މިލާން (އޭޕްރީލް 27) - ޔޫރަޕިއަން ސުޕަ ލީގު ފަދަ ރަސްމީ ފެޑެރޭޝަނަކުން ބަލައިނުގަންނަ ލީގެއްގައި ބައިވެރިވާ އިޓާލިއަން ލީގުގެ ކްލަބްތަކަށް އެ ލީގުގަިއ ނުކުޅެވޭ ގޮތަށް ގަވާއިދެއް ހަދައިފި އެވެ.

އިޓަލީގެ ކްލަބްތަކާ އެކު މަޝްވަރާކުރެވިގެން ދި އިޓާލިއަން ފުޓްބޯލް ފެޑެރޭޝަން (އެފްއައިޖީސީ) އިން އެޕްރޫވްކުރި ގަވާއިދުގައިވާ ގޮތުން ޔުއެފާ އާއި ފީފާ އިން ބަލައިނުގަންނަ އަމިއްލަ ލީގުތަކުގައި އިޓާލިއަން ލީގުގެ ޓީމުތަަކަށް ނުކުޅެވޭނެ އެވެ.

މި މަހު 18 ވަނަ ދުވަހު ސުޕަ ލީގު އިއުލާންކުރިއިރު، އެ ލީގުގައި ހިމެނޭ ކްލަބްތަކުން ބޭނުންވަނީ ސުޕަ ލީގުގައި ކުޅުނު ނަމަވެސް ޑޮމެސްޓިކް ލީގުގައި ކުޅެވޭގޮތަށް އޮތުމެވެ. ސުޕަ ލީގަކީ ޗެމްޕިއަންސް ލީގުގެ ބަދަލުގައި ކުޅޭ މުބާރާތެއްގެ ގޮތުގައި ބޭއްވުމަށެވެ.

އެފްއައިޖީސީން ހެދި މި ގަވާއިދަށް އަމަލުކުރަން ފެށުމާ އެކު އަދިވެސް ރަސްމީކޮށް ސުޕަ ލީގުން ވަކިނުވެ އޮތް ޔުވެންޓަސް އިން އެ ލީގުގައި ދެމިއޮތުމާ މެދު ވަރަށް އަވަހަށް ގޮތެއް ނިންމަން ޖެހޭނެ އެވެ. ސުޕަ ލީގުގެ ފައުންޑަރު ކްލަބްތަކުގެ ތެރޭގައި އޮތް އޭސީ މިލާނާއި އިންޓަ މިލާން ވަނީ އެ ލީގުން ވަކިވެފަ އެވެ. ސުޕަ ލީގުން ވަކިވާން އިޓަލީގެ ޓީމުތަކަށް އޮތް އެންމެ ފަހުގެ މުއްދަތަކީ ޖޫން މަހުގެ 21 އެވެ.

"މި ވަގުތަށް އަހަރެމެން އަތުގައި ސީދާ މައުލޫމާތެއް ނެތް ކޮން ބައެއްތޯ ސުޕަ ލީގުން ވަކިވީ އެހެން ބުނާކަށް. އަންނަ ސީޒަނުގެ ލީގުގެ ބައިވެރިން ރަޖިސްޓްރީ ކުރުމުގެ އެންމެ ފަހުގެ މުހުލަތަކީ ޖޫން މަހުގެ 21 ވަނަ ދުވަހު. އޭރު އެހެން ޕްރައިވެޓް ލީގެއްގައި ބައިވެރިވެފައި އޮންނަ ޓީމަކަށް. އަހަރެމެންގެ ލީގުން ފުރުސަތެއް ނޯންނާނެ،" އެފްއައިޖީސީގެ ރައީސް ގަބްރިއެލް ގްރަވީނިއާ ވިދާޅުވި އެވެ.

އިޓާލިއަން ލީގުން ރަސްމީކޮށް ސުޕަ ލީގު ފަދަ ލީގުތަކުގައި ބައިވެރިނުވެވޭ ގޮތަށް ކަރުދާހުގައި ގަވާއިދެއް ހިމެނުމާ އެކު ވަރަށް އަވަހަށް މަޝްހޫރު އެހެން ލީގުތަކުން ވެސް އެ ގޮތަށް އަމަލުކުރާނެ ކަމަށް ބެލެވެ އެވެ. ދާދި ފަހުން ސްޕެނިޝް ލީގާއި އިނގިރޭސި ޕްރިމިއާ ލީގުން ވެސް ވަނީ ސުޕަ ލީގުގައި ބައިވެރިވި ކްލަބްތަކާ މެދު އަމަލުކުރާނެ ގޮތެއް ކަނޑައެޅުމަށް އެ ލީގުތަކުގައި ބާކީ އޮތް ކްލަބްތަކާ ބައްދަލުކޮށްފަ އެވެ.