅިވަރު ވުޒާރާގެ އިތުރުން މިކަމުގައި ޝާމިލުވާ އެންމެން ގުޅިގެން ހުނަރުހުރި ރަނގަޅު ކުދިން ހަތަރު އަހަރަށް ނޫނީ އަށް އަހަރަށް ޓްރެއިނިން އަށް ފޮނުވިދާނެ ކަމަށެވެ. އެ ގޮތުން ސްވިމިން އަށް ޓްރެއިނިން ހަދަން ދާ ކުއްޖަކު އެމެރިކާ އަށް ނޫނީ އޮސްޓްރޭލިއާގެ ވަރަށް ރަނގަޅު ޕްރޮގްރާމަކަށް ފޮނުވިދާނެ ކަން ކުޑަ ހުސެން ފާހަގަކުރި އެވެ.

"މަދުވެގެން ހަތަރު އަހަރު ނޫނިއްޔާ އެދެވިގެންވަނީ އަށް އަހަރު. އެ ކުއްޖާ އަށް ކިޔެވޭ ގޮތަށް އެ ކުއްޖާ އަށް ރަނގަޅު ޕްރޮގްރާމްގައި އަނިޔާ ނުވެ ރަނގަޅަށް ޓްރެއިނިން ހެދޭ ގޮތަކަށް ފޮނުވައިފިއްޔާމު އަށް އަހަރު ފަހުން މީގެ ދެ އޮލިމްޕިކްސް ފަހުން އޮންނަ އޮލިމްޕިކްސްގައި ރަން މެޑަލެއް ނޫނީ މެޑަލެއް ހޯދުމުގެ ފުރުސަތު އޮންނާނެ،" ކުޑަ ހުސެން ބުންޏެވެ.

މި އަހަރު ކުރީކޮޅުގައި މާލޭ ސިންތެޓިކް ޓްރެކް ހުޅުވުމުގެ ރަސްމިއްޔާތުގެ ތެރެއިން ކުޑަ ހުސެން (ވ) އާއި ރައީސް އިބްރާހިމް މުހައްމަދު ސޯލިހު.-- ފޮޓޯ: ރައީސް އޮފީސް

މެޑަލް ހޯދަން ކުޑަ ހުސެން ހިއްސާކުރި ތިން ވަނަ ފޯމިއުލާ އަކީ ބައެއް ޔޫރަޕްގެ ގައުމުތައް އަދި އަރަބި ގައުމުތަކުން ވެސް ބޭނުންކުރާ ފޯމިއުލާ އެކެވެ. އެ ފޯމިއުލާ އަކީ ބިދޭސީ އެހެން ގައުމެއްގެ އެތުލީޓަކަށް ދިވެހި ޕާސްޕޯޓް ދީގެން އޮލިމްޕިކްސް ފަދަ ގޭމްސްތަކުގައި ވާދަކުރުމެވެ. މިއީ ކުޑަ ހުސެން ވެސް ހަގީގަތުގައި ގަބޫލުކުރާ ފޯމިއުލާއެއް ނޫނެވެ.

"ދިވެހި ޕާސްޕޯޓް ދޭންވީ ކެންޏާގެ މޮޅު ދުވުންތެރިއަކަށް. ނޫނީ ދިވެހި ޕާސްޕޯޓް ދޭންވީ އެމެރިކާ ނޫނީ އޮސްޓްރޭލިއާގެ މެޑަލް ހޯދާ ފެންވަރުގެ ފެތުންތެރިއަކަށް. އެ ގޮތަށް ވެސް ބައެއް ގައުމުތަކުން މެޑަލް ހޯދާ. އެ ގޮތަށް ހޯދާ އޮލިމްޕިކްސް ގޭމްސް ނޫނީ. ވޯލްޑް ރެކޯޑް ނޫނީ. ވޯލްޑް ޗެމްޕިއަންޝިޕް މެޑަލަކީ އަޅުގަނޑު އެހާ ގަބޫލުކުރާ ރޫޓެއް ނޫން،" ކުޑަ ހުސެން ބުންޏެވެ.

ހަތަރު ވަަނަ ފޯމިއުލާ އަކީ ރާއްޖޭގެ ވަސީލަތްތަކުގައި އެތުލީޓަކު ތަމްރީން ކޮށްގެން މެޑަލަކާ ހަމައަށް ދިއުމެވެ. ކުޑަ ހުސެން ދެކޭގޮތުގައި މި ގޮތަށް ކަންތައް ކޮށްގެން މެޑަލް ހޯދަން އަދި ވަރަށް ގިނަ ކަންކަން ފުރިހަމަވާން ޖެހެ އެވެ. އެންމެ ބޮޑު ކަމަކަށް ރާއްޖޭގެ ކުޅިވަރު ސިސްޓަމް ނުވަތަ އޮނިގަނޑު މިހާރަށް ވުރެ އެތައް ގުނައެއް ހަރުދަނާ ކުރަން ޖެހެ އެވެ.

ކުޑަ ހުސެން ފާހަގަކުރި ގޮތުގައި ރާއްޖޭގައި އެންމެ މަތީ ފެންވަރުގެ ތަމްރީންތައް ކުރެވޭ ވަރަށް ކުޅިވަރުގެ ނިޒާމެއް އަދި ނެތެވެ. އޮލިމްޕިކްސް އިން މެޑަލެއް ހޯދަން ރާއްޖޭގައި ތަމްރީން ހަދާނަމަ ކުރިއަށް މި އޮތް 10 އަހަރު ތެރޭގައި އެ ކަހަލަ ނިޒާމެއް ގާއިމްވެގެން މެނުވީ އެ ފަދަ ކަމެއް ހާސިލްކުރުމަކީ އުނދަގޫ ކަމެއް ކަން ކުޑަ ހުސެން ފާހަގަކުރި އެެވެ.

"(އެފަދަ ސިސްޓަމެއް) ގާއިމްވާނެ ކަމުގެ މަަލަމައްޗެއް އަދިއެއް ނުފެނޭ. އެހެންވެ ދިވެހި ރާއްޖޭގައި ޓްރެއިން ކޮށްގެން އޮލިމްޕިކްސް ފެންވަރުގެ މެޑަލެއް ހޯދުމަކީ ވަރަށް ނާދިރު ކަމެއް. އެހެން ނަމަވެސް ނުވާނެ ކަމެކޭ ނުބުނާނަން. އޭގެ ސަބަބަކީ އެނީތިން އިސް ޕޮސިބަލް (ކޮންމެ ކަމެއް ވެސް ވެދާނެ) ކަމަށް އަޅުގަނޑު ގަބޫލުކުރަނީ،" ކުޑަ ހުސެން ބުންޏެވެ.

ރާއްޖޭގެ ކުޅިވަރު އެތުލީޓުން ބައިނަލްއަގުވާމީ ގޮތުން ބޮޑު ކާމިޔާބަކާ ހަމައަށް ގެންދެވޭނީ ވަރަށް ގިނަ ގޮތްގޮތުން ކުޅިވަރުގެ ހުރިހާ ފަރާތެއް އެކުވެގެން ކުރެވޭ މަސައްކަތުން ކަމަށް ކުޑަ ހުސެން ބުންޏެވެ.

އޮލިމްޕިކް ލެވަލްގެ އެތުލީޓުން/ކުޅުންތެރިން ރާއްޖޭގައި އުފެދޭ

ކުޅިވަރު ކުޅުންތެރިންނާއި އެތުލީޓުންނަށް ބަލާއިރު ރާއްޖޭގައި ދުނިޔޭގެ ފެންވަރުގެ ތަރިން އުފެދިފައި އެބަހުރި ކަމަށް ކުޑަ ހުސެން ވެސް ގަބޫލުކުރެ އެވެ. ކުޑަ ހުސެން އޭގެ ތެރެއިން ފާހަގަކުރީ އާންމު ގޮތެއްގައި ގިނަ ބަޔަކު ވެސް އެންމެ ފަރިތަކޮށް ނަން ކިޔާ ދެ ނަމެކެވެ. އެއީ ރާއްޖޭގެ އެންމެ ކާމިޔާބު އެތުލީޓު އަދި އެންމެ ބާރު ދުވުންތެރިޔާ ހަސަން ސާއިދު އާއި ދެކުނު އޭޝިއާ ސަރަހައްދުގައި އުފެދުނު އެންމެ ހުނަރުވެރި އެއް ފުޓްބޯޅަ ތަރި އަލީ އަޝްފާގު (ދަަގަނޑޭ) އެވެ.

ކުޑަ ހުސެން ބުނީ ދަގަނޑޭ އަކީ ވަރަށް ފެންވަރު މަތީ ކުޅުންތެރިއެއް ކަމަށާއި ދަގަނޑޭގެ އަސްލު ލެވެލަށް ބަލާއިރު އޭނާ އަށް ހާސިލްކުރެވުނީ 20 ޕަސެންޓް ކަމަށެެވެ.

"ދަގަނޑޭ އަކީ ޕްރިމިއާ ލީގުގެ ފުލް ޓީމަކަށް ކުޅެވޭ ވަރުގެ ކުޅުންތެރިއެއް. އެހެން ނަމަވެސް ފުރަތަމަ ހަތަރު ފަސް އަހަރު ވަރަށް ރަނގަޅަށް ޒުވާން އިރުގައި އެ ޗާންސް ދޭންވީ ވަގުުތުގައި އެ ޗާންސް އޭނަ އަށް ނުދެވި ނޫނިއްޔާ އެ ޗާންސް އޭނަ އަށް ބޭނުން ނުކުރެވިގެން އޭނާ އަށް އެ ލަނޑުދަނޑިއާ ހަމައަށް ނުދެވެނީ،" ކުޑަ ހުސެން ބުންޏެވެ.

ކުޑަ ހުސެން ދެކޭ ގޮތުގައި ސާއިދަކީ ދުނިޔޭގެ މަތީ ލެވަލްގައި އޮލިމްޕިކްސްގެ ވެސް މެޑަލެއް ލިބޭނެ ފެންވަރުގެ އެތުލީޓެކެވެ. ސަތޭކަ މީޓަރު ދުވުން 10 ސިކުންތަށް ވުރެ އަވަހަށް ދުވޭނެ ފަދަ ގާބިލުކަން ހުރި އެތުލީޓެކެވެ.

ދަގަނޑޭ (ވ) އާއި ސާއިދު (ކ): ހުޅުމާލޭ ޓްރެކުގައި ކުރިއަށް ގެންދިޔަ ފިޓްނަަސް ސެޝަނެއްގެ ތެރެއިން.

ކުޑަ ހުސެން ބުނީ ސާއިދު ޖެމެއިކާ އަށް ގޮސް ޓްރެއިން ކުރި ދެ އަހަރު އެ ދުވީ 10.33 ސިކުންތުން ކަމަށެވެ. އެއީ ގާތްގަނޑަކަށް 1990 އަހަރުތަކުގައި އޭޝިއަން ގޭމްސްގައި ރަން މެޑަލް ނޫނީ ރިހި މެޑަލް ލިބޭ ފެންވަރު ކަމަށެވެ. އެ ހިސާބުން ވެސް ހުއްޓާނުލައި ޓްރެއިނިން ކުރިއަށް ގެންދިޔަ ނަމަ ސާއިދަށް ކެރިއަރުގައި ވަރަށް ކުރިއަށް ދެވޭނެ ކަމަށް ކުޑަ ހުސެން ގަބޫލުކުރެ އެވެ.

"އެ ދެ އަހަރަށް ފަހުގައި ސާއިދުގެ ޓްރެެއިނިންތައް ބަދަލުވީ މާލެ އަށް. ދިވެހިރާއްޖެ އަށް ބަދަލުވުމުގެ ސަބަބުން އަދި އެ ފޯކަސް ގެއްލުމުގެ ސަބަބުން އެ ފެންވަރަށް ދިއުމުގެ ޗާންސް ގާތްގަނޑަކަށް މިހާރު ގެއްލިގެން އެ ދަނީ،" ކުޑަ ހުސެން ބުންޏެވެ.

"ސާއިދަށް އެ ޗާންސް ސަރުކާރުންނާއި ގައުމުންނާއި ސާއިދު ބޭނުންވެއްޖެ ކަމަށް ވަންޏާމު އެ ފަދަ ފެންވަރު ގައުމަކަށް ހަތަރެއް ނުނީ ހައެއްކަ އަހަރަށް ދެވިއްޖެ ކަމަށް ވަންޏާ އަދިވެސް ސާއިދަކީ ދިވެހިރާއްޖެ އަށް އޮލިމްޕިކްސް ގޭމްސްގެ ފެންވަރު މުބާރާތެއްގައި ރަން މެޑަލް ހޯދާނެ ފެންވަރުގެ އެތުލީޓެއް،"

މި ފަހަރުގެ އޮލިމްޕިކްސްގައި ސާއިދު ވާދަކުރި ހީޓުން ލިބުނީ ހަތަރު ވަނަ އެވެ. އެހެންވެ، ފުރަތަމަ ބުރަށް ނުހޮވުނެވެ.

ސާއިދު އެންމެ ފުރަތަމަ 2016 ވަނަ އަހަރު ބްރެޒިލްގެ ރިއޯގައި ކުރިއަށްދިޔަ އޮލިމްޕިކްސްގައި ވާދަކުރިއިރު، ޕްރިލިމިނަރީ ހީޓުގެ އެއް ވަނައިގެ ގޮތުގައި ފުރަތަމަ ބުރުން ފުރުސަތު ހޯދި އެވެ. ސާއިދު، އެ ހީޓުގެ އެއްް ވަނަ ހޯދީ 10.43 ސިކުންތުން ރޭސް ނިންމައިގެންނެވެ. އޭނާ އަކީ އޮލިމްޕިކްސްގެ، ބުރެއްގެ އެއް ވަނަ ހޯދި ރާއްޖޭގެ ފުރަތަމަ ކުޅިވަރު ކުޅުންތެރިޔާ އެވެ.

ކުޑަ ހުސެން ބުނީ މި ފަހަރުގެ އޮލިމްޕިކްސްގައި ސާއިދުގެ ޓައިމިން އާއި އޭނާގެ ފަރާތުން ފެނުނު ކަންކަން މި ވަގުތުގެ ހާލަތަށް ބަލާއިރު ރަނގަޅު ކަމަށެވެ. އަދި ތަމްރީންތައް ލިބުނު ވަރާ ބަލާއިރު މި ފަހަރުގެ އޮލިމްޕިކްސްގައި ބެޑްމިންޓަނުން ވާދަކުރި ރާއްޖޭގެ ފާތިމަތު ނަބާހާ އާއި ފެތުމުގެ އިވެންޓްތަކުގައި ރާއްޖެ ތަމްސީލްކުރި އައިޝަތު ސާޖިނާ އާއި މުބާލް އައްޒާމް އިބްރާހީމްގެ މަސައްކަތް ވެސް ރަނގަޅު ކަން ކުޑަ ހުސެން ފާހަގަކުރި އެވެ.