ނިކޮޓިން ޕައުޗްތަކާ ގުޅޭގޮތުން ދުނިޔޭގެ ސިއްހަތު ޖަމްއިއްޔާ އާއި އެމެރިކާގެ ފުޑް އެންޑް ޑްރަގް އެޑްމިނިސްޓްރޭޝަނުން ގެންގުޅޭ ސިޔާސަތުތަކުގައި ބޮޑެތި ތަފާތުތަކެއް އެބަހުއްޓެވެ.
ދުނިޔޭގެ ސިއްހަތު ޖަމްއިއްޔާއިން ނިކޮޓިން ޕައުޗަކީ ޒުވާނުންގެ ސިއްހަތަށް އޮތް ބޮޑު ނުރައްކަލެއްގެ ގޮތުގައި ސިފަކޮށް އިންޒާރު ދެމުންދާއިރު، އެމެރިކާގެ އެފްޑީއޭ އިން ވަނީ ސައިންޓިފިކް ހޯދުންތަކަށް ބިނާކޮށް މިއީ ސިއްހީ ނުރައްކާތެރިކަން ކުޑަ އުފެއްދުމެއްގެ ގޮތުގައި ކަނޑައަޅައި ބޭނުންކުރުމުގެ ހުއްދަ ދީފަ އެވެ. މި
ދެ އިދާރާގެ މެދުގައި ހިޔާލުތަފާތުވުންތަކެއް ހުރި ނަމަވެސް، އާދައިގެ ސިނގިރޭޓަކީ އެންމެ ނުރައްކާތެރި އުފެއްދުން ކަމަށާއި ނިކޮޓިން ޕައުޗް ފަދަ ތަކެއްޗަކީ އޭގެ ނުރައްކާ ނިސްބަތުން ކުޑަ ވަސީލަތްތަކެއް ކަމަށް ދެ ފަރާތުން ވެސް އެއްބަސްވެ އެވެ.
ދުނިޔޭގެ ސިއްހަތު ޖަމްއިއްޔާއިން 2026 ވަނަ އަހަރަށް އަމާޒުކޮށްގެން ކުރިއަށްގެންދާ ކެމްޕޭނުގައި އެންމެ ބޮޑު އިސްކަމެއް ދިނުމަށް ނިންމާފައިވަނީ ނިކޮޓިން ޕައުޗްގެ ނުރައްކަލާ ގުޅޭ ގޮތުން ހޭލުންތެރިކަން އިތުރުކުރުމަށެވެ. ނަމަވެސް އެމެރިކާގެ ތަފާސްހިސާބުތަކަށް ބަލާއިރު، ޒުވާނުންގެ މެދުގައި މިފަދަ ތަކެތި ބޭނުންކުރާ މިންވަރު ހުރީ ވަރަށް ދަށް މިންވަރެއްގަ އެވެ.
އެގޮތުން 2025 ވަނަ އަހަރުގެ ހިސާބުތަކުން ދައްކާގޮތުގައި އެމެރިކާގެ ޒުވާނުން ނިކޮޓިން ޕައުޗް ބޭނުންކުރާ މިންވަރު ހުރީ އެންމެ 1.7 އިންސައްތައިގަ އެވެ. މިއީ ފާއިތުވި އަހަރުތަކުގައި އެއްވަރެއްގައި ހިފެހެއްޓިފައިވާ އަދަދެއްކަން އެ ގައުމުގެ ތަފާސްހިސާބުތަކުން ސާފުވެ އެވެ.
ދުންފަތުގެ އިސްތިއުމާލުކުރުން މަދުކުރުމުގައި ސްވިޑަންއިން ހޯދާފައިވާ ކާމިޔާބީއަކީ މި ދާއިރާގައި ފާހަގަކޮށްލެވޭ ނަމޫނާއެކެވެ. ސްވިޑަންއިން ވަނީ ސިނގިރޭޓަށްވުރެ ނުރައްކާ ކުޑަ ވަސީލަތްތައް ކަމަށްވާ ނިކޮޓިން ޕައުޗް، ވޭޕް އަދި ސްނޫސް ފަދަ ތަކެއްޗަށް ފުރުސަތު ދީފަ އެވެ. މީގެ އިތުރުން އެ ގައުމުން ވަނީ އާދައިގެ ސިނގިރޭޓުން ނަގާ ޓެކްސް ބޮޑުކޮށް، މީހުން ދުންފަތާ ދުރުކުރުމަށް ހަރުދަނާ ފިޔަވަޅުތަކެއް އަޅާފަ އެވެ. މި ސިޔާސަތުގެ ނަތީޖާއެއްގެ ގޮތުން ސްވިޑަންއަކީ މިހާރު މުޅި ޔޫރަޕްގައި ވެސް ދުންފަތުގެ އިސްތިއުމާލުކުރުން އެންމެ މަދު އަދި ދުންފަތާ ގުޅުންހުރި ބަލިތައް އެންމެ މަދުން ފެންނަ ގައުމެވެ.
ދިވެހިރާއްޖޭގެ ހާލަތަށް ބަލާއިރު، ރާއްޖެއިން މިހާތަނަށް އަމަލުކުރަމުން އައީ ދުނިޔޭގެ ސިއްހަތު ޖަމްއިއްޔާގެ އިރުޝާދުތަކަށެވެ. ރާއްޖޭގެ ގާނޫނީ އޮނިގަނޑުގެ ތެރެއިން ދުންފަތުގެ ވިޔަފާރި ކުރުމުގެ ފުރުސަތު އޮތް ނަމަވެސް، ދުންފަތުގެ އިސްތިއުމާލުކުރާ މިންވަރު ރާއްޖޭގައި އަދިވެސް ހުރީ ކަންބޮޑުވާންޖެހޭ މަތީ މިންވަރެއްގަ އެވެ.
މިކަމުގެ ސަބަބުން ސިއްހީ ނިޒާމަށް ކުރާ ބާރު ބޮޑުވެފައިވާއިރު، ދުނިޔޭގެ އެހެން ގައުމުތަކުން ގެންގުޅޭ ކާމިޔާބު ސިޔާސަތުތަކަށް ބަލައިގެން ރާއްޖޭގެ ދުންފަތް ކޮންޓްރޯލްކުރުމުގެ ސިޔާސަތުތައް މުރާޖާކުރުމުގެ މުހިންމުކަން މިހާރު ވަނީ ބޮޑުވެފަ އެވެ.
