މުދާ އެތެރެކުރާއިރު އިންވޮއިސްތަކަށް މަކަރު ހަދައިގެން ނުވަތަ އަންޑަ އިންވޮއިސް ކޮށްގެން މުދާ އެތެރެކުރާތީ، ދައުލަތަށް ލިބެންޖެހޭ އާމްދަނީން އަހަރަކު ގާތްގަނޑަކަށް 2.5 ބިލިއަން ރުފިޔާ ގެއްލެމުންދާ ކަމަށް ރައްޔިތުންގެ މަޖިލީހުގެ ނައިބު ރައީސް އަހުމަދު ސަލީމް ވިދާޅުވެއްޖެ އެވެ.
އަންނަ އަހަރަށް ލަފާކޮށް ހުށަހަޅާފައިވާ ބަޖެޓު ދިރާސާކުރާ ކޮމިޓީގައި ވާހަކަ ދައްކަވަމުން ސަލީމް ވިދާޅުވި ގޮތުގައި ކަސްޓަމްސްއަށް ލިބެން ޖެހޭ ފައިސާގެ ތެރެއިން ގިނަ އަދަދެއްގެ ފައިސާ ގެއްލެމުން ދަނީ ވިޔަފާރިވެރިން މުދާ އެތެރެކުރާއިރު އިންވޮއިސްތަކުގައި އަަސްލު އަގު ޖަހަމުން ނުދާތީ އެވެ.
"ެއެ ނުލިބޭ ސަބަބަކީވެސް ހަމަ އަންޑަ އިންވޮއިސް ކޮށްގެން، ތިރީސް ޕަސެންޓުގައި، ސާޅީސް ޕަސެންޓުގައި، ފަންސާސް ޕަސެންޓު ގައި އިންވޮއިސް ހަދައިގެން ގިނަ ބަޔަކު އެ އިންވޮއިސް ލުމުގެ ސަބަބުން ދައުލަތަށް ވަރަށް ބޮޑަށް ގެއްލުމެއް ލިބިގެންދޭ،" ސަލީމް ވިދާޅުވި އެވެ.
ދައުލަތުގެ މާލީ ހިސާބުތަކުން ދައްކާ ގޮތުގައި އިމްޕޯޓް ޑިއުޓީގެ ގޮތުގައި ވަނީ މި އަހަރުގެ އޮކްޓޯބަރު މަހާ ހަމައަށް 2.7 ބިލިއަން ރުފިޔާ ލިބިފައިވެ އެވެ. ސަލީމް އަންދާޒާ ކުރައްވާ ގޮތުގައި އަންޑަ އިންވޮއިސްކުރާތީ ކަސްޓަމްސްއަށް ޑިއުޓީގެ ގޮތުގައި ލިބެން ޖެހޭ އާމްދަނީގެ ތެރެއިން ދެބައިކުޅަ އެއްބައި ނުލިބެ އެވެ.
"ގާތްގަނޑަކަށް ދޭއް ޕޮއިންޓް ފަހެއް ބިލިއަން އަހަރަކު ދައުލަތަށް ގެއްލިގެން އެބަދޭ އަންޑައިވޮއސް ކޮށްގެން މުދާ އެތެރެކުރުމުގެ ސަބަބުން،" އޭނާ ވިދާޅުވި އެވެ.
އޮޑިޓާ ޖެނެރަލްގެ އޮފީހުން ނެރުނު މޯލްޑިވްސް ކަސްޓަމްސް ސާވިސްގެ 2023 ވަނަ އަހަރުގެ މާލީ އޮޑިޓް ރިޕޯޓުގައި ބުނެފައިވާ ގޮތުގައި، އެ އަހަރުގެ ނިޔަލަށް ދައުލަތަށް ލިބެންޖެހޭ 461 މިލިއަން ރުފިޔާ ނުލިބި އެބަހުއްޓެވެ. މީގެ ތެރެއިން 95 ޕަސެންޓަކީ އިމްޕޯޓް ޑިއުޓީ އެވެ. ދެން ހިމެނެނީ ޖޫރިމަނާގެ ގޮތުގައި ލިބެންޖެހޭ ފަސް ޕަސެންޓާއި އެހެނިހެން ފީތަކެވެ.
އަންޑަ އިންވޮއިސް ކުރުމަކީ ވިޔަފާރީގެ ލިޔެކިޔުންތަކުގައި މުދަލުގެ ނުވަތަ ހިދުމަތުގެ އަގު، ނުވަތަ އަދަދު، ނުވަތަ ފެންވަރު، ހަގީގަތުގައި އެއްބަސްވި ނުވަތަ ދެއްކި އަދަދަށްވުރެ ގަސްދުގައި ކުޑަކޮށް ނުވަތަ މަދުކޮށް އިންވޮއިސްގައި ލިޔުމެވެ.
