އެތުލެޓިކޯ މެޑްރިޑަށް މި ފަހަރު ސްޕެނިޝް ލީގު (ލަލީގާ) ޗެމްޕިއަންކަން ހޯދައިދިން ކޯޗު ޑިއޭގޯ ސިމިއޯނީ ޗުއްޓީ އަކަށް މިއަދު ރާއްޖެ އަތުވެއްޖެ އެވެ.

ސިމިއޯނީ މީގެ ކުރިން ވެސް ވަނީ ސީޒަން ނިންމާލުމަށް ފަހު ޗުއްޓީ އަކަށް ރާއްޖެ އައިސްފަ އެވެ. މި ފަހަރު އޭނާ ރާއްޖެ އަށް ޗުއްޓީ ހޭދަކުރާނީ ދުނިޔޭގެ އެންމެ މަގުބޫލު ރިސޯޓްތަކުގެ ލިސްޓުން ޖާގަ ހޯދާފައިވާ ވަލްޑޯފް އެސްޓޯރިއާ މޯލްޑިވްސް އިތާފުށީގަ އެވެ.

މީގެ ފަސް ވަރަކަށް ދުވަސް ކުރިން ސްޕެއިނުގެ އިބީޒާގައި ސިމިއޯނީގެ އާއިލާގެ މެމްބަރެއްގެ ކައިވެނި ކުރިއަށްދިޔައިރު، އެ ޕާޓީތަކަށް ފަހު ސިމިއޯނީ ނިންމީ އޭނާގެ އަންހެނުންނާއި ދަރިންނާ އެކު ޗުއްޓީ އަކަށް ރާއްޖެ އައުމަށެވެ.

އެތުލެޓިކޯ އަށް ކުރިން ކުޅުނު މަޝްހޫރު މިޑްފީލްޑަރު ސިމިއޯނީ އެ ޓީމުގެ ކޯޗުކަމާ ހަވާލުވީ 2011 ވަނަ އަހަރު އެވެ. އެ ފަހުން އެ ޓީމަށް ވަނީ ނުވަ ތަށި ހޯދައިދީފަ އެވެ. އޭގެ ތެރޭގައި ސްޕެނިޝް ލީގު ދެ ފަހަރު އަދި ޔޫރޮޕާ ލީގު ދެ ފަހަރު ހިމެނެ އެވެ. އެތުލެޓިކޯ އިން މި ފަހަރު ލީގު ޗެމްޕިއަންކަން ހޯދީ ހަތް އަހަރު ފަހުންނެވެ.

ސިމިއޯނީ މީގެ ކުރިން އޮފް ސީޒަނުގައި އެންމެ ފުރަތަމަ އުފަން ގައުމު އާޖެންޓީނާ އަށް ދެ އެވެ. އެކަމަކު މިހާރު އާޖެންޓީނާގައި ކޮވިޑް-19ގެ ކޭސްތައް ވަރަށް ބޮޑަށް އިތުރުވެފައިވާއިރު، އެ ގައުމަށް މި ވަގުތު ދެވޭނެ ގޮތެއް ނެތެވެ.

ލަލީގާ ނިންމާލުމަށް ފަހު ސެލްޓަ ވިގޯގެ މިޑްފީލްޑަރު ޑެނިސް ސުއަރޭޒް ވެސް ވަނީ ޗުއްޓީ ހޭދަކުރަން ރާއްޖެ އައިސްފަ އެވެ. އަދި ލިވަޕޫލްގެ ބެލްޖިއަމް ފޯވާޑް ޑިވޮކް އޮރީގީ ވެސް މި ވަގުތު ހުރީ ޗުއްޓީ އަކަށް ރާއްޖޭގަ އެވެ.